මිනිස් සිතුම්-පැතුම් හා තාක්ෂණය අතර පරතරය දිනෙන් දින වඩාත් තුනී වෙමින් පවතී. ඒ මොහොතින් මොහොත වෙනස් වෙමින් පුළුල් වෙමින් පවතින තාක්ෂණය හා වඩාත් සමීපව කටයුතු කිරීමට මිනිසා සතුව ඇති නොහිම් ආශාව නිසාමය. තාක්ෂණික ලෝකයේ අනාගතය රඳා පවතින්නේද, තාක්ෂණය කෙරෙහි මිනිසාගේ ඇති ඒ දැඩි ඇල්ම නිසාය. අද අප කතා කිරීමට සැරසෙන 5G තාක්ෂණයද මිනිසා හා තාක්ෂණය අතර සබඳතාව තර කරගැනීමේ ලද නව ජයග්රහණයක් සේ සැලකේ. 5G තාක්ෂණය 2020-21 වන විට ලොව පුරා ව්යාප්ත කිරීමට සියල්ල දැන් සූදානම්ය.
5G යනු ජංගම දුරකතන සන්නිවේදනයේ 5 වන පරම්පරාවයි (5th Generation). එය හුදු දුරකතන ඇමතුමක් පමණක් ගත හැකිව තිබූ ජංගම දුරකතනය මිනිස් ජීවිතයේ සමීපතම හිතවතා ලෙස පරිවර්තනය කළ තාක්ෂණික විප්ලවයේ අලුත්ම පරිච්ඡේදයයි. මුල් ඇනලොග් දුරකතන සේවාව හැඳින්වුණේ 1G (1st Generation) වශයෙනි. පසුකාලීනව ඇමතුම්වලට අමතරව කෙටි පණිවිඩ සේවාව හඳුන්වා දෙමින් 2G සම්ප්රාප්ත විය. වසර 2001දී හඳුන්වා දුන් 3G තාක්ෂණය, ජංගම දුරකතනයෙන් අන්තර්ජාලයට පිවිසීමට මඟ විවර කරමින් 20 සියවස දුරකතන තාක්ෂණයේ නව ඇරඹුමක් සටහන් කළේය. එහෙත් 3G තාක්ෂණය ඔස්සේ දත්ත සඳහා ප්රවේශ වීමට හැකි වූයේ තත්පරයට මෙගා බයිට් එකක වේගයකිනි. GPRS, EDGE වැනි තවත් අතරමැදි අවස්ථා ගණනක් පසු වසර 2010 දී තත්පරයට මෙගා බයිට් 100ක වේගයක් ගෙන දෙමින් 4G තාක්ෂණය ලොවට බිහි විය. මේ සියල්ල අබිබවා ඉදිරියේදී ව්යාප්ත වීමට නියමිත 5G තාක්ෂණය මෙතෙක් භාවිත සෑම ජංගම දුරකතන තාක්ෂණයකට වඩාම ඉතා වේගවත්ය.
5G තාක්ෂණයේ කැපී පෙනෙන්නේ අධික දත්ත සම්ප්රේෂණ වේගයයි. මෙතෙක් තත්පරයට මෙගා බයිට් ලෙසින් දැක්වූ බාගත කිරීමේ වේගය තත්පරයට ගිගා බයිට් ලෙස 5G ඔස්සේ වෙනස් වේ. එය 4G තාක්ෂණයට වඩා දස ගුණයක සිට සිය ගුණයක් දක්වා වැඩි වේගයකි. 4G තාක්ෂණයේදී පණිවිඩයක් හුවමාරු කරගැනීමට ගත වන මිලි-තත්පර 30-70 අතර කාලය 5G යටතේ මිලි-තත්පර 1කට වඩා අඩුය. 4G තාක්ෂණයට වඩා අඩු පොරොත්තු කාලයක් (Low Latency) නිසා IoT (Internet of Things) උපාංගවලට එනම්, රූපවාහිනී, විදුලි පහන්, ශීතකරණ ආදි සියල්ල අන්තර්ජාලය ඔස්සේ එකිනෙක සම්බන්ධිත, දූරස්ථව පාලනය කළ හැකි අන්දමින් සැකැසුණු පද්ධතිවල ක්රියාකාරිත්වයට මෙමඟින් විශාල පිටිවහලක් සැලසෙයි. එමෙන්ම අන්තර්ජාලය හරහා ලබා දෙන විධානවලට සේවා ජාලයෙන් ප්රතිචාර ලැබීමේ කාලය ද අවමය. 5G තාක්ෂණයෙන් රොබෝ තාක්ෂණය, දූරස්ථ ශල්යකර්ම, ස්වයංක්රීය ප්රවාහනය සහ විනෝදාස්වාදය වැනි ක්ෂේත්රයන්හි විශාල ප්රගමනයක් දැකගත හැකි වනු ඇත. 5G භාවිතයෙන් කළ පළමු ශල්යකර්මය චීනයෙන් වාර්තා විය.
5G නිසා සැහැල්ලු පරිගණක ක්රීඩා පමණක් නොව, වැඩි පරිගණක කාර්යක්ෂමතාවක් වැය වන දියුණු පරිගණක ක්රීඩාද අන්තර්ජාලය ඔස්සේ ක්රීඩා කිරීමට දැන් කටයුතු සම්පාදනය වේ. එමඟින් අන්තර්ජාල වීඩියෝ ක්රීඩා ස්ට්රීමින් සේවාවලට හොඳ කල-දවසක් උදා වනු ඇත. දැනට අමෙරිකාව, කොරියාව, චීනය වැනි රටවල් මේ නව සම්ප්රේෂණ විප්ලවයේ ඉදිරි පෙළ නියෝජනය කරයි. ඉදිරි වසර කිහිපයේදී 5G ලොව පුරා තම ආධිපත්යය පතුරවනු ඇත.
5G තාක්ෂණයට භාවිත කෙරෙන සංඛ්යාතයෙන් ඉහළ, තරංග ආයාමය අඩු තරංග දත්ත සම්ප්රේෂණයෙහිලා විශිෂ්ට හැකියාවක් ඇති කරන මුත්, මේ තරංග සම්ප්රේෂණය ආවරණය කළ හැකි වපසරිය ඉතා අවමය. මේ නිසා පෙර එක් 4G සම්ප්රේෂක කුලුනක් මඟින් ආවරණය කළ නගරයක් 5G තාක්ෂණයෙන් ආවරණය කිරීමට නම් කුඩා ප්රමාණයේ සම්ප්රේෂක ගණනාවක් නගරයේ තැනින් තැන සවි කිරීමට සිදු වේ. 5G තාක්ෂණයට මෙසේ ලහි-හියේ ලක-ලැහැස්ති වුණද 4G තාක්ෂණික උපාංගවලින් 5G හා ගනුදෙනු කළ නොහැකිය. මේ සියල්ල අත්විඳින්න නම් 5G පහසුකම් සහිත දුරකතනයක් හෝ රවුටරයක් වැනි උපාංගයක් අත්යවශ්ය වේ.
5G තාක්ෂණයට විශාල දත්ත, දැනුම හා ඒකාබද්ධතාව ගෙන දෙන්නේ AI සමඟය. එසේ බැලුවොත් මිනිසා දැන් ස්මාර්ට්ෆෝන් තාක්ෂණය ඔස්සේ AI හෙවත් කෘත්රිම බුද්ධියේ කොටසක් බවට පත්ව ඇත. Generation හෙවත් G අකුරට පෙර ඇති ඉලක්කම මෙසේ වැඩි වත්ම සිදු වන දුරකතන තාක්ෂණයේ පුළුල් බව සිතා සැබැවින්ම සතුටු විය හැකිද? මෙය මිනිස් ශරීරයට මෙන්ම සත්ත්ව ශරීරයට හිතකර වේද?
ඉදිරි වසර කිහිපයේ දී 5G නිසා දුරකතන තාක්ෂණය නව මඟකට යොමු වනු ඇතැයි විද්යාඥයන් උදම් අනද්දී එය මිනිසාට මෙන්ම පරිසරයටද විශාල බලපෑමක් කරනු ඇතැයි ලොව පුරා තැනින් තැන කතා බහ ඉස්මතු වෙයි. එහෙත් ඒ කතාබහ යටපත් කිරීමට මේ තාක්ෂණය ලොව පුරා ව්යාප්ත කිරීමට පෙරමං බලා සිටින බොහෝ දෙනා විවිධ උදාහරණ ගෙන හැර පාති.
ඔවුන්ට අනුව 5G ලොව පහළ වන්න පෙරත් රූපවාහිනී සහ රේඩියෝ කිරණ, WiFi, 3G, 4Gවලින් පිට වන කිරණවල බලපෑමක් කෙරෙහි ලොව පුරා භීතියක් පැතිර තිබිණි. චන්ද්රිකා මඟින් පෘථිවියට එන සංඥාවලින්, මයික්රෝවේව් උඳුනෙන්, රූපවාහිනිය හෝ CRT මොනිටරය ඉදිරියේ සිටීමෙන්ද එකී කිරණවල බලපෑමට හසු වන බවට පැතිරුණු බිය කොතරම් දුර-දිග ගියාදැයි කිවහොත්, විද්යුත්-චුම්බක අධිසංවේදීතාව (Electromagnetic hypersensitivity) නමින් මනඃකල්පිත රෝග තත්ත්වයක්ද ඇති වූ බව ඔවුහු පවසති. එහෙත් Blue tooth, 3G, 4G,WiFiවලින් මෙතෙක් ලොව වසාගත් විකිරණ විශාල ප්රමාණ අතරට අලුතෙන්ම එන 5G දුරකතන විකිරණ මිනිස් ජාන මෙන්ම සත්ත්ව ජානද වෙනස් කිරීමට හැකි බව පැවවේ.
වරෙක කැලිෆෝනියා සරසවියේ ආචාර්යවරයකු පැවසුවේ මිනිස් මොළයේ වම් - දකුණු දෙපසටම 4G තරංගවලට බලපෑම් කළ හැකි බවයි. 2011 CDMA තරංග (2G සහ 3G) යොදාගෙන කළ පර්යේෂණයක දී විනාඩි 50ක් දුරකතනය මොළයට ආසන්නව පැවති ස්ථානවලට බලපෑම් ඇති වූ බවත්, නව LTE (4G) පර්යේෂණයේදී විනාඩි 30ක් තරම් කෙටිකාලීන නිරාවරණයකින් මොළයේ ක්රියාකාරිත්වයට බාධා එල්ල වූ බවත් දිගුකාලීන භාවිතයෙන් හිසේ සහ ගෙලෙහි පිළිකා, ශුක්රාණු හානි සහ ප්රජනන පද්ධතිවලටද බලපෑම් එල්ල විය හැකි බවත් ඔහු පෙන්වා දෙයි. මේ නිසා දරුවන් හා ගැබිනි මවුවරුන් මින් ඉවත්ව සිටිය යුතු බව ආචාර්යවරයා වැඩිදුරටත් පවසයි.
3G, 4G පිළිබඳ එසේ විවිධ පර්යේෂණ සිදුව තිබුණත්; 5G පිළිබඳ මෙතෙක් සවිස්තරාත්මක පර්යේෂණයක් සිදුව නැත. එහෙත්, අඩු සංඛ්යාත පරාසයක් ඇති 2G, 3Gවලින් පවා සිරුරට බලපෑම් ඇති විය හැකි නම්, ළඟ-ළඟ ගොඩනැගිලි මත ඉදි විය යුතු කුඩා සම්ප්රේෂණ කුලුනුවලින් පිට වන තරංගවලට නිරාවරණය වන ප්රමාණය පිළිබඳ කවර කතාද? අප කළ යුත්තේ මේ කතා අසා තාක්ෂණයට බිය වී එයින් ඉවත් වීම නොව, ආරක්ෂිතව තාක්ෂණයේ නිම්වළලු පුළුල් කරමින් භාවිතය සඳහා තිරසර ක්රමවේදයකට අවතීර්ණ වීමයි.