මෙරට මාර්ග පද්ධතිය කෙතරම් වැඩිදියුණු කළද සිදුවන අනතුරු දිනෙන් දින වැඩි වනවා මිස කිසිදු අඩුවක් නැත. ඊට ප්රධාන ලෙසට බලපා ඇති බවට සංඛ්යා දත්තවලින් පෙන්නුම් කරන්නෙ රියැදුරන්ගේ නොසැලකිලිමත් රිය ධාවනයයි. මාර්ග නීති අනුගමනයකින් තොරව රිය ධාවනය ඊට ප්රධානය. මෙයට එරෙහිව නීතිය ක්රියාත්මක වන්නේ එම රියැදුරා කරන වරද පොලිස් නිලධාරියෙකුගේ ඇස ගැටුනහොත් පමණි.
පොලිස් නිලධාරියෙකු නොමැතිව වුවත් රියැදුරන් විසින් කරනු ලබන වැරැදි හඳුනා ගැනීමට නව නිර්මාණයක් අපේ රටේ තරුණයකු හදුන්වා දි ඇත. ATVI (Automated Traffic Violence Investigator) නමැති එම නිර්මාණයෙන් රියැදුරන් සිදුකරන වැරැදි රිය ධාවන පහසුවෙන් හදුනාගත හැකිය. මාතර, කඹුරුපිටියේ පදිංචි 27 හැවිරිදි අනුෂ්ක ඉඳුනිල් සමරතුංග තරුණයා එම නිර්මාණයේ මහමොළකරුවාය. කටුනායක ඉංජිනේරු තාක්ෂණ ආයතනයේ ඩිප්ලෝමාධාරියෙකු වන ඉඳුනිල් සිය නිර්මාණය ගැන අපට මෙසේ පැහැදිලි කළේය.
“මගේ ATVI උපකරණයෙන් ද්විත්ව ඉරි කැපීම, තනි ඉර කැපීම, කහ ඉරකදී අයෙක් මාරුවීමේදී රිය ධාවනය, වර්ණ සංඥා නොතකා ධාවනය, දුම්රිය මාර්ගයක් වසා තිබියදී ධාවනය වගේම වර්තමානයේ ක්රියාත්මක මංතීරු නීතියේ කරන වැරැදි හඳුනාගත හැකියි.මේ උපකරණය මාර්ගයේ යොදන සෙන්සර් ස්ටිකර් එකකින් සහ මාර්ගයට යාබදව රඳවන කැමරාවකින් සමන්විතයි. අපි හිතමු ද්විත්ව ඉරි තිබෙන ස්ථානයක් කියා. එම ද්විත්ව ඉරි මත මිලිමීටර් තුනක් උස ඉතා කුඩා සිහින් බටයක් අවශ්ය දිග ප්රමාණයට ද්විත්ව ඉරි මත එළනවා. ඒ බටය රබර්. ඒ තුළ ජලය රඳවනවා. ද්විත්ව ඉරි මත එම මිලිමීටර් තුනේ බටය එළීමට ප්රමාණවත් කුඩා කාණුවක් කැපිය යුතුයි. පසුව බටය වැසෙන්නට තාර ඉටි දමා එය වසා තබනවා. ඒ බටයේ ආරක්ෂාවට මෙන්ම මාර්ගයේ බටයක් අතුරා ඇති බව රියැදුරන්ට නොපෙනීමට. සාමාන්යයෙන් මීටර් 20 ක දුරක එම බටය එළිමට වැයවන්නෙ රුපියල් 200ක් වැනි මුදලක්. ඒ බටයේ කොනක සෙන්සරයක් රඳවනවා. බටය මතින් කිලෝග්රෑම් 150කට වැඩි බරක් ධාවනය වුණොත් රඳවා තිබෙන සෙන්සරයෙන් සංඥාවක් නිකුත් කරනවා. ඒ ආසන්නයේ රඳවා තැබෙන කැමරාවට.” අනතුරුව එම කැමරාවෙන් බටය මතින් යන රථයේ ඡායාරූප 30ක් පමණ ලබාගන්නෙ තත්පරයක පමණ කාලයකදි බව ඉඳුනිල් කීවේය.
අංශක 360 කට ක්රියාත්මක වන ඒ කැමරාවෙන් ලබාගන්නා ඡායාරූපවල දිනය, වෙලාව, රථයේ අංකය සියල්ලම සඳහන් වෙයි. පසුව එම ඡායාරූප තත්පර පහක් වැනි කාලයකදී ඉඳුනිල් විසින්ම නිර්මාණය කළ ගූගල් ඩ්රැයිව් එකක් මඟින් අදාළ අංශවලට හෝ ස්මාර්ට් ජංගම දුරකථනයකට හෝ ලබාගත හැක. එය මෙරට ඕනෑම පොලිස් ස්ථානයකට පමණක් නොව මාර්ගයේ රැඳී සිටිනා පොලිස් නිලධාරියකුගේ ස්මාර්ට් ජංගම දුරකථනයකට වුව ලබාගත හැකි අයුරින් සකසා ඇත.
එසේ ලබාගන්නා ඡායාරූප එවැනි වැරැදි කරන රියැදුරන්ට එරෙහිව නීතිය ක්රියාත්මක කිරීමට හොඳටම ප්රමාණවත් සාක්ෂියකි. ඡායාරූප ලබාගන්නා අතිසංවේදී කැමරාවද ඉඳුනිල් විසින්ම නිර්මාණය කරන ලද්දකි. මේ උපකරණ පද්ධතිය දිවා රෑ මෙන්ම ඕනෑම රස්නයකට, වර්ෂාපතනයකටද ඔරොත්තු දෙන ලෙස සකසා ඇත. එසේම මේ උපකරණ පද්ධතිය නිර්මාණය සඳහා වැය වන්නෙ රුපියල් විසිදහසක පමණ මුදලකි. එවැනි මුදලකින් මෙය නිර්මාණය වූවත් මෙවැනි පද්ධති දියුණු රටවල රුපියල් කෝටි ගණනින් වැයකොට නිර්මාණය කර ඇත.
මේ වන විට ඉඳුනිල් මේ උපකරණ පද්ධතිය මෙරට පොලිස් ස්ථාන කිහිපයක් සමඟම අත්හදා බැලීමක් කර ඇත. එම අත්හදා බැලීම්වලදී මෙහි සාර්ථකත්වය මනා ලෙස පිළිබිඹු වී තිබේ. එසේම මේ දිනවල රූපවාහිනි නාලිකාවක විකාශය කෙරෙන නව නිර්මාණ තරගාවලියක ඉදිරියටම යන නව නිර්මාණයක් ලෙසද මෙය සැලැකේ. මේ උපකරණය වගකිවයුත්තන්ගේ අවධානය යොමු වී රටේ සිදුවන මාර්ග අනතුරු අවම කරගැනීමට භාවිතයට ගැනීමට හැකියාව තිබේද යන්න හෝ සොයා බැලීම වගකිවයුතු සැමගේ යුතුකමකි. එසේ නොමැතිව මෙවැනි තරුණයන් කරන නිර්මාණ නිරපරාදේ කිසිදු ඇගැයීමකට ලක්නොකර බැහැර කිරීම මහත් අපරාධයකි.
මේ තරුණයා මීට පෙරද මෙරට අලි-මිනිස් ගැටුම පාලනයට මනා අලි වැටක්ද නිර්මාණ කළ අයෙකි. ඒ පිළිබඳවද සිළුමිණ පුවත්පතින් අනාවරණය කළත් අඩුම තරමේ එම අලි වැට අත්හදා බැලීමට හෝ අවස්ථාවක් ලබා දීමට තරම් වගකිවයුත්තන් කාරුණික නොවීය.