නිමිත්ත.....
හදිසි අනතුරට ලක්වී මොළය මියගිය
දරුවාගේ වකුගඩු දන්දුන් විට
ඒ මවට ඇතිවූ සිතුවිල්ල....
සංසාරයෙහි අග මුල නැතී
පිරුවාද නුඹ දන්පාරමී
මා ළයේ එල්ලී කිරි උරා
නුඹ කෙළිදෙලෙන් ඇති දැඩි වුණා
දැන උන්න නම් බෝසතෙකු වග
වැඳ වැටෙනවා දෙදනම ඔබා
වට වෙවී ආවත් මාරසෙන්කැළ
අතනෑර ආවා මෙතෙක් දුර
ඇසිපිය හෙළන්නට මොහොතකට පෙර
ගිලිහුණේ ඇයි මට නුඹේ අත
ලෝකය සොයා යන පාර මැද
කහ ඉරක් තිබුණේ නැතිද පුත
සසදා වතද මා දෑස අභිමුව
නුඹ මවා දුන්නේ පුතුනි මට
ඇතුගල පවා සසැලී ගියා
රළු පාරෙ සීතල වැතිරුණා
නිර්ලෝබවම නුඹ දෑස තදකොට
නොදොඩා කිසිත් නික්මී ගියා
අද නැතත් නුඹ මගෙ තුරුල්ලේ
උණුහුම පිරුණ නෙතු සදැල්ලේ
දරුපැටවු හිනැහෙන කැඳැල්ලේ
සෙනෙහස ගලයි ළැම ලවැල්ලේ
.
කේතුමතියේ ඉසුර විඳ
ලොව නිවන දා මේ සසර ඉම
නුඹගේම මව වී ඉඳින්නට
බෝසත් පුතුනි මා පතන්නද.
ප්රභාකුමාර රාජගුරු