පිළිතුරු සැපයීම - කායික රෝග විශේෂඥ වෛද්‍ය වරුණ ගුණතිලක
වියපත් මවට පෝෂණ අතිරේක අවැදගත්ද?
ප්‍රශ්නය :- මගේ මව 80 හැවිරිදි නිර්මාංශ ආහාර ගන්නා අයෙකි. ඇයට අධි රුධිර පීඩනය සහ වෘද්ධභාවය හේතුවෙන් ඇති වන ආබාධ හැරුණු කොට සැලකිය යුතු මට්ටමේ රෝගයක් නැත. මාස 3 කට වරක් ඇයව කායික රෝග විශේෂඥ වෛද්‍යවරයකුට පෙන්වමි. වෛද්‍යවරයා විසින් ඇයට ප්‍රෝටීන් වැඩි ප්‍රමාණයක් අඩංගු කිරිපිටි වර්ගයක් නිර්දේශ කළ අතර වසර 2කට ආසන්න කාලයක් පුරා එය පාවිච්චි කරයි. එහෙත් මෑතක හදිසියේ සාමාන්‍ය වෛද්‍යවරයකුගෙන් මවට ප්‍රතිකාර ගැනීමට සිදු විය. එහිදි ඔහු පැවසුවේ මව පානය කරන විශේෂ කිරිපිටි වර්ගය නවත්වන ලෙසයි. අනවශ්‍ය ආකාරයේ ශක්තියක් සිරුරට ලබා දීමෙන් ශක්තිය පිට කර ගැනීමට නොහැකිව සි‍රුරේ වේදනාවක් ඇති වන බව ඔහුගේ අදහස විය. එහෙත් කායික රෝග විශේෂඥ වෛද්‍යවරයා එය නිර්දේශ කළේ වයස්ගත වීමේදී ආහාර ජීරණය සඳහා අවශ්‍ය එන්සයිම ක්‍රියාකාරිත්වය අඩපණ වන හෙයින් ආහාරවලින් සම්පූර්ණ පෝෂණය නොලැබීම නිසා දියර වර්ගවලින් පෝෂණය ලබා දීම වැදගත් වන බව පැහැදිලි කරමිනි. වෛද්‍යවරුන් දෙදෙනාගේ මත 2ක් නිසා අසීරුතාවට පත් වී සිටිමි. වෛද්‍ය උපදෙසක් බලාපොරොත්තු වෙමි.
ගම්පහ - අනුරාධා හේමමාලි ගුණසිංහ
පිළිතුර :- වියපත් වීමත් සමඟ ජීව විද්‍යාත්මකව වෙනස්කම් සිදුවීම සාමාන්‍ය දෙයකි. නින්ද, ආහාර ජීරණය, හෘද ක්‍රියාකාරීත්වය වයස්ගත වීමේදී වෙනස් වේ. ආහාර ජීරණ පද්ධතියේ වෙනස්කම් සමඟ සිරුරට අවශ්‍ය පෝෂණ අවශ්‍යතා සපුරාලීම වර්තමානයේ පෝෂණවේදින්ගේ අභියෝගයකි. වයෝවෘද්ධ අය ආහාර ගන්නේ ඉතා අඩුවෙනි. එබැවින් දෛනිකව අවශ්‍ය වන පෝෂණ පදාර්ථ දියර වර්ගවලින් ලබා ගැනීම සුදුසුය. ජීව විද්‍යාත්මක වෙනස්කම්වලට මුහුණදීම සඳහා සාන්ද්‍රණයක් ලෙස සිරුරට ගැළපෙන ආකාරයට පෝෂණ අතිරේක ලබා ගැනීමේ වරදක් නැත. මෙහිදි ඔබ මවට ලබා දෙන කිරිපිටි වර්ගය නිසි ප්‍රමිතියෙන් යුක්තදැයි සොයා බැලීම වටී. මන්ද ඇතැම් පෝෂණ අතිරේකවල ඒවායේ සඳහන් කර ඇති පෝෂ්‍ය පදාර්ථ නිසි පරිදි අඩංගු වී නොමැති නිසාය. ඒ හැර නිර්මාංශ ආහාර ගන්නා වියපත් මවට පෝෂණයෙන් යුතු කිරිපිටි වර්ගයක් දීමේ වරදක් නැත.
අධි රුධිර පීඩන පෙති මාරු කළ යුතුද?
ප්‍රශ්නය :- මම අධි රුධිර පීඩනයෙන් පෙළෙන 72 හැවිරිදි විශ්‍රාමික ගුරුවරයෙක්මි. මම වසර 12ක පටන් අධිරුධිර පීඩනය සඳහා නිෆිඩිෆින් ඖෂධය භාවිත කරමි. මෑතක පුතාගේ නිවසට ගිය අවස්ථාවක පුතාගේ වෛද්‍ය මිතුරකු මට පැවසුවේ නිෆිඩිෆින් දීර්ඝ කාලයක් පාවිච්චි කිරීමට නුසුදුසු බවයි. දීර්ඝ කාලීනව භාවිත කිරීම සඳහා ලොසාර්ටන් වර්ගයට අයත් ඖෂධයක් පාවිච්චි කළ යුතු බව ඔහු සඳහන් කළේය. මේ පිළිබඳව පැහැදිලි කිරීමක් බලාපොරොත්තු වෙමි.
මාතලේ - බන්දුල දිසානායක
පිළිතුර :- ඕනෑම ඖෂධයක් වෛද්‍යවරයකු ලබා දීමට තීරණය කරන්නේ කරුණු රාශියක් සලකා බැලීමෙනි. ලෙඩාගේ රෝගි තත්ත්වය, රෝගියා ලබා ගන්නා අනෙකුත් ඖෂධ වර්ග ඇතුළු කරුණු රාශියක් කෙරෙහි වෛද්‍යවරයා අවධානය යොමු කරනු ඇත. අනෙක, ඕනෑම ඖෂධයක් දීර්ඝකාලීනව භාවිත කිරීමේදී සුළු අතුරු ආබාධයක් හෝ ඇති විය හැකිය. ඔබ පවසා ඇති පරිදි අධිරුධිර පීඩනයට දෙන ඖෂධවල වෙනස්කම් තිබේ. සමහර ඖෂධ සිරුරට උරා ගන්නේ ඉතා සෙමෙනි. සමහර ඖෂධ ක්ෂණිකව ශරීරයට අවශෝෂණය වේ. එබැවින් එක් ඖෂධයක් හොඳ හෝ අනෙක් ඖෂධය නොහොඳ යැයි එක එල්ලේ පැවසිය නොහැකිය. ඔබේ රෝගි තත්ත්වය, පාවිච්චි කරන අනෙක් ඖෂධ වැනි කරුණු ගණනාවක් කෙරෙහි අවධානය යොමු කර ඔබේ වෛද්‍යවරයා ඔබට ඖෂධ නියම කර ඇති නිසා ඖෂධ පිළිබඳව උපදෙස් ලබා ගත යුත්තේ ඔබට ඖෂධ ලබා දුන් වෛද්‍යවරයාගෙනි.
රත කල්කය අත්‍යවශ්‍ය ද?
ප්‍රශ්නය :- මගේ දියණියගේ වයස මාස 7කි. ඇයගේ මුහුණ සහ අත් පා රත් පැහැ ගැන්වී තිබේ. අධික ලෙස දහදිය දමයි. සමහර අවස්ථාවල නොනවත්වා යටිගිරියෙන් හඬයි. දහදිය බිබිළි ද මතු වී තිබේ. මගේ මව පවසන්නේ දියණියට රත කල්කය දිය යුතු බවයි. එහෙත් රත කල්කය දීමට මගේ සැමියා කැමති නැත. දියණියට රෝගී තත්ත්වයක් තිබේද? එය කුඩා දරුවන්ගේ සාමාන්‍ය ස්වාභාවයද?
දොරටියාව - හිරුණි ශාක්‍යා විජේසිංහ
පිළිතුර :- ඔබේ දියණියව ළමා රෝග විශේෂඥ වෛද්‍යවරයකු වෙත හෝ චර්ම රෝග විශේෂඥ වෛද්‍යවරයකු වෙත යොමු කිරීම ඉතාමත් වැදගත් වේ. සමක ගැටලුවකට පරීක්ෂා කර බැලීමකින් තොරව පුවත්පතක් මඟින් පිළිතුරු ලබා දීම අසීරුය.
දත් දිරායෑම ගැටලුවක්
ප්‍රශ්නය :- මගේ පුතුගේ වයස අවු:16කි. පුතුගේ දත් දිරායෑම ඉතා වේගයෙන් සිදුවේ. පුතු ළදරු පාසල් යන කාලයේ පටන් දත් පිරවීම සිදු කළ අතර එක් දතක් පිරවීමට ගිය විට තවත් දතක් පිරවීමට සිදු විය. දන්ත විශේෂඥ වෛද්‍යවරයකුගෙන් පුතුගේ දත් දිරායෑම ගැන විමසූ විට ඔහු නිශ්චිත පිළිතුරක් දුන්නේ නැත. අඩුම වශයෙන් දත් දිරා යෑම රැක ගැනීම සඳහා විශේෂයෙන් පිළිපැදිය යුතු උපදෙසක්වත් දුන්නේ නැත. ඔබ දන්ත වෛද්‍ය විශේෂඥවරයකු නොවූවත් පුතුගේ දත් දිරායෑම වැළැක්වීමට වෛද්‍ය උපදෙසක් බලාපොරොත්තු වෙමි.
නොච්චියාගම - අනුෂා සිරිවර්ධන
පිළිතුර :- ඔබ පවසා ඇති ආකාරයට පුතුගේ දත් දිරායෑමට බලපාන විශේෂ හේතුවක් තිබිය යුතුය. මුඛ සෞඛ්‍ය පුරුදු, පෝෂණ ඌනතා හෝ වෙනත් හේතුවක් නිසා කුඩාවියේ පටන් දත් දිරා යෑම සිදු වන බවට අනුමාන කළ හැකිය. එබැවින් ඔබට ළඟම පිහිටි අනුරාධපුර ශික්ෂණ රෝහලේ දන්ත සායනයට පුතුව රැගෙන ගොස් නොපමාව දන්ත වෛද්‍යවරයකු හමුවී උපදෙස් ලබා ගත යුතුය.
