පොලිස් නිලධාරීන්ගේ නොහොබිනා හැසිරීම් නිසා මහජනයාට විඳින්ට වූ තාඩන-පීඩන ගැන ඉකුත් කාලයේ බොහෝ සෙයින් වාර්තා විණි. අතළොස්සක් වන එවැනි නිලධාරීන් නිසා මුළු පොලිස් දෙපාර්තමේන්තුවම විඳින්නෙ අවමානයකි. එවන් පොලිස් නිලධාරීන්ට එරෙහි නීතිය අකුරටම ඉටු කර හෝ පොලිස් දෙපාර්තමේන්තුවේ ගෞරවය ආරක්ෂා කිරීම නීතිය හා සාමය ආරක්ෂා කිරීමට කැප වී සිටින අවංක නිලධාරීන්ගේ වගකීමයි. එසේ නීතියට පිටින් ගොස් තරුණ යුවළකගෙන් කප්පමක් ගැනීමට යෑමෙන් පොලිස් නිලධාරීන් තිදෙනෙකුට වැඩ වැරදුණේ බස්නාහිර පළාත් දකුණ අපරාධ කොට්ඨාසයේ නිලධාරීන් නීතිය අකුරටම ඉටු කළ හෙයිනි. මේ ඒ කතාවයි.
රමේෂ් වයස අවුරුදු තිහක් පමණ වන අහංගම ප්‍රදේශයේ තරුණයෙකි. මව පිළිකාවකින් පෙළෙන හෙයින් ඇය දිනපතාම පාහේ මහරගම පිළිකා රෝහලට රැගෙන යා යුතු නිසා රමේෂ් සිය මව සහ එකම සහෝදරයා සමඟ මීගොඩ ප්‍රදේශයේ ඇනෙක්සියක විසුවේය. මව මහරගමට ගෙන යා යුතු හෙයින් රමේෂ් කුලී රථ ආයතනයකින් මෝටර් රථයක්ද කුලියට ගෙන තිබිණි. ඔහු එම රථයෙන් 'හයර්' දුවමින් ගතමනාවක්ද සොයාගත්තේය.
මාලඹේ, තලාහේනේ වෙසෙන සෙව්වන්දි, රමේෂ්ට හමු වන්නෙ මීට වසර තුනකට පෙරදීය. පෙමින් වෙළෙන දෙදෙනාගේ පෙම් පලහිලව්ව කිසිවෙකු දැන සිටියේ නැත. ඉගෙනීම් කටයුතුවල නිරත වන සෙව්වන්දි වැඩිදුර අධ්‍යාපනයට මැලේසියාවට යෑමට බලාපොරොත්තුව සිටියාය. ඒ පසුගිය තුන්වැනිදායි. විදේශගත වීමට සිටින තම පෙම්වතියට ත්‍යාගයක් දීමට සිතූ රමේෂ්, සෙව්වන්දිට ඇමැතුමක් ගෙන කීවේ, පසුගිය දෙවැනි දා සවස් යාමයේ මහරගමට එන ලෙසයි.
එදින මහරගමදී හමුවූ දෙදෙනා බෙල්ලන්විල පන්සලටද ගියහ. පසුව බොරලැස්ගමුව සුපිරි වෙළෙඳසලකින් සෙව්වන්දිට අවැසි කළමනා මිලට ගෙනදීමටද රමේෂ් අමතක නොකළේය. අනතුරුව දෙදෙනා බොරලැස්ගමුවේ සිට පිළියන්දල දෙසට ගොස් මෑතකදී ඉදි කළ අතුරු මාර්ගයක රථය නතර කර රථය තුළටම වී කතාබස් කරමින් සිටියහ. 
වේලාව සවස හතට ආසන්න වී තිබිණි. අඩ අඳුරේ නවතා තිබෙන රථය දෙසට විදුලි පන්දම් එළියක් එල්ල කරමින් පොලිස් නිලධාරීන් පිරිසක් රථය අසල සිටින අයුරු රමේෂ් දුටුවේය. බියට පත් වූ රමේෂ් සහ සෙව්වන්දි සැණෙන් රථයෙන් බැසගත්හ. පොලිස් නිල ඇඳුම්ලා සිටි පිරිසේ සිටි කොස්තාපල්වරයෙකු සේ පෙනුණු අයෙක් ඉදිරියට ආවේය.
“ මොනවද මෙතැන කරන්නෙ... අනාචාරයේ හැසිරෙනවානේ... දෙන්නම පොලිසි අරන් යන්න වෙනවා... උසාවියෙන් තමයි බේරගන්න වෙන්නෙ“
දෙදෙනා කොස්තාපල්වරයා ඉදිරියේ වැඳ වැටෙමින් පින්සෙණ්ඩු වූහ.
“අනේ මං පාන්දරම රට යන්න ඉන්නෙ... අපිට එහෙම කරන්න එපා... අපි දෙන්න වරදක් කළේ නෑ ... අපට යන්න දෙන්න“ සෙව්වන්දි බැගෑපත් වූවාය.
“උසාවි දැම්මොත් හතළිස්පන්දාහක් දඩ ගහනවා“ කොස්තාපල් ගෝරනාඩු දැම්මේය. පෙනෙන්නට තිබුණේ පොලිසියේ තිදෙනෙකු පැමිණ සිටින බවකි. ඔවුන් පැමිණ තිබුණේ යතුරුපැදිවලිනි.
කොස්තාපල් උසාවි කතාවක් කී හෙයින් දෙදෙනා බිරාන්ත වූහ. සෙව්වන්දිට දෙලොව රත් වූයේ පසුදා විදෙස්ගත වීමට සිටිනවා සේම නිවෙස්වලටද මේ ගැන සැලවන බව සිහි වූ විටයි. එම නිසා රමේෂ් වරදක් නොකළත් මේ නරුමයන්ගෙන් බේරි යෑමට අවශ්‍ය හෙයින් පවසා ඇත්තේ,
“පනස්දාහක් දෙන්නම්... අපිව අතාරින්න...“
බැහැ යැයි කී කොස්තාපල් රථයේ රියැදුරු අසුනට නැඟ ඇමැතුමක් ගත්තේය.
“ සාජන් මහත්තයා මුන් දෙන්නා රුපියල් පනස්දාහක් දෙන්න හදනවා... මොකද කරන්නෙ...“ යනුවෙනි. මඳ දුරක් ගිය රථය ආපසු හරවාගත් කොස්තාපල් ආපසු එද්දී රමේෂ් කීවේ ඒටීඑම් කුටියක් අසල නතර කරන ලෙසය.
අනතුරුව වේරහැර ආර්එම්වී ආසන්නයේ තිබෙන ඒටීඑම් කුටියක් අසල රථය නතර කෙරිණි. රමේෂ් සහ සෙව්වන්දි රථයෙන් බැස ඒටීඑම් කුටියට ගියහ. රථයේ වූයේ කොස්තාපල් පමණි. ඒ අතරේ රමේෂ් ඔහුගේ යාළුවකුට ඇමැතුමක් ගෙන පැවසුවේ “මචං මට කරදරයක් ඉක්මනට වරෙන්...“යනුවෙනි. යහළුවා එන තෙක් කොස්තාපල්ට මුදල් දීම ප්‍රමාද කිරීමේ අටියෙන් ඒටීඑම් කුටියට ගොස් පැමිණි රමේෂ් කීවේ, “ඒකෙන් සල්ලි ගන්න බෑ... වෙන එකකට යමු“ කියායි. කොස්තාපල්ගේ 'ගේම'ට එක්වූ සෙසු පොලිස් නිලධාරීන් දෙදෙනාද ඒ වන විට රථය ආසන්නයට යතුරුපැදියෙන් පැමිණ සිටි බවට සැල වේ. එතෙක් වේලා රථය පැදවූ කොස්තාපල් රිය අසුන රමේෂ්ට දුන්නේය.
බොරලැස්ගමුවට පැමිණ මහරගම දෙසට වන්නට පිහිටි බැංකුවකින් මුදල් රැගෙන දීමට රමේෂ් සූදානම් වූයේය. ඒ වන විට රමේෂ්ගේ දුරකතනයද කොස්තාපල් බාරයට ගෙන තිබිණි.
රථයෙන් බැසගත් රමේෂ් සහ සෙව්වන්දි ඒටීඑම් කුටියට ගොස් රුපියල් පනස්දහසක් ලබාගෙන තිස්දහසක් සහ විසිදහසක් ලෙස කලිසම් සාක්කු දෙකේ දමාගෙන කුටියෙන් එන අතරේ රමේෂ්, සෙව්වන්දිට කියා ඇත්තෙ, දුරකතනයේ රෙකෝඩින් ඔන් කරගන්නා ලෙසයි.
රථයට නැඟුණු රමේෂ්, කොස්තාපල්ට කීවේ, “අනේ මහත්තයෝ රුපියල් තිස්දාහමයි පොතේ තිබුණේ... යාළුවෙකුට කිව්වා සල්ලි දාන්න කියලා.... එයාට දාන්න තැනක් නැහැලු... එයා දැන්මම සල්ලි අරන් එනවා කීවා... මිනිහා මේ ළඟම එනවා... එතකල් මේක තියාගෙන පොඩ්ඩක් ඉන්න...“
කොස්තාපල් එසැණින් නැවතත් සාජන්වරයාට ඇමැතුමක් ගෙන කීවේ,
“සාජන් මහත්තයා බලන්නකෝ... මූ රුපියල් තිස්දාහයි දෙන්න හදන්නෙ... මේකා වංගු දානවා... මේකා ලෝක ආ‍ඳෙක්...“යනුවෙනි.
එහෙත් රමේෂ්ගේ යහළුවා එන තෙක් නොසිට කොස්තාපල් රුපියල් තිස්දහසද රැගෙන රථයෙන් බැස ගියේය. ඔහු රථයෙන් බසිනවාත් සමඟ රමේෂ් පොලිස් කොස්තාපල්ගේ අංකය වන 82069 හඬ නඟා පවසමින් සෙව්වන්දිට කියා තිබුණේ 'අංකය මතක තබාගන්නා' ලෙසටයි.
ඒ වන විට වේලාව රාත්‍රී අටහමාර පමණ වී ඇත. සෙව්වන්දි මාලඹේට ගෙන ගොස් බස්සා රමේෂ් යාළුවකුට කතාකොට කියා ඇත්තේ, අසවල් ස්ථානයේදී අසවල් අංකය සහිත මෝටර් රථයට නැඟි පොලිස් නිලධාරියෙකු කප්පම් ගැනීමට සැරැසෙන බව කියා 119 පොලිස් හදිසි අංකයට ඇමැතුමක් දෙන ලෙසයි.
පොලිසියේ අයෙකුම කප්පමක් ගන්නවා යැයි කීම නිසා පොලිසිය තිගැස්සි ගියේය. එම නිසා ඇමැතුමට ක්ෂණිකව ක්‍රියාත්මක විණි. ඇමැතුමෙන් කී ස්ථානවලට බොරලැස්ගමුව පොලිසිය ගියත් රථයක් හමු වූයේ නැත. පසුව රථයේ අංකය අනුව ආර්එම්වී මඟින් රථයේ අයිතිකරු අනාවරණය කරගැනීමෙන් පසු ඔහු විසින් තම රථය කුලියට දී ඇති ආයතනය අමතා ඇත. එම ආයතන හිමිකරු රථය කුලියට ගත් රමේෂ්ට කියා ඇත්තෙ, “මල්ලි පොඩි ප්‍රශ්නයක්... බොරලැස්ගමුව පොලිසියට එන්න කියනවා... මමයි කාර් එකේ අයිති කෙනයි එනවා... ඔයත් කාර් එක අරන් ඉක්මනටම පොලිසියට එන්න...“ කියායි.
පොලිසියේ අයෙකු ම කප්පමක් ගත් බව සැලවීමත් සමඟින් උසස් පොලිස් නිලධාරීහුද සිද්ධිය ගැන දැඩි අවධානයක් දැක්වූහ. ඒ අනුව නුගේගොඩ කොට්ඨාසයේ සහකාර පොලිස් අධිකාරි රොෂාන් ප්‍රනාන්දු මහතාද රාත්‍රියේම බොරලැස්ගමුව පොලිසියට පැමිණියේය. රාත්‍රියේම පොලිසියට පැමිණි රමේෂ්ගේ කටඋත්තරය අනුව බොරලැස්ගමුව පොලිස් පොතේ පැමිණිල්ලක් සටහන් කැරිණි.
එසේ පොලිසිය ක්‍රියාත්මක වෙද්දී පසුදා පාන්දරම රමේෂ්ද තමන්ට වූ අවනඩුව දුරකතන ඇමැතුමක් මඟින් දන්වා තිබුණේ පොලිස් මූලස්ථානයේ පිහිටි පොලිස්පති සහන මැදිරියටයි. සහන මැදිරියෙන් කියා තිබුණේ ඔහුට වූ අවනඩුව ඉක්මනින්ම ලිඛිතව සඳහන් කොට ෆැක්ස් කරනලෙසටයි.
ඒ සියලු කාරණා පොලිසිය පැත්තෙන් කඩිනම්ව සිදු වෙද්දී බස්නාහිර දකුණ බාර නියෝජ්‍ය පොලිස්පති වසන්ත වික්‍රමසිංහ මහතා මෙහි විමර්ශන බස්නාහිර දකුණ අපරාධ කොට්ඨාසයේ අධ්‍යක්ෂ පොලිස් අධිකාරි විදුර ජයසිංහ මහතාට පැවැරීය. පොලිස් අධිකාරිවරයාගේ උපදෙස් මත එහි ස්ථානාධිපති පොලිස් පරීක්ෂක ජයන්ත පෙරේරා සහ (20553) සාජන් මෙන්ඩිස් ඇතුළු කණ්ඩායම ඒ මොහොතේම විමර්ශන ආරම්භ කෙළේය.
ඒ අනුව මුලින්ම රමේෂ් කී අංකය සහිත පොලිස් කොස්තාපල්වරයා සිටින්නෙ කොහිද යන්න සෙවීය. එහිදී අනාවරණය වූයේ එකී කොස්තාපල්වරයා ගල්කිස්සෙ රාජකාරි කරන බවයි. එසේම කලක් මිරිහානේද රාජකාරි කර ඇති බවක්ද අනාවරණය වූයේය.
ඔහු ගැන සොයා බැලීමේදී අනාවරණය වූයේ එකී කොස්තාපල්වරයා සෙසු නිලධාරීන් අතරද අප්‍රසාද චරිතයක් බවයි. පසුව පසුගිය හතර වැනිදා පොලිස් පරීක්ෂක ජයන්ත පෙරේරා සහ සාජන් මෙන්ඩිස් ඇතුළු පිරිස ගල්කිස්ස පොලිසියේ අයටද සැක නොසිතෙන පරිදි ගල්කිස්ස පොලිසියේ සැරිසරා සොයාගත්තේ 82069 අංකය දරන ප්‍රියන්ත නමැති කොස්තාපල්වරයා පොලිස් විවේකාගාරයේ ඉහළ මහලේ නිදා සිටින බවයි.
රාත්‍රි 9ට පමණ විවේකාගාරයේ නිදා සිට පහළට බසිනා අවස්ථාවේ කොස්තාපල් ප්‍රියන්ත අත්අඩංගුවට ගැනිණි. එහෙත් ඔහු එම සිදු වීම පිළිගැනීමට මැළිකමක් දැක්වූයේය. පස්වැනි දා කැස්බෑව අධිකරණයට ඉදිරිපත් කළ සැකකරු ලබන 17 වැනිදා දක්වා බන්ධනාගාරගත කිරීමට මහේස්ත්‍රාත් රුචිර වැලිවත්ත මහතා නියෝග කෙළේය.
පොලිස් විමර්ශනයේදී මීට සම්බන්ධ වූ සෙසු දෙදෙනාද අනාවරණය කරගැනිණි. ඒ ගල්කිස්ස පොලිසියේ 119 යතුරුපැදි රාජකාරියේ නිරතව සිටි දෙදෙනායි. ප්‍රියන්ත අත්අඩංගුවට ගැනීමත් සමඟ ඔවුහු රාජකාරියට වාර්තා නොකොට අතුරුදන් වී සිටියහ.
එහෙත් ප්‍රියන්ත අත්අඩංගුවට ගෙන දින තුනකට පසු 119 රාජකාරියේ නිරත සමන් නමැති කොස්තාපල්වරයා රාජකාරියට වාර්තා කෙළේය. ඔහු පසුගිය 08 වැනිදා අත්අඩංගුවට ගත් අතර 09 වැනිදා රාත්‍රියේ අනෙත් කොස්තාපල්වරයා වන මහේෂ් නමැත්තාද අංගොඩ ප්‍රදේශයේ නිවෙසක සිටියදී ලැබුණු තොරතුරක් මත අත්අඩංගුවට ගත්තෙ බස්නාහිර පළාත් අපරාධ කොට්ඨාසයේ සාජන් මෙන්ඩිස් ඇතුළු කණ්ඩායම විසිනි.
මහේෂ් පාපෝච්චාරණය කර තිබුණේ, ප්‍රියන්ත කතාකොට වේරහැරට පැමිණෙන ලෙස දන්වා සිටි බවත්, ඒ අවස්ථාවේ ඔහු මෝටර් රථයක් අසලට ගොස් මොනවාදෝ කතා කළ බවත්, තමන් සහ සමන්ද ඒ අසල සිටි බවයි. පසුව ප්‍රියන්ත එම මෝටර් රථයේ නැඟ ගිය බවත්, මිනිත්තු තිහකට පමණ පසු ඇමැතුමක් ගෙන බොරලැස්ගමුවට පැමිණෙන ලෙස දන්වා සිටි බවයි. එසේම රුපියල් තිස්දහසක් කපාගත් බව ප්‍රියන්ත කී බවද හෙළි කරන මහේෂ්, ප්‍රියන්ත විසින් තමනට සල්ලි දීමට තැත් කළ මොහොතේ තමා කීවේ, 'මං උඹෙන් සල්ලි අරන් තියෙනවානේ... ඒ ණයට හරියන්න මට සල්ලි එපා යැයි' කී බව මහේෂ් පොලිසියට හෙළි කළේය.
ප්‍රියන්ත ගල්කිස්ස පොලිසියේ අපරාධ වැළැක්වීමේ යතුරුපැදි රාජකාරියේ නිරතව සිටි අයෙකි. ඔහුට පැවැරී තිබූ රාජකාරිය වූයේ උදේ අටේ සිට සවස හය තෙක් යතුරුපැදියෙන් ගොස් අදාළ ප්‍රදේශයේ මූල්‍ය ආයතන ආරක්ෂා කිරීමේ පොත් අස්සන් තැබීමේ රාජකාරියයි. එම රාජකාරියට නිලධාරීන් දෙදෙනෙකු එක් වුවත් එදින ප්‍රියන්ත තනිව ගොස් ඇත. එසේ තනිව ගිය හෙයින් මේ කප්පම ගැනීමේ සහායට 119 යතුරුපැදි රාජකාරියේ නිරත සමන් සහ මහේෂ් දෙදෙනාද ඇමතුමක් දී කැඳවාගෙන තිබෙන බවට සැල වේ.
ගල්කිස්ස පොලිස් බලප්‍රදේශයේ පෙම්වතුන් බහුලව ගැවසෙන ප්‍රදේශයකි. සැකකරුවන් එසේ සැරිසරන තරුණ තරුණියන්ගෙන් කලෙක සිටම කප්පම් ගැනීම් සිදුකර ඇති බවට සැක කෙරෙන බව උසස් පොලිස් නිලධාරියෙක් පැවැසීය.
බස්නාහිර දකුණ බාර නියෝජ්‍ය පොලිස්පති වසන්ත වික්‍රමසිංහ මහතාගේ අධීක්ෂණයෙන් බස්නාහිර දකුණ අපරාධ කොට්ඨාසයේ අධ්‍යක්ෂ පොලිස් අධිකාරි විදුර ජයසිංහ සහ පොලිස් අධිකාරි 1 රොෂාන් ප්‍රනාන්දු මහත්වරුන්ගේ උපදෙස් මත බස්නාහිර දකුණ අපරාධ කොට්ඨාසයේ ස්ථනාධිපති පොලිස් පරීක්ෂක ජයන්ත පෙරේරා, සාජන්වරුන් වන (20553) මෙන්ඩිස්, (56951) සුනිල්, (90248) ප්‍රසන්න, (61108) දයාරත්න, කොස්තාපල්වරුන් වන (77688) අමිල, (81600) සමීර, (13177) නුවන්, (72338) ලලන්ත ඇතුළු පිරිස පරීක්ෂණවලට එක් වූහ.
පුද්ගල නාම මනඃකල්පිතය.
