පැතිර යන කොවිඩ් වසගතය හේතුවෙන් මෙවර ඉතා සීමිත හජ් උත්සවයක් පැවැත්වීමට සෞදි අරාබිය තීරණය කර තිබේ. අල් ජසීරා පුවත් සේවය සෞදි අරාබි රජයේ නිවේදනයක් උපුටා දක්වමින් පවසා තිබුණේ මෙවර හජ් වන්දනාව සහ හජ් උත්සවය ඉතා සරලව පැවැත්වීමට සෞදි රජය තීරණය කර ඇති බවයි.
මෙවර හජ් උත්සවය වෙනුවෙන් සහභාගී විය හැකි වන්දනාකරුවන්ගේ සංඛ්යාව ඉතා සීමිත කිරීමටද සෞදි රජය තීරණය කර තිබේ. සාමාන්යයෙන් සෑම වසරකම හජ් වන්දනාවට ලොව පුරා මුස්ලිම් රටවලින් සෞදි අරාබියට පැමිණෙන වන්දනාකරුවන්ගේ සංඛ්යාව මිලියන දෙක ඉක්මවයි.
හජ් වන්දනාව සෑම මුස්ලිම් බැතිමතෙකුගේම ජීවිත කාලය තුළ දකින සිහිනයක් වන අතර ජීවිතයට එක් වරක් පමණක් හෝ හජ් වන්දනාකිරීමට ලොව පුරා සෑම මුස්ලිම් බැතිමතෙක්ම උත්සාහ දරති. මේ හේතුවෙන්ම සෑම වසරකම හජ් වන්දනා සමයේදී අධික ජනතාවක් සෞදි අරාබියේ මක්කමට පැමිණෙන අතර අධික ජනතාවක් සිමිත ඉඩක වන්දනා කිරීම හේතුවෙන් නොයෙක් හදිසි අනතුරුවලට ලක්ව සැලකිය යුතු පිරිසක් මියගිය බවද සෑම වසරකම වාර්තා වේ.
මෙවර පසුගිය මාර්තුවේ ලොව වටා කොවිඩ් වයිරසය පැතිර යෑම ආරම්භ වූ සැණින් මක්කමට වන්දනාකරුවන් පිවිසීම සීමා කිරීමට සෞදි අරාබි රජය කටයුතු කළේ තම ජනතාව වයිරසයෙන් ආරක්ෂා කර ගැනීමටය. එහෙත් වයිරසය රටතුළ පැතිරීම පාලනය කර ගැනීමට සෞදි බලධාරින් නොහැකි වූ අතර මේ වන විට එරටින් වාර්තා වී ඇති සමස්ත ආසාදිතයන් සංඛ්යාව 2,68,934කි. මරණ සංඛ්යාව දෙදහස ඉක්මවා තිබේ.
කෙසේ වුවද මක්කම නගරය ආරක්ෂා කර ගැනීම වැදගත් බව සෞදි බලධාරීන් හොඳින් වටහාගෙන සිටින්නේ මක්කම යනු ෙසෟදි අරාබියේ පමණක් නොව මුළු ලෝකයේම මුස්ලිම් ජාතිකයන්ගේ වන්දනීය ස්ථානය මෙන්ම දේශපාලන බලාධිකාරයේ මධ්යස්ථානයද වන බැවිනි.
හජ් වන්දනාව යනු සෞදි අරාබියට විදේශ විනිමය ගෙන එන ප්රධාන ආදායම් මාර්ගයක්ද වන බැවින් මෙවර හජ් සමය සීමා කිරීමෙන් සෞදි අරාබියට ආර්ථිකවද විශාල පාඩුවක් විඳීමට සිදු වන බව ප්රකාශ වී තිබේ. මේ අතර ලොව පුරා බොහෝ මුස්ලිම් රටවල් මෙවර හජ් වන්දනාවේ නොයන ලෙසට තම ජනතාවට අවවාද කර ඇති බවටද වාර්තා වේ.
ලෝකයේ වැඩිම මුස්ලිම් ජනගහණයක් සහිත රට වන ඉන්දුනීසියාවද මෙලෙස තම ජනතාවට අවවාද ලබා දී ඇති රටකි. මෙලෙස හජ් වන්දනාව කැප කිරීමට සිදුවීම අතිශය වේදනාකාරී තීන්දුවක් බවද ඉන්දුනීසියානුවන් පවසා ඇතැයි වාර්තා වේ. මීට අමතරව මැලේසියාව, සිංගප්පූරුව සහ සෙනගොල් යන රටවල්ද තම ජනතාවට හජ් වන්දනාවේ නොයන ලෙස අවවාද කර තිබේ.