තම ජීවිත තමන්ට ඇවැසි ලෙස පවත්වාගෙන යෑමට හැකි අන්දමේ තීරණ ගැනීමට කිසියම් හැකියාවක් සහ එඩිතර බවක් තිබිය යුතුය. එලෙස තීරණ ගැනීමේ හැකියාවක් නොමැතිව තම වටිනා ජීවිත ඔහේ ගෙවා දමමින් දුකින් කල් ගෙවන්නෝ සුලබය. තම තීරණ හේතුවෙන් තම ඥාතීන් කණගාටුවට පත් වේය යන්න ඔවුන් පසුගාමී කරවීමට ප්රධාන හේතුව ලෙස දැක්විය හැකිය. එහෙත් ඒ කිසිවක් නොතකමින් තම සතුට ළඟා කරගන්නා පසුව ඒ ඔස්සේ තම සමීපතමන්ටද සතුට ළඟා කර දිය හැකි අන්දමේ පෞරුෂත්වයක් පවතී නම් ඔවුන්ගේ ජීවිත සුන්දර වනු ඇති බව නිසැකය.
එවැනි පෞරුෂත්වයක් සහිත පුද්ගලයකු ලෙස බ්රිතාන්ය රජ පවුලේ හැරී කුමරා මේ දිනවල කටයුතු කරමින් සිටින්නේය. බ්රිතාන්ය රජපවුල යනු රාජකීයත්වය නිසාම මිනිස් ජීවිත අවුලෙන් අවුලට ඇද දැමීමට සමත් වූ ලෝකප්රසිද්ධ පවුලකි. රජපවුලට සම්බන්ධ වන සෙසු සාමාජිකයන්ට බොහෝ විට රජ පවුලේ සම්ප්රදායන් වෙත කැමැත්තෙන් හෝ අකැමැත්තෙන් අනුගත වීමට සිදු විය. ඒ අනුව රජ පවුලේ සම්ප්රදායන් වෙනුවෙන් තම සතුට බිලිදීමට සහ අවසන ජීවිතය පුද දීමටද ඇතැමුන්ට සිදුවිය. ඒ සඳහා හොඳම උදාහරණය වන්නේ ඔටුන්න හිමි චාල්ස් කුමරුගේ බිරිය වූ ඩයනා කුමරියයි.
හැරී කුමරා ඩයනා කුමරියගේ ගතිගුණවලට බෙහෙවින් සමාන ගතිගුණ දරන බවට මාධ්ය වෙතින් අදහස් පළ වූයේ මීට පෙර සිටමය. රාජකීයත්වය මායිම් නොකරන බව තම විවාහයේ සිටම හැරී කුමරු පෙන්නුම් කර සිටි අතර රජකීයත්වය හේතුවෙන් වන්දි ගෙවූ ජීවිත සංඛ්යාව වැඩි බැවින්දෝ හැරීගේ එම තීරණවලට රජ පවුලෙන්ද විරෝධයක් එල්ල වූයේ නැත. අනෙක් අතට හැරීගේ හිස මත ඔටුන්නක බරක් වූයේ ද නැත.
හැරී විවාහය සඳහා තෝරා ගත්තේ තම සිත්ගත් යුවතිය මිස රාජකීයයන්ට ඔබින යුවතියක නොවේ. හොලිවුඩ් නිළියක මෙන්ම දික්කසාද කාන්තාවකද වන මේගන් රජ පවුලට එක්වීම යනු අදින් දශක තුන හතරකට පෙරදී නම් තැතිගන්වන සුලු පුදුමයක් විය. ඔටුන්න හිමි විලියම් කුමරු අනාගත රජු වීමට සියලු සුදුසුකම් සපුරන විවාහයක බැඳුණු අතර කේට් මහ රැජනටත් වඩා රාජකීය සම්ප්රදායන් අනුගමනය කරන්නියක් ද වන්නීය. මහ රැජනද චාල්ස්ට වඩා විලියම් කුමරු ප්රිය කරන බව පෙනී යන්නේ බොහෝවිට තම පණිවිඩ නිකුත් කිරීමේදීද විලියම් සහ කේට් එක් කර ගන්නා බැවිනි.
හැරීගේ විවාහය රජ පවුල උඩු යටිකුරු කිරීමට සමත් වූ අතර පියා නොමැතිව මේගන් අල්තාරය වෙත ගෙන ඒමටද චාල්ස් කුමරුට සිදුවිය. ඒ වෙනුවෙන් හැරී තම පියාට එම අවස්ථාවේදීම ස්තුති කර සිටියේය.
හැරී සහ මේගන්ගේ පුත්රයාට නම් තැබීමේදීද ඔවුහු දෙදෙන රාජකීය සම්ප්රදායන් කඩ කළෝය. ‘ආචි‘ යනු රාජකීයයන් මෙතෙක් ස්වකීය දරුවකුට ලබා නොදුන් අන්දමේ නමකි. එපමණක්ද නොව දරුවා සම්බන්ධ සෙසු බොහෝ රාජකීය සම්ප්රදායන්ද හැරී මේගන් අතින් කඩවනු දක්නට ලැබිණි.
දැන් හැරී සහ මේගන් රජ පවුල මත තවත් බෝම්බයක් අතහැර තිබේ. රජ පවුලෙන් ඉවත්ව සාමාන්ය මිනිසුන් ලෙස ජීවත් වීමට ඔවුන් අදහස් කර ඇති බව පසුගිය සතියේ මාධ්ය වෙත ඉතා කෙටි සටහනක් නිකුත් කරමින් ඔවුහු පවසා සිටියහ. එසේ කිරීමට පෙර ඒ සඳහා ඔවුහු රජ පවුලෙන් අවසරයක් ඉල්ලා තිබුණේද නැත. ඔවුන් නිකුත් කළ පණිවිඩය දුටු රැජන ඇතුළු රජ පවුලේ ජ්යෙෂ්ඨ සාමාජිකයෝ වහාම රැස් ව හැරී -මේගන් තීරණය ගැන සාකච්ඡා කළහ. අවසන ඔවුන්ට සිදුවූයේද හැරීගේ තීරණයට ඉඩ හැරීමටය.
ඒ අනුව ඉදිරියේදී හැරී සහ මේගන් රජ පවුලෙන් ඉවත්ව කැනඩාවේ පදිංචි වීමට නියමිතය. ලැබෙන වාර්තා අනුව හැරී කුමරු පවසා ඇත්තේ තම ඉදිරි ජීවිතය කැනඩාව සහ බ්රිතාන්යය අතර ගෙවී යනු ඇති බවය. මේ තීරණය සඳහා කැමැත්ත පළ කරමින් මහ රැජන පවසා ඇත්තේ ‘මේ ඔවුන්ගේ ජීවිතවල සංක්රාන්ති සමයක් වනු අැති බවයි‘.
මුල්යමය වශයෙන් ස්වාධීන වීම ඔවුන්ගේ අපේක්ෂාව බවද හැරී මේගන් යුවළ ප්රකාශ කර තිබේ. විවාහයට පෙරද නිළියක වශයෙන් මේගන් කිසියම් ස්ථාවරත්වයක් දිනාගෙන සිටියාය. ඇය රඟපෑ රූපවාහිනී මාලා නාටකයක එක් කොටසක් සඳහා ඇය ඩොලර් 50 000ක ආදායමක් ලැබුවාය. රංගනය කෙසේ වෙතත් සන්නාම තානාපතිවරුන් ලෙස ඔවුන්ට ඉතා විශාල ආදායමක් ඉපයීය හැකි වනු නිසැකය.
හැරී කුමරු කිසිදිනක වෘත්තියක නියැළි නොමැති වුවද ඔහු හමුදා සේවයේ යෙදී ඉතිරි කරගත් මුදලක් පවතින බව ප්රකාශිතය. එමෙන්ම ඩයනා කුමරියගේ අභාවයෙන් පසු ඔහු තම දරුවන් දෙදෙනාට භාරකාර අරමුදලක් යටතේ කිසියම් මුදලක් හිමි වන සේ කටයුතු කර තිබෙන බවද සඳහන්ය. හැරී කුමරුට වයස අවුරුදු 30 සම්පූර්ණ වූ පසු එම මුදල් ලබා ගැනීමටද හැකි වනු ඇත. මීට අමතරව හැරී කුමරුගේ මිත්තණිය වන මවු රැජන හෙවත් එලිසබත් රැජනගේ මවද හැරී කුමරු වෙනුවෙන් කිසියම් මුදලක් ඉතිරි කර ඇති බව සඳහන්ය.
හැරී මේගන් මෙලෙස ස්වාධීන වීමට තීරණය කරන විට බොහෝ බ්රිතාන්ය වැසියන් එයට අප්රසාදය පළ කර තිබේ. බ්රිතාන්යය යුරෝපා සංගමයෙන් ඉවත් වීම ‘බ්රෙක්සිට්‘ ලෙස හැඳින්වූ ඔවුහු, හැරී මේගන් රජ පවුලෙන් ඉවත් වීම ‘මෙග්සිට්‘ ලෙස හැඳින්වීමට පටන් ගෙන තිබේ. ඔවුහු රජ පවුල තම රටේ අනන්යතාව ලෙස හඳුනාගෙන සිටින අතර රජපවුල කිසියම් අන්දමක කඩාවැටීමට ලක් වනු දැකීම අප්රිය කරති.
මේ අතර කැනඩා ජනතාව හැරී සහ මේගන් ආදරයෙන් පිළිගැනීමට සූදානම් බව ප්රකාශ සිටිති. කැනඩාවේදී ඔවුන්ට පොලිස් ආරක්ෂාව ලැබීමට නියමිත අතර ඒ වෙනුවෙන් මුදල් ගෙවීමටද ඔවුන්ට හෝ කැනඩා රජයට සිදුවනු ඇත.
රාජකීයත්වයෙන් නික්ම මහපොළොවේ ජීවත් වීමට තීරණය ගැනීමට තරම් ශක්ති සම්පන්න වූ මේ ආදරණීය රාජකීය යුවළගේ අනාගත ජීවිතය තවත් සෙසු ධෛර්ය සම්පන්න මිනිසුන් රැසකට ආදර්ශයක්ම වනු ඇත.