විද්යුත් සහ මුද්‍රිත මාධ්‍යවලට අමතරව මුහුණුපොත ද දැන් කදිම සන්නිවේදන මාධ්‍යයක් බවට පත්වී අවසන්ය. හොඳ මෙන්ම නරක පුවත් ද මුහුණුපොත තුළින් ලොව පුරා සැරි සරයි. පසුගියදා වලල්ලාවිට තරුණයකු මුහුණුපොතේ තැබූ සටහනක් දැන් ආන්දෝලනාත්මක පුවතක් බවට පත්වී තිබේ.
දසුන් කාවින්ද මධුවන්ත නම් ඔහු තම මුහුණුපොතේ සැප්තැම්බර් 1 වැනිදා සටහනක් තබා තිබුණේ “අතිගරු ජනාධිපති තුමනි, ඔබේ අවධානය පිණිසයි ”යන උද්ධෘත පාඨයද සමඟිනි. ඒ යටතේ ඔහු වැඩිදුරටත් සඳහන් කර තිබුණේ “වලල්ලාවිට ප්‍රාදේශීය සභාවේ අද වන විට වටිනා වාහන ප්‍රමාණයක්, යන්ත්‍රසූත්‍ර විශාල ප්‍රමාණකයක් දිරාපත් වෙමින් පවතී. කාර්මික දෝෂ නිසා පැත්තකට විසික් කරලා තිබෙන මෙම වටිනා යන්ත්‍රසූත්‍ර, යානවාහන යථා තත්ත්වයට ගෙන මහජනතාවට සේවය කිරීම සඳහා වැඩපිළිවෙළක් ආරම්භ කරන මෙන් ඉල්ලා සිටිමි” යනුවෙනි. එම සටහන සමඟ ඔහු දිරාපත් වන වාහනවල ඡායාරූප කිහිපයක්ද එක්කර තිබිණ. දසුන් මධුවන්තගේ එම ෆේස්බුක් සටහන අන්තර්ජාලය ඔස්සේ සංසරණය වීමත් සමඟ ඒ සම්බන්ධයෙන් ප්‍රතිචාර රැසක්ද ලැබෙන්නට විය. බොහෝ දෙනකු දසුන් හෙළිකළ පුවත පිළිබඳ ඔහුට ප්‍රසාදය පළකරමින් කරන්නට වූහ.
 |
| දසුන් මුහුණුපොතේ පළකළ සටහන |
එවැනි පසුබිමක් තුළ එම පුවත පිළිබඳ වලල්ලාවිට ප්‍රාදේශීය සභාවේ බලධාරීන්ගේ අවධානයද යොමු වූයේ එම පුවත ඍජුවම එම ප්‍රාදේශීය සභාව ඉලක්ක කරගත්තක් වූ නිසාය. අවසානයේ සිදු වූයේ දසුන් මධුවන්ත තරුණයාට විරුද්ධව වලල්ලාවිට ප්‍රාදේශීය සභාවේ ලේකම්වරයා විසින් මීගහතැන්න පොලිසියට පැමිණිල්ලක් ඉදිරිපත් කිරීමයි. අනවසරයෙන් වලල්ලාවිට ප්‍රාදේශීය සභා භූමියට ඇතුළු වීම, ප්‍රාදේශීය සභා භූමියේ පැවති දේපළක් වීඩියෝගත කිරීම සහ ඡායාරූප ගැනීම, සමාජ මාධ්‍ය හරහා ඒ පිළිබඳ හෙළිදරව් කිරීම ආදී කරුණු හේතුවෙන් එම ප්‍රාදේශීය සභාවට විශාල අපකීර්තියක් සිදුවෙමින් පවතින බව එම පැමිණිල්ල තුළින් දසුන්ට චෝදනා කර තිබිණ.
දසුන් මුහුණුපොතේ තැබූ සටහන මඟින් කළ හෙළිදරව්ව නිසා ඔහුට විරුද්ධව ප්‍රාදේශීය සභාව පොලිසියට පැමිණිලි කිරීම ගැන සමාජ මාධ්‍යවලින් පමණක් නොව විද්යුත් හා මුද්‍රිත මාධ්‍ය තුළින් ප්‍රචාරය වීමත් සමඟ එය මේ වන විට ආන්දෝලනාත්මක සිදුවීමක් බවට පත්ව තිබේ. ඒ පිළිබඳ අදහස් දක්වන බොහෝ දෙනකු පවසන්නේ දසුන් සිදු කර ඇත්තේ සමාජයට අහිතකර කටයුත්තක් නොවන බවයි. ඒ සමඟම දසුන් කවුද යන්න පිළිබඳ බොහෝ දෙනාගේ අවධානය යොමු වන්නට පටන් ගත්තේය.
දසුන් කාවින්ද මධුවන්ත නොහොත් හිරිය මුල්ල විතානගේ දසුන් කාවින්ද මධුවන්ත ගේ වයස අවුරුදු 22කි. ඔහුගේ පියා හිරිය මුල්ල විතානගේ චන්ද්‍රසේන ය. මව නාකන්දලගේ දෝන කාන්ති ය. දසුන් පවුලේ එකම දරුවා ය. දසුන් කුඩා වියේදීම ඔහුගේ පියා හදිසියේ මෙලොවින් සමුගෙන ගොස් ඇති අතර මව කාන්ති වසර 16ක් තිස්සේ වලල්ලාවිට කර්මාන්තශාලාවක සේවය කරමින් දසුන් හදාවඩා ගත්තාය. වලල්ලාවිට මහා විද්‍යාලයේ ඉගෙනුම ලැබූ දසුන් 2015 වසරේදී අ.පො.ස සාමාන්‍ය පෙළ විභාගයට පෙනී සිටියද වැඩිදුර ඉගෙනීමට ඔහුට අවකාශ සැලසී නැත.
“ වැඩිදුර ඉගෙන ගන්න මට ආශාවක් තිබුණත් උගන්වන්න වියදම් කරන්න අම්මට තවදුරටත් දුකක් දෙන්න බැරි නිසාම මම පාසල් අධ්‍යාපනයට ආයුබෝවන් කිව්වා. මහින්ද රාජපක්ෂ, බැසිල් රාජපක්ෂ සහ ගෝඨාභය රාජපක්ෂ ඇතුළු රාජපක්ෂවරුන්ට මම හරිම ආදරෙයි. මගේ එකම හීනය රැකියාවක් කරලා මගේ ආදරණීය අම්මව ඇස් දෙක වගේ බලාගන්න එකයි. සුරාසූදුවෙන් තොර මම පුංචි කාලේ ඉඳලම ගලපිටගල විහාරස්ථානයේ දහම් පාසලේ දහම් අධ්‍යාපනය ලැබුවා. ප්‍රදේශයේ යෞවන සමාජයේ සංවිධායක වරයෙක් විදිහට ගමේ සුභසාධක වැඩ කටයුතුවලට දායක වෙනවා. මම යොවුන් පාර්ලිමේන්තුවටත් ඉදිරිපත් වුණා. මත්ද්‍රව්‍ය නිවාරණය, තොරතුරු තාක්ෂණ වගේ ක්ෂේත්‍රයක රැකියාවක් කරන්න මම කැමතියි. පහුගිය කාලයේ කොරියාවේ රැකියාවකට යෑමේ බලාපොරොත්තුවෙන් මම කොරියානු භාෂාවත් හැදෑරුවා. නමුත් කොරෝනා වසංගතය එක්ක ඒකත් සිහිනයක් වුණා. රටට බරක් නැති ආදර්ශවත් ජීවිතයක් ගත කරන එකයි මගේ බලාපොරොත්තුව ”
දසුන් ඔහු ගැන එසේ කීවේය. මුහුණුපොතට එක් කළ සටහන ගැනද අප දසුන්ගෙන් විමසුවෙමු.
“මහේන්ද්‍රා මොනාරෝ ලොරියක්, ජේ.සී.බී රථයක් ලොකු ට්‍රැක්ටර් දෙකක්, ලෑන්ඩ්මාස්ටර් ට්‍රේලර් දෙකක්, ජෙනරේටර් එකක් ප්‍රාදේශීය සභාවේ දිරාපත් වෙමින් තිබෙන බව දැක්කා. ඒවායින් වැඩක් ගන්නෙ නැද්ද කියලා විමසුවා. ඒත් ඵලක් වුණේ නැහැ. ඒ නිසයි අන්තිමේදී මුහුණුපොත හරහා දූෂණ විරෝධී ජනාධිපතිතුමාගේ අවධානය සඳහා මේ සිද්ධිය යොමු කළේ. දැන් ප්‍රාදේශීය සභාව කලබල වෙලා. යෝජනාවක් සම්මත කරගෙන තියෙනවා ඒ වාහන වෙන්දේසි කරන්න කියලා. සැප්තැම්බර් 15 වැනිදා ප්‍රාදේශීය සභාවේ තිබුණු රැස්වීමකදී තමයි ඒ බව තීරණය කරලා තියෙන්නේ. සැප්තැම්බර් 8, 11 දවස් දෙකේම මාව මීගහතැන්න පොලිසියට කැඳෙව්වා. ඒ දවස් දෙකේම පැමිණිල්ල දාලා තිබුණු අය ඇවිත් හිටියෙ නැහැ. පොලිස් කොස්තාපල් සරත් රාලාහාමි මට කිව්වා ෆේස්බුක් එකෙන් ඒ පෝස්ට් එක අයින් නොකළොත් මට විරුද්ධව නඩු පවරන්න වෙනවා කියලා. ඒ වෙලාවේ මම කිව්වා නඩු පවරන්න මම අපරාධයක් කරලා නැහැ. ඒ නිසා 
මම බය නැහැ. මම වෙනුවෙන් විශාල පිරිසක් ඉන්නවා. මම ඒ සිද්ධිය හෙළි කළේ ගමට, රටට, ජනාධිපතිතුමාට තියෙන ආදරය නිසයි. මම ජනාධිපතිතුමාගෙන් ඉල්ලන්නේ මෙහෙම නාස්තිවෙන දේවල් පිළිබඳ හොයලා බලලා විසඳුම් ලබා දෙන්න කියලයි”
වලල්ලාවිට ප්‍රාදේශීය සභාවේ හා පළාත් පාලන නියෝජිත සම්මේලනයේ සභාපති උදේනි අතුකෝරළ එම සිදුවීම ගැන පළ කළේ මෙවැනි අදහසකි.
“ගම් උදාව කාලයේ ප්‍රේමදාස ජනාධිපතිතුමා දීපු වාහනයකුත් ඔතන තියෙනවා. මේවා අපේ භූමියේ තිබුණාට අපට අයිති නැහැ. අපි සභාවට පවරාගෙන වෙන්දේසි කරන්න හදන්නේ මේවා ගර්හිත තත්ත්වයේ වාහන ආදිය නිසයි. දසුන් කියන තරුණ දරුවා සමඟ පෞද්ගලිකව මගේ කිසිම ගැටුමක්, අමනාපයක් නැහැ. ඔය අය පහුගිය කාලේ මට සමාජ මාධ්‍ය ඔස්සේ දිගින් දිගටම පහර ගැහුවා. මඩ ප්‍රචාර ගෙනගියා. මම ඒවාට පළි ගන්නේ නැහැ. ඒ වුණාට ඔහු මේවා ෆේස්බුක් එකේ දාලා සභාවට අපකීර්තියක් කරලා තියෙනවා. මම සභාවේ ලේකම්තුමාට කිව්වා නීත්‍යානුකූල ක්‍රියාමාර්ගයක් ගන්න කියලා. එහෙම නැතිව නඩු දාන්න, පොලිසි යන්න කියලා මම කවදාවත් බලපෑම් කළේ නම් නැහැ. රාජ්‍ය ආයතනයකට ඇතුළු වෙලා ඡායාරූප ගැනීම, මඩ ප්‍රචාරය කිරීම හොඳ දෙයක්ද? යහපත් ආකල්පයකින් කළා කියනවා නම් ඇයි පහුගිය ඡන්දෙදි මට දිගටම මඩ ගැහුවේ.”
වල්ලාවිට ප්‍රාදේශීය ලේකම් ජාලිත සිසිර කුමාර මහතාගෙන්ද අප එම සිදුවීම ගැන විමසුවෙමු.
“එතැන කෝටියක් වටිනා වාහන නැහැ. අපිට අයිති නැති වාහනත් තියෙනවා. පසුගිය 15වැනිදා සභවේ යෝජනාවක් සම්මත කරගත්තා වාහන 2ක් සභාවට පවරාගෙන වෙන්දේසි කළ යුතුයි කියා. රජයේ දේපළ ආවාටගියාට හිතූ හැටියට පාවිච්චි කරන්නට බැහැ. අපි ඔය වාහන අයිති කාටද කියලා සොයනවා. අපි කියන්නේ ඔය මුහුණුපොතේ තියෙන කතාව නිසා අපේ සභාවට අපකීර්තියක් වෙනවා කියලයි. ෆේස්බුක් සටහන් සහ ඡායාරූප අයින් කරලා අපේ ප්‍රකාශ සමඟ පළ කරන්න කියලත් කිව්වා. ඔය වාහන ජනතාවගේ බදු මුදල්වලින් ගත්ත ඒවා , මානව හිමිකම් යනවා කියලත් දසුන් කිව්වා. පොලිසියට පැමිණිලි කළේ අපට වුණු අගතිය ඉවත් කර ගැනීමටයි. මේ ගැන සමථයකට පත්වන්න පුළුවන් නිවැරදි කරුණුත් සමඟ මුහුණුපොතේ යළිත් පළ කරන බවට එකඟවෙලා එය කළොත් විතරයි.”
 |
| දසුන් විසින් මුහුණුපොතේ පළ කළ දිරාපත් වෙමින් තිබෙන වාහන |
උප සභාපති නිලන්ත ප්‍රදීප් කුමාර මෙසේ සඳහන් කළේය.
“දසුන් මුලින්ම ප්‍රාදේශීය සභාවට ආවේ මා සමඟයි. ඔහු මගේ ඥාතියෙක්. දිරාපත් වන වාහන පිළිබඳ සභාවට යෝජනාවක් දාන්න කියලා ඔහු අපිට කියලා නැහැ. ඔහු සමඟ මගේ පෞද්ගලික අමනාපයක් නැහැ. ”
මීගහතැන්න පොලිස් ස්ථානාධිපති ආරියරත්න මහතා පැවසුවේ ලබන 21 වැනි සඳුදා මේ සිද්ධිය පිළිබඳ විභාග වන බවයි. යම් ආයතනයක සිදු වන නාස්තියක්, දූෂණයක් පිළිබඳ හෙළිකිරීම නඩු පැවරීමට තරම් කාරණාවක් වන්නේ කෙසේදැයි බොහෝ දෙනකු ප්‍රශ්න කරති. රාජ්‍ය ආයතනයට අවසර නැතිව ඇතුළු වීමෙන්, එහි දේපළ ඡායාරූපගත කිරීමෙන් දසුන් කර ඇත්තේ වරදක් නම් එය අධිකරණය දක්වා යා හැකි වරදක්ද? මේ සියලු කරුණු කාරණා ගැන ජනතාව අවදියෙන් සිටිති.
