බැද්දෙන් බැද්දට
නිමිත්ත: මව, පියා, නැඟණිය සහ මස්සිනා එකතු වී තරුණයෙක්ව අමානුෂිකව ඝාතනය කරයි. පියා විසින් අවුරුදු එකහමාරක් වයසැති දියණිය පොළොවේ ගසා මරා දමයි.
පිනි වෙනුවට මල් පෙතිවල ලේ මිදුනේ
මල් රැකදෙන උල් කටුමයි පෙති ඉරුවේ
රන් බිජුවට බොල් වී දෝ පැල නොවුනේ
රන් අසිපත කොතැනක හෝ මග හැරුනේ
ඇත් රෑනේ ඇත් බිලිඳුට සෙනෙහසිනේ
මව් නොවෙනා මව් කැලටත් කිරි එරුණේ
මහ සයුරේ දිය පරදන දරු පෙමිනේ
ලෙහෙනියකට දිය හින්දන්නට හිතුනේ
පාසැල්වල පාඩමටයි තැන ලැබුණේ
රූ තිරයත් සල්පිල්වලටයි ඇරුනේ
දසතින් එන බණ කන්වල නෑ වැටුණේ
උන් නොව අප බැද්දෙන් බැද්දට වැටුණේ
“මී පුප් ලදිම් දරු නොලදිම්” ළතැවෙමිනේ
සියතින් මළ පුතු හොයනා කොබෙයියනේ
"රන් කැටි පුතු" පණ ආපසු නෑ එන්නේ
වැරදුණු තැන මිනිසුන්ටත් කියපන්නේ
ජගත් ප්රේමචන්ද්ර
--------------------
දුරු රටක සිට . . .
මුදු මඳ සුළඟෙ ලෙළදෙන පහනේ රුසිරි
දසතින් ඇසෙන බණ පද බැති ගී මිහිරි
ලෙළදෙන බෝපතින් සිත නිවෙනා අසිරි
නොමැතිය සඳ එළිය පමණකි අද ඉතිරි
ගතින් දුර නමුත් සිත නිතරම පියඹයි
දෙරණේ සිසිල සොයමින් දින සති දියවෙයි
පෝ දින විහාරයෙ සිතුවම් මට සිහිවෙයි
සිල් රෙදි, නොපිපි මල් සරදමටම හිනැහෙයි
සුදු වැලි මළුව මත පා සලකුණු නැතිද
රැව් දුන් සාධු නද මුව'ගම ගොළු වුනිද
තුන් බිය අසල මිනිසුන් අසරණ වුනිද
සිත සනසනා බුදු බණ අමතක වුනිද
මංජුලා සිල්වා
----------------
පොප්ලර් ගසක හැඬුම
කුරුලු කූඩුවක කුරුල්ලන්ට
ගල්ගසා එය බිදින්නට අයිලයේ
කාලෙකින් කොල්ලෙක් නොදුටු
පොප්ලර් ගසක හැඩුමක් ඇසේ
ලෙනින් මියගිය දවසේ පාළුව
හීතල පොරවගෙන කන්දට ඇදේ
වසන්තය මිහිපිටින් හූරගෙන
වෘර්ක රෑනේ උඩුබිරුමක් වැයේ...
.
වයෝවෘද්ධ දුයිෂෙයින් එයි හතිදමා
සිග්නල් සොයමින් යයි කන්ද මුඳුනේ
එල්ලා කළු ලෑල්ලක් පොප්ලර් බදේ
තනිවම දොඩවයි එහි කිසිවෙක් නොවේ
සූම් වුණ තුරු මුඳුනක හිද කෙල්ලක්
නොකඩවා මොනවදෝ නිතරම අසයි
දුයිෂෙයින් නෙතග වැටෙන කඳුළක්
නොකඩවා මොන මොනවදෝ කියයි
"පැහැදිලිද අකුරු ගලපන්ට උඹලට
අයිලයනම් දිගු කලකට වැසෙයි
සූම් වෙනකොට බලාගෙනයි
පරිස්සමට අල්තිනායී
උඹ ඔතනින් වැටෙයි".
නදූෂ මදුරංග
-----------------
විරහ සිත
සුමුදු මල් පෙති මුවින් තර කර
බඹරිඳුන් නැත රොන් උරන්
නමුදු සිල් මෙන් රැකුණු ප්රේමය
පසක් කෙරුමද මඟ හැරන
සිනිඳු සල් පිළි රැහැන් බිඳුමට
ඇඟිලි එක් කර සිහි කරන්
ඉන්දු මල් පැළ පහන් කෙරුමට
කාලේ පරහට ඉව කරන්
සෙනෙහෙ පෙළ සිත් එක්ව බැඳුමට
නොමැත පින් කෙත් මෝදු වීලා
කෙනෙහි කළ හිමි සඳුට අවනත
නොවී වෙනෙතෙකු මුවට සිඹලා
සිතෙහි ඵල දැරු සෝක සුසුමන්
අවදි වී අරුණටම සිත්ලා
සෙනෙහෙ කළ පතිදම්ද රැකෙමින්
පතිකුලයට යන දෙසට එබිලා
බිඳුණු ප්රේමයෙ පහන් දොරකොඩ
ප්රේම ගිනිදැල් ඇවිලුණා
කැඩුණු සිත් මල් කඳුලු පිනි කැට
නෙතින් හසරැල් නික්මුණා
සැදුණු ගිනිදැල් තුළින් නික්මෙන
විරහා ගින්නක් හිමිවුණා
රිදුණු හදවත් පසක් කරමින්
නැඟෙන විරහවක් නොමවෙනා
ඉඟිකර හැඬෙනා පාළු සැදෑවේ
ගොම්මන් කළුවර දොම්නස ගෙන දෙනවා
සිහිකර බලනා ඇඟේ මතක පෙළ
කඳුළැලි සයුරක වෙරළට ඇද එනවා
තනිකර අද මා හැඬෙන නිමේෂෙක
පතිකුලයට ගිය සොඳුරිය සිහිවෙනවා
දිනකර නැඟ එන නැවුම් දිනයකම
නුඹෙ දිවි ගමනට පහනක් දැල්වේවා...
සජිත් පුෂ්පකුමාර
-----------------
හුදකලා පැතුම
නැවුම් ලොවක
අරුණලු දකින්නට පෙර
හුදකලා වූ මිනිසා
හුදකලා නොවේවායි
පතමි ....
නයන්ත ජගත් පුංචිහේවා
-----------------
මම යන්නම් පුතේ
දරාගෙන නුඹ කිරුළක්ව හිසමත
නැග්ග සෙල් කුළු නිමක් නැත
වාරු නැති අද වෙලා තුන් කුද
පුතේ හෙමිහිට යන්න බැරිවද.
සවිය ඇති දා නුඹත් කැටුවම
ලොවක අසිරිය පෙන්නුවා මම
දිනෙක මෙවැනිම අඳුරු සවසක
නුඹේ බර දරමින් මෙ‘උර මත
මිහිරි කවි ගී ගයා සතොසින්
පිනා ගිය සිත නුඹ නිසාවෙන්
සිහසුනක් නැති අඩුව විතරයි
රජ වුණා මම නුඹේ නාමෙන්.
වැඩත් ඇති නැති වෙද නුඹට යහමින්
කොහොම යන්නද නොවී ඉක්මන්
ගමේ නඩයක් යන අතරෙවත්
අපිත් යන්නම් නුඹ ගෙදර පලයං.
ඒ. ඒ. බදුර්නිශා
------------------
වරද කාගෙද
ගසක් අසලම වැලක් ලියලයි
ගස වටා එය කෙමෙන් දලුලයි
වැලට ස්නෙහෙන් උරයිසැමදේ...
ගසත් ලියලා මහා ගසක් වෙයි
වැලඳ ඔහු අසලම සිටි
මහා ගසක්වී අතුපතර විහිදේ
තවත් වැලකට සෙවණ දී
වැලට නොකියූ රහස එහෙමයි
වරද වැලමද?...
වැලට පෙර ගස
ස්නේහයේ පෙළපොත උගත් දා...
කුමුදුනී බටේපොල
--------------------
රතුපාට කටුවක්
මල් සුපිපි උයන් වැදැ
වසත් සමයෙකැ
විහඟ ගී පෙරළි පෙරළි
මුතු පිනි පළස මත
කෙළියි දඟ දිදී...
ළහිරු මිණිකැන් දහර
ආලිංගනය...
පිනිබර මල් පියල්ලක්
තෙරපුනි මා වුවන මතැ...
පිපුණි වෙරළු තුරු අඳුරේ
කොරසැඩි ගලෙකැ අද
අමාවක පියැස යට සිටැ
ඇඟිලි තුඩු යවමි
ලවනත...
ගැටුණි තියුණු තුඩක්
තෙරපුණු තැනැ
රතුපාට කටුවක්
තෙත බරිත..
අබ්දුල් කේ. සාදිකීන්
----------------
පංති සගයකුගේ ඉරණම
නොරටක සැඟව නුඹ සිටිතැයි සිතාගෙන
මෙතුවක් කලක් උන්නෙමි සිත හදාගෙන
එනමුදු තිස් වසක් ගිය තැන කණ වැකුණ
ඇදහිය නොහෙන පුවතින් හද සසල විණ
මහ උළු ගෙදර අප කොටු කළ තුඟු පවුරු
බිඳ දා පලා යන්නට මං සෙවූ මිතුරු
සැඟවී වෙසෙන වන ගැබ වෙඩි කෑ අයුරු
රුපු සෙන් අතින් වී නම් උහුලමි මිතුරු
තිස්ස නිහාල් වික්රමසිංහ
-------------------
මවකගේ සිතුවිලි
දරුවන් සිව්දෙනෙක් මිනිසත් කමට ළැදී
ලොව කිසිවෙකුට වරදක් සිදු වෙන්න නොදී
අපගේ සෙනෙහෙ මැද යහපත් හැඟුම් දිදී
ඇති දැඩි කළා නොමඟට යොමු වන්න නොදී
ගතකළ දිවිය දහසක් කම්කටොලු මැද
සිහිවන විටදි ලොකු සතුටක් දැනෙයි අද
අහවර බව සිතමි දිවියෙහි සැපත ලද
තව තව ගත නොහැක රෝ දුක් සුසුම් විඳ
ගතවී ඇත වයස හැත්තෑනවය පිරී
ජීවත් වන්න අපි තවමත් දරමු දිරී
සිරුරින් දැනෙන අපහසුතා කොහොම හරී
මැඬගෙන සිටීමයි දැන් මට නොකර බැරී
අත්වාරුවක් නොමැතිව ගෙයි ඇවිදින්න
කෙනෙකුගෙ පිහිට නොමැතිව වැඩ කර ගන්න
හොඳ සිහියක් ඇතිව නිති සතුටින් ඉන්න
බැරිවිට මගේ පැතුමයි මෙලොවින් යන්න
සුසීලා මුදන්නායක
------------------
නුඹ රිදවන මා
කම්මාර කම්මාර ලෝකුරු
හෙට ලොවයි ඔබ තනන්නේ
උදළු තලයට පණ පොවා
මයින හම පණ පොවයි ඔබ
කඹුරු දණ්ඩට බයවෙලා..
පොළොව පෙරළි නිල්ල මතුවී
හෙට ලොවක අරුණළු පිපේ
ජීවිතේ ඒ දිගේ දිගේළිව දිවෙයි
හැමදාම රිදි රිදී හඬයි
කිණිහිරිය ලෝකුරු පැලේ...
පණ පෙවී යන ආයුදෙන්
ජීවිතේ දුක දිනා දෙද්දෙන්
මම තවම ඔබ පහර කන
රිදී තුළුම් කා පෙළී පෙළී
උණුවෙන
කිණිහිරය මමමයි හැමදාම...
චම්මින්ද වෙලගෙදර
----------------
තාත්තා
පියාපත් දිග හැර
බදා වෙර බොහො කොට
පියඹන්න ඉඩ හැර
රැක ගත්ත අහස නුඹ
හැපී තුරු මුඳුන්වල
සැඩ සුළං වියරුව
මල් පෙතිත් තැළෙනකොට
යළිත් හෙට හිනැහෙන්න
සිසිල දුන් තුෂර නුඹ
පැටලිලා පා යුග
වැටෙනකොට ජීවිත මඟ
සෙමෙන් දිගු කර දෑත්
නැඟී සිට වූ
නොවෙනස්ම ප්රේමයයි නුඹ
අයේෂා සේනානායක
-------------------
දුරු රටක තනිවූ ඔබ සිහිවී
අපි නම්
කැලෑ කොළ කාලාවත්
ඉන්නවා
දුරු රටක තනිවුණ
ඇය මතක් වුණාම දුකයි...
කුස්සියේ දොර ඇනේ
එල්ලු ගමන්
ඔබ සුවඳ රැඳි
හාල් පොතවන් රෑ ගවුම
අසනවා නිතර
නුඹ එන්නේ කවදාදැයි...
අහල පහළ
ඉඟි බිඟි පාන
ඔබේම යෙහෙළියන්
කරන ආරාධනා
දැනෙන්නේ නැහැ
වකුටු වී වියළි ගිය
මගෙ කයට....
සියලු දුක් දරාගෙන
හිතලේ හරිකඩේ
එන දවස
කවදාකදැයි නොදැන
බලාගෙන ඉන්නවා
මගෙ දෑස...
ජගත් දම්පහල
-----------------------
තුන්දඩය
ඩන්කා ගහපු කාලෙ (ජිල් බෝල)
පැරණි මිතුරාය
මීට ස්වල්ප මොහොතකට පෙර
දුම්රිය පළේදී හමු වූ
ඔහුගෙ බිරිඳ හා දෙදරුවන් සමඟ...
ඔහු හා ඈ හිටියේ
ළමයි දෙන්න වඩාගෙන
පුංචි කෙල්ලයි කොල්ලයි
නිමුන්නො කියල තමයි කිව්වෙ මට...
අතීතෙ පුරුද්දට
ඈගේ දෑස බැලුණු පසුය
බොහෝ රහස් හංගාගෙන
ඈ සිනා සී දුම්රියට ගොඩ වූයෙ...
මිතුරාත් සිනාසුණු මුහුණෙනි
මා දෙස බලා ඉක්බිතිව ගොඩ වූයෙ
අතීතයෙන් ගඟ ගලා බසින තැන
එතැනදියි සිහි කැඳවූයෙ ඔහු මට..
උයන් මල් දෙස බලා
ඔට්ටු අල්ලන විට එදවස
තුන්දඩ ගසා ජය ලැබූ
පැරණි මිතුරාය ඔහු මගේ...
ඉරිසියාවෙන් පෙළුණු දවසක
මමත් ජිල් බෝලයක් අරගෙන
අත දිගහැරලා ගැහුව හින්දමයි
ඔහුගේ ඇසක් අන්ධ වූයෙ...
මලක් වෙනුවෙන් අන්තිමේට මට
සිද්ධ වූයේ පරිවාසෙක ඉන්නට
ඒ වුනත් තරහක් තිබුණෙම නෑ
අපි දෙන්නට මිතුරුකමේ අරුමෙට...
ඩන්කා ගහපු කාලෙ
පැරණි මිතුරාය
මීට ස්වල්ප මොහොතකට පෙර
දුම්රියපළේදී හමු වූ
ඔහුගෙ බිරිඳ හා දෙදරුවන් සමඟ..
එදත් ඔහු පළමු පංතියේ ගමනක
අදත් මම තෙවන පංතියේ ගමනක...
ධනංජය බණ්ඩාර
---------------------
නොමියෙමි
දෙකොපුලෙහි ඇඳෙන
රැලි ගැන නො සිතන්නෙමි
හිස මත පිපෙන නර කෙස
කවර නම් වෙනසක්ද මට...
පරණ වූ ආහාර ස්වල්පය
කුසෙහි රැලි ඇති කරත්
විලුම් ඇට ඉදිමුණත්
මගෙ අඳුරු මොළයේ
කිසිම වෙනසක් නො මැත...
මම පරණ කොළුවා මය
අම්මා ට හාදුවක් දෙන...
Mark Strand
(මාක් ස්ට්රෑන්ඩ්) 1934- 2014
මාක් ස්ට්රෑන්ඩ් කැනේඩාවේදී ඉපදී අමෙරිකාවේ ජීවත් වූ කවියෙකි. ඔහු අමෙරිකාවේ බොහෝ සාහිත්යය සම්මාන මෙන්ම දෙස් විදෙස් සාහිත්යය සම්මාන රැසක් දිනා ඇති නව කවියේ සුවිශේෂී කාව්යකරණය ක යෙදුණු කවියෙකි.
අනුවාදය; සමන් ගුණහේරත්
------------------------------
නිම වූ කාර්තු
නුඹ නික්ම ගිය පසුව
උදා වූ නිම් නැති සිසරය
නිම වූ කාර්තු ද රැගෙන
අනන්තය තෙක් දිගු විය...
ශ්වේත පැහැ තුහින අතරින්
නික්ම ගිය වස්සානයක
මල් සුවද මතු විය
නික්ම ගිය සරත් සමයක
උණුහුම මතු විය
නික්ම ගිය ගිම්හානයක
මතක පත් මතු විය...
මඟ හැරුණු මල් සුවද තබනු වස්
වසන්තය සොයමි
අහිමි වූ උණුසුම තබනු වස්
සරත් සමය සොයමි
අමතක මතක පත් තබනු වස්
ගිම්හානය සොයමි...
ස්වේත පැහැ සිසරයක,
සීතල තුහින අතරින්,
චණ්ඩ හිම කුණාටු අතරින්,
අනන්තය තෙක් සැරිසරමි
සොයමි නිම වූ කාර්තු...
අනුත්තරා කොඩිකාර
-----------------------------
නිමක් නැති කඳුළ
නුඹ ඇවිත් ගිය පසු
සැදුනු හිස්තැනට
සොරා ගත්තා ඇවිත් හනිකට
පාළුව වෙළාගෙන ...
වැහි නැති ගිම්හානයට
පිනිත් ඇති සැනසෙන්න
සඳ ගුලිවෙලා සීතලේ
කළු සුදු වලා යට...
සඟවන්නට සැදුව මුත් රත්
දෙතොල් මත ඇති සලකුණ
සිනාසෙනවා ලොවට වසන් කර
ඉකිබිඳින හදවත...
ප්රේම සල්ලාපයේ මතක
කඳුළු කැට වී වැටී කුසුමට
කඳුළ වේළුනත් ඉක්මනට
ඉවර වෙන්නෙ කවදාද ...
නදිෂා දිල්හානි
--------------------
වැස්ස
කළු වලාකුළු එකට හැපි හැපි
මරාගන්නා පෙලක් දවසට
එක වලාවක් ගහපු පාරට
අනිකා අඩනවා ඌයි කිය කිය...
සුදු සේද සඳ දුරට විසිකර
එල්ලාන කළු පැහැති ඉටි රෙදි
පුංචි කහ එළි දෙක තුනක් මැද
නානවලු සිල්ගන්න අටියෙන...
.
ඇවිද ඇවිදා ඇගේ හැප්පෙන
වහල ගස් අතු රන්ඩුකරවන
හසුවෙද්දි සඳ සුලං රොදකට
විසිවෙලා රෙදි පෙනෙයි සඳවත...
බුලත් කොටු වෙත ගුවන් ගත කළ
එළිය විහිදන රොකට් රථ පෙළ
රකින්නට අඹ ගහේ මුලු වල
අදත් නෑ නැත වවුල් මුර පොළ...
කන් දෙමින් වැහි ගයන ගීයට
ළං වුණා උං අහන පැනයට
අපට තරමට අහිමි වීමක්
කිසිම දවසක උබට තිබුණා ද..?
අසේල ලක්ෂාන්
**********************************
කෘතිය - රේල් පීලි ආදරයක්
කර්තෘ - යනුෂා ලක්මාලි
මිල රුපියල් - 250/= පිටු - 50
ප්රකාශක - ග්රැෆිකෙයා
විමසීම් - 017 9444514
යනුෂා විසින් රචිත නවතම කාව්ය සංග්රහය වන්නේ රේල් පීලි ආදරයක් කාව්ය සංග්රහයයි. ඇය මීට පෙර බිඳ වැටුණු කැණි මඩල (2010), පාට නැති හීනයක් (2011), වරා මලක් ගිනි අරගෙන (2016) ආදී වශයෙන් ලියා පළකර ඇත. කැලණිය විශ්ව විද්යායේ ඉගෙනුම ලබන අවදියේ සිටම පුවත්පත්වලට කවි ලියූ ඇය අද වන විට දිගු ගමනක් පැමිණ ඇත.
රේල්පීලි ආදරයක් කාව්ය සංග්රහයේ එන බීම වෙළෙන්දා කවිය අපූරුයයි හැගේ.
බීම විකිණිමේ යෙදෙන වෙළෙන්දෙකුගේ ජීවිත ගැන කතා කරන්නේ බොහෝ සීරුවෙනි. සෑම දවසකම බීම විකුණන ඔහු අවසානයේ ජීවිත ගැන සිතා බලන්නේය.
මාතෘකාව බීම වෙළෙන්දා.
සුවඳ මිරිකලා අහසට විසිකරක
කඳව මුහුවෙලා දිවගට රස බෙදන
කහට තවරලා ද්වල හිනාවෙන
පද්මෙ හොඳ එකා හන්දිය ළඟ පිපුණ..
නාරං දොඩං හිනැහෙන මේසයක් මත
තාලම් මතක් කර හැන්දක් පනියි උඩ
මායම් නැතත් පැය දොළහක් නගයි හඞ
කෝලම් වලට නම් කරදර නොදෙයි ඉඩ
දවස තිස්සේම බීම හඳන ඔහු හැන්දෑවට ගෙදරට එන්නේ හෙම්බත් වීය. ජීවිතේ බොහෝ දුක් මහන්සියෙන් හරි හම්බකරන ඔහුට මේ ජීවිතය අසීරුය. එහෙත් ජීවිතයේ ඇති අසීරු බව, දවස ගතකිරීම අසීරුය. නාරං දොඩම් වල ඇති පැඟිරි ඇඹුල් බවට වඩා ජීවිතේ ඇති අසීරු බව ගැන කියැවෙයි.
අඳුර පොරෝගන රෑ ඇඟපත රිදෙන
කෙඳිරිලි කඳුළු පිරිමැද්දේ
හඳ එළිය
දුක ලෙලි අරින ජීවිත
ගැන හිතන කොට
නාරම් දොඩං වල නම්
මොන ඇඹුලක් ද?
ආදරයෙන් බැඳීම ලේසී නැත. එමෙන්ම ඒ බැඳුුණු ආදරය පවත්වාගෙන යාම ද පහසු නැත. ආදරයෙන් බැදෙන්නෝ ආදරයෙන් පැරදෙන්නෝද මෙළොව බොහෝ සිටිති.
ආදරය තිබුණත් , හිත රිඳුන විට හැරයන යළිත් හමුවන ඇයෝද මේ ලොව බොහෝය. කෙසේ වෙතත් ආදරය කරන කාලයේදී හැර ගිය, යළිත් කෙටි කලකින් හමුවන සියලු දුක් කතන්දර අතීතයට එක්කරන අයද මේ අතර වේ. කොහොම වුණත් යළි හමුවෙමු ද මේ කතාවටම අදාළ යැයි සිතේ.
ළඟ හිටියටත් වඩා ඔබ ගැන
දුරස් වුණාමයි ආදරේ වැඩියෙන් දැනුනේ
හෙලන හෙලන වර ඇසිපිය
ඔය රුවමයි ඉඟි කරමින් මා හද පෙළුවේ
ඉරිතැළුණ අහස අඬනවා අදත්
බැහැ හිතට බොරු කරන්න නම් තවත්
අතීතයෙන් මිදී දිව එමි යළිත්
ඒ මඟ හමු වී හිනැහෙමු තව එක වරක
යනුෂා යනු ජීවිතයෙ දුක් විදි ගැහැනියකැයි කීමේ වරදක් නැත. දැන් කාලය ගෙවී ඇත. ජීවිතයේ එ යුගය ගැන අදත් ඇයට කදුළක් ඇතුවාට සැකයක් නැත. පොඩි දරුවන් සමඟ බක්මහේ ගෙවුණ දවස් ගැන ඇය ලියන්නේ මෙසේය.
මාතෘකාව කෑගලු අහස යට සීතල දැනෙනවද?...
ඈ මෙසේ ලියන්නීය.
කොහා තමයි අවුරුදු ගැන මතක් කළේ
එරබඳු මලුත් දුක දැනිලයි හිනාවුණේ
කිරිබත් නැතිව ලිප ඇඬුවයි බඩ ගින්නේ
රතින්ඤා කරල් ගිනි ගත්තයි හිත ඇතුලේ....
ඒ ඇය ලියන්නේ ඇය ලැබු ජීවිතයයි. ඇගේ දරුවන් විදි ජීවිතයයි.
මේ කොහොම වුණත් යනුෂා ලක්මාලි කිවිදය විසින් ඇගේ කවි මගෙහිදි තව තවත් ඉවසිලි වන්නත වන්නේ නම්, කවිය ගැන හැදෑරිම් කරන්නේ නම් ඇයට යා හැකි දුර බොහෝ වනු ඇත.
ඔබේ කවි නිර්මාණ
පහත ලිපිනයට එවන්න
කවි සිළුමිණ, ලේක්හවුස්, කොළඹ 10.
විද්යුත් තැපෑල - [email protected]