ස්වකීය ධූරයෙන් ඉල්ලා අස්වූ ජපාන අගමැති ශින්සො අබේ වෙනුවට යොෂිහිදෙ සුගා අගමැති ධූරයට පත් වනු ඇතැයි ජපාන ආරංචි මාර්ග සඳහන් කරයි. සුගා හිටපු අගමැති අබේගේ ‘දකුණු අත‘ යනුවෙන්ද හඳුන්වනු ලැබේ.
සුගා වැඩි ජනප්රියත්වක් ලබා සිටින්නේ තිරයෙන් පිටුපස වැඩි බර උසුලන්නකු වශයෙනි. එමෙන්ම නායකයකු සතු කැරිස්මා බලයක් ඔහුට නැතැයිද පැවසේ.
තම සෞඛ්ය තත්ත්වය යහපත් නොවන බව පවසමින් ජපානයේ අග්රමාත්ය ශින්සෝ අබේ පසුගියදා තමා ධූරයෙන් ඉල්ලා අස්වන බව පවසා සිටියේය. මේ වන විට ඔහු වසර අටක කාලයක් ජපානයට නායකත්වය දී තිබුණු අතර, වැඩි උච්චාවචනයන්ගෙන් තොරව එරට පාලනය කිරීමේ හැකියාවද ලබා ගත්තේය. ඔහුගේ පාලනයේ ශක්තිමත් බව කොතෙක්ද යත් මේ වන විට ඉතිහාසයේ වැඩිම කළක් ජපානය පාලනය කළ අග්රාමාත්යවරයා වන්නේද අබේ ය. කෙසේ වුවද ශක්තිමත් ආණ්ඩුවක් සමඟ පාලනය ඉදිරියට ගෙන යා හැකිව තිබියදී මෙසේ සෞඛ්ය හේතූන් මත ඉල්ලා අස්වීමට ඔහු තීරණය කර ඇති නමුත් ඔහු පවසා ඇත්තේ තමන් පාර්ලිමේන්තු සාමාජිකයකු ලෙස දිගටම සේවයේ යෙදෙන බවයි. ඇතැම් විට මෙසේ කිරීමට හේතුව තමාගෙන පසු ඉදිරියේදී අගමැති ධූරය සඳහා තවත් අයෙකුට අත්දැකීම් ලබා දීමද විය හැකිය. මැතිවරණයට පෙර අගමැදි ධූරයේ කටයුතු කිරීමෙන් අත්දැකීම් ලබාගත් පුද්ගලයකු අගමැති ධූරාපේක්ෂකයා ලෙස පක්ෂයට නායකත්වය දීම ජනතාවගේ විශ්වාසයද දිනා ගැනීමට පහසු මගක් වේ.
කෙසේ වුවද ජපාන වාර්තා පවසා සිටින්නේ අගමැතිවරයා තම ඉල්ලා අස්වීම ප්රකාශ කළ පසු ජපානය කම්පනයට පත්වූ බවයි. තම අනුප්රාප්තිකයා පත්වන තුරු අබේ අග්රමාත්යවරයා ධූරයේ රැඳී සිටින බවද ප්රකාශ කර තිබේ.
කෙසේ වුවද ජපාන මාධ්ය වාර්තා වැඩිදුරටත් පෙන්වා දෙන්නේ මීළඟ අගමැතිවරයා සඳහා පාලක ලිබරල් ඩිමොක්රටික් පක්ෂය අභ්යන්තරයේ කණ්ඩායම් කිහිපයක තරඟයක්ද නිර්මාණය වී ඇති බවයි. ඒ කණ්ඩායම්වල කිහිපදෙනෙක් අගමැති ධූරය බලාපොරොත්තුව සිටින නමුදු විශාලතම කණ්ඩායම යොෂිහිදෙ සුගා වටා එකතු වී සිටින බවද ජපාන මාධ්ය වාර්තා කර තිබේ.
අබේගේ මේ ක්ෂණික ඉල්ලා අස්වීම සමඟ ජපාන දේශපාලන ක්රියාකාරිත්වය විග්රහ කරන කොලොම්බියා විශ්ව විද්යාලයේ ජපාන දේශපාලනය පිළිබඳ මහාචාර්ය ජෙරල්ඩ් කර්ටිස් පෙන්වා දෙන්නේ අබේගේ මේ ‘කල් තබා විශ්රාම ගැනීම‘ සුගාට මැතිවරණ ජයකින් අගමැති පුටුවට යෑමට පාර කැපීමක් බවයි. අබේ වෙනුවට අගමැති ධූරයට පැමිණෙන සුගා මාස කිහිපයකින් ජනතා හඳ බැඳ ගැනීමට කටයුතු කරණු ඇති බවත්, ටික කලකින්ම ‘ඔහු කොවිඩ් වසංගතය මර්දනය කර රට සාමාන්ය අතට ගෙන ඒමට සමත් වූ ශ්රේෂ්ඨ පාලකයකු යැයි ජනතාව කියනු ඇතැයිද‘ කර්ටිස් පෙන්වා දී තිබේ. මේ සියල්ලේ අවසාන ප්රතිඵලය වනු ඇත්තේ සුගා මීළඟ මැතිවරණයෙන් ජයග්රහණය කිරීමය.
මෙවැනි අනාවැකි පළ වුවද මේ දක්වා අගමැති අබේ ස්වකීය අනුප්රාප්තිකයා පත් කර නැත. එමෙන්ම මේ අනාවැකි සියල්ල ජපාන ජනතාවගේ ජනමතය අනුව තීරණය වීමටද නියමිතය.