පොලිස් වලාන දූෂණ මර්දන ඒකකයපසුගිය ඉරිදා (01)අත්අඩංගුවට ගත් තිස්පස් හැවිරිදි රත්නකුමාර් ෂර්මිලා හෙවත් ෂර්මි කුමාර් නමැති කාන්තාව ගෝත්රික යුගයේ කාන්තාවක ලෙස මෑත කාලයේ හැසිරෙන ආකාරයක් දිස්විණි. සමාජ මාධ්ය ඔස්සෙ ආන්දෝලනාත්මක ප්රකාශ කරමින් සමාජයේ බොහෝ දෙනාගේ කතාබහට ලක් වූ කාන්තාවකි ඇය. සමාජ මාධ්ය අතර ඉහළ ජනප්රියත්වයක් හිමි යූ ටියුබ් නාලිකා ඔස්සේ ෂර්මි කුමාර් විටෙන් විට ආන්දෝලනාත්මක ප්රකාශ නිකුත් කරමින් කරළියට පැමිණියේ කාන්තා පරපුරටම නිග්රහ වන ආකාරයෙනි.
සමාජ මාධ්ය ඔස්සෙ කිසිදු සභ්යත්වයකින් තොරව අසභ්ය වචන පවසමින් ෂර්මි ඍජුවම ප්රකාශ කළේ ඇය ගණිකාවක බවයි. මීට වසර දහයකට පමණ පෙර මෝස්තර නිරූපණ ශිල්පිනියක ලෙස නිරූපණ ක්ෂේත්රයේ ඉදිරියට පැමිණි ඇය, 2015 වසරෙන් පසු තමා ගණිකාවක යැයි ප්රසිද්ධියේ පවසමින් ආන්දෝලනාත්මක චරිතයක් බවට පත්වූවාය.
මීට වසර තුනකට පමණ පෙරදී වත්තල හේකිත්තෙ ප්රසිද්ධ විහාරස්ථානයකට ආසන්නව අන්ද්රියානා නමින් රූපලාවණ්යාගාරයක් ආරම්භ කළ ඇය එහි රූපලාවණ්ය කටයුතුවලට මුවාවෙන් කාන්තාවන් මුදලට විකිණීමේ ගණිකා මඩමක්ද පවත්වාගෙන ගොස් ඇති බව හෙළි වී තිබේ. පසුගිය ඉරිදා එම ස්ථානය වැටලූ වලාන දූෂණ මර්දන ඒකකයේ නිලධාරීහු ෂර්මි සමඟ තවත් කාන්තාවන් දෙදෙනෙකු අත්අඩංගුවට ගත්හ. ඒ, කාන්තාවන් මුදලට විකිණීමේ ජාවාරමක් සිදු කරමින් සිටියදීයි.
වසර තුන හතරක සිට ෂර්මි ගැන සමාජයේ බොහෝ දෙනෙකු කතා වුවත් ඇයට එරෙහිව කිසිදු බලවේගයක් ක්රියාත්මක නොවූයේ මන්ද යන්න තිබෙන්නෙ ප්රහේලිකාවකි. එහෙත් වලාන දූෂණ මර්දන ඒකකයේ අධ්යක්ෂවරයාට ඉකුත් දිනෙක ලැබුණු ලිඛිත තොරතුරකින් කියැවුණේ සමාජයට හානිදායක වන වීඩියෝ දසුන් අන්තර්ජාලයට මුදාහැර පුද්ගලයන් ලිංගික ක්රියාකාරකම් සඳහා පොලඹවා ගනිමින් මුදල් ගරාගැනීමේ ජාවාරමක එම කාන්තාව නිරත වන බවයි. ඊට අමතරව එම තොරතුරේ අදාළ රූපලාවණ්යාගාරයට මුවාවෙන් කාන්තාවන් මුදලට විකිණීමේ ජාවාරමක්ද සිදු කරන බවටද සඳහන් කර තිබිණි.
ඒ අනුව පසුගිය මස 24 වැනිදා උපාය දූතයෙකු ලෙස වෙස් ගැන්වුණු වලාන දූෂණ මර්දන ඒකකයේ නිලධාරියෙකු අන්ද්රියානා රූපලාවණ්යාගාරය සොයා ගියේය. එදින උපාය දූතයා එම ස්ථානයට යන විටත් ෂර්මි කුමාර් රූපලාවණ්යාගාරයේ සිටියාය. ඇය සමඟ සිය අවශ්යතාව කතිකා කරගනිද්දී ෂර්මි කුමාර් පැවැසුවේ,
“මා ළඟ බඩු ඕනෑ තරම් ඉන්නවා. ඔයාට මොන වගේ කෙනෙක්ද ඕනෙ... වයස අඩු කෙනෙක්ද... වැඩි කෙනෙක්ද... නැත්නම් උස මහත... කෙට්ටු ඕනෑ ජාතියක අය මගේ ළඟ ඉන්නවා...“ඒ ෂර්මි කුමාර්ගේ භාෂාවයි. එසේම ඇය තවදුරටත් කියා තිබුණේ,
“ඔයා ඕනෑ වේලාවක එන්න... දැන් ගන්නවා නම්... දැන්ම තිස්දාහක් දෙන්න... මෙහේදි ඕනෑ නම් ඒකත් පුළුවන්... හැබැයි ඉඩකඩ නම් මදියි... ඕනෑ නම් පිටතටත් අරන් යන්න පුළුවන්... කිසි ප්රශ්නයක් නෑ... මට සල්ලි විතරයි ඕනෙ...“
ඇය සිය ජංගම දුරකතන අංකයද උපාය දූතයාට දී නැවත පැමිණෙන විට ඇමැතුමක් ගෙන පැමිණෙන ලෙසටද දැන්වීය. එවිට අවැසි කාන්තාව රස්තියාදුවකින් තොරව ලබාගැනීමට හැකි බවද ඇය කීවාය.
“හරි... මිස්... මං ලබන ඉරිදා උදේ දහය වෙනකොට එන්නම්... හැබැයි මගේ තව යාළුවෙක් සමඟයි එන්නෙ... මට හොඳ ලස්සන... වයස අඩු තරුණියෝ දෙන්නෙක් ඕනෙ...
“අයියෝ සුළු දෙයක්නෙ... ඔයා එන්න...
ඒ ෂර්මි කුමාර් වත්තල හේකිත්තෙ රූපලාවණ්යාගාරයේ පසුගිය වසර කීපය පුරාවටම සිදු කළ කාන්තාවන් මුදලට විකිණීමේ ජාවාරමේ ස්වභාවයයි.
ඒ අනුව පොලිසිය සූදානම් වූයේ පසුගිය පළමු වැනිදා (ඉරිදා) වැටලීම සිදු කිරීමටයි. ෂර්මි ගෙවී ගිය දින කීපයේම උපාය දූතයා අමතා විමසා තිබුණේ පැමිණෙන දිනය සහ වේලාවයි. එසේම ඇය අන්තර්ජාල දුරකතන මාර්ගයෙන් කාන්තාවන් කිහිප දෙනෙකුගේම ඡායාරූපද උපාය දූතයාට එවා තිබුණේ අවැසි කාන්තාව තෝරා ගැනීමටයි. ෂර්මිට කිසිදු සැකයක් නොවන පරිදි සියල්ල සැලැසුම් කළ උපාය දූතයා එම ඡායාරූප කීපයෙන් දෙදෙනෙක් තෝරාගෙන ඇයට දැන්වූවාය.
වැටලීම සිදු කළ දින වලාන දූෂණ ඒකකයේ සෙසු නිලධාරීන්ද කැටුව ගිය උපාය දූතයා මුලින්ම රූපලාවණ්යාගාරයට ගොස් ෂර්මි හමු වූයේ අදාළ ගනුදෙනුව සඳහායි. ඇය ඒ මොහොතේ රුපියල් තිස්දහසක මුදලක් ඉල්ලා තිබුණේ එක් කාන්තාවක් මුදලට විකිණීම වෙනුවෙනි. ඒ අනුව උපාය දූතයාද රුපියල් විසිදහසක අත්තිකාරම් මුදලක් ගෙවා අවශ්ය තරුණියද තෝරාගත්තේය.
එසේ ගනුදෙනුව සිදු වෙද්දී ක්ෂණයකින් කඩාපැන්නෙ වලාන දූෂණ මර්දන ඒකකයේ නිලධාරි කණ්ඩායමයි. පොලිසියට තමන්ගේ කූට ජාවාරම කොටුවූ බව දත් ෂර්මි, තමාගේ සුපුරුදු අසභ්ය වාග් ප්රහාරය එල්ල කරමින් නිලධාරින්ට කීවේ,
“මං මේ සමාජීය අවශ්යතාවක් කරන්නෙ... මං වරදක් කරන්නෙ නෑ... ඕනෑ කෙනෙකුට ඕනෑ දෙයක් කරන්න අයිතියක් තියෙනවා... මේවා නීතිගත කරන්න ඕනෑ...“ යනුවෙනි. ෂර්මි සමඟ එදින රූපලාවණ්යාගාරයේ මුදලට තම සිරුර විකිණීමට සිටි කළුතර සහ වැල්ලම්පිටිය පෙදෙස්වල වයස අවුරුදු විසිදෙකක සහ තිස්හතරක තරුණියෝ දෙදෙනෙක්ද අත්අඩංගුවට ගනු ලැබූහ. අනතුරුව තිදෙනා වත්තල මහේස්ත්රාත්වරයා වෙත ඉදිරිපත් කිරීමෙන් පසු ලබන 09 වැනිදා දක්වා රිමාන්ඩ් බාරයට පත් කිරීමට නියෝග කෙරිණි.
ෂර්මි වරක් යූ ටියුබ් වීඩියෝ නාලිකාවක සම්මුඛ සාකච්ඡාවකදී පවසන්නෙ තමන් නීතියට කොටු වී අධිකරණයකට ඉදිරිපත් කළහොත් ගණිකා වෘත්තියේ සියලු රහස් හෙළි කරන බවයි. එහෙත් ඇයට පවසන්නට තිබෙන්නෙ කුමක් ද? ගණිකා වෘත්තිය යනු උස් පහත් බේදයකින් තොරව කවුරු කළද මෙරට තුළ නීතියෙන් වරදකි.
කොළඹදී උපන් ෂර්මි, පිරිමින් සමඟ කරන කියන ක්රියාකාරකම් ගැන ප්රසිද්ධියේ කතා කරයි. ෂර්මි කුමාර් නමැත්තිය පමා වී හෝ අත්අඩංගුවට ගෙන නීතිය ක්රියාත්මකකොට ඇයට නිසි දඬුවම් පමුණුවන්නා සේම ඇයව පුනරුත්ථාපනය කළ යුතු කාන්තාවක බව කාගේත් මතයයි. ෂර්මි කුමාර් කරන කියන දේ ගැන සමාජයේ විවිධ මත තිබේ. ඇතැමෙකු ඇය අනුමත කරද්දී බහුතරයක් ඇය දැඩි දෝෂදර්ශනයකට ලක් කරන්නෙ මෙරට සභ්යත්වය කෙලෙසන කාන්තාවක ලෙසිනි.
ෂර්මි කුමාර් අත්අඩංගුවට පත්වීමත් සමඟ වත්තල, හේකිත්තේ ඇයගේ රූපලාවණ්යාගාරය පිහිටි අවට බොහෝ දෙනා අපට කීවේ, එම ස්ථානය පසුගිය සමයේ බලපත්ර ලැබූ ගණිකා නිවාසයක් සේ පවත්වාගෙන ගිය බවකි.
“අපි පහුගිය කාලේ බොහෝ වගකිවයුතු අංශවලට මේ ගැන පැමිණිලි කළා. ඒත් කිසිම වැඩක් වුණේ නෑ. ඔය කාන්තාවට රටේ බොහෝ දේශපාලනඥයන්, නළුනිළියන්, වගේම ප්රභූ පුද්ගලයන් සමඟ සමීප සම්බන්ධකම් තිබුණා... රැයක්... දවාලක් නෑ... ප්රසිද්ධියේ මිනිස්සු එන්නෙ... ඇත්තටම පමාවෙලා හෝ වලාන දූෂණ මර්දන අංශයෙන් ඔය කාන්තාව අත්අඩංගුවට ගැනීම ගැන අපේ ප්රශංසාව හිමි වෙනවා..“ අසල වෙළෙඳසලක් පවත්වාගෙන යන නම කීමට අකැමැති පුද්ගලයකු
කියූ කතාවයි ඒ.