වත්මන් තරුණ පරපුර පිළිබඳ දැන් අසන්නට ලැබෙන්නේ එතරම් සුබදායක පුවත් නොවේ. එවැනි තත්ත්වයක් තුළ තරුණ පරපුරට ම ආදර්ශයක් වෙමින් රට වෙනුවෙන් විශාල සේවයක් ඉටු කරන තරුණ පිරිසක් පසුගියදා අපට හමු විය.
මාදම්පේ තිනිපිටිගම පදිංචි එම තරුණ පිරිස කුඹුරු අක්කර දහසකට ආසන්න කුඹුරු යායක් දෙකන්නයේම වගා කිරීමට අවශ්‍ය ජලය රඳවා තබා ගත හැකි මාදම්පේ තිනිපිටි වැවේ වසර ගණනාවක පටන් රැඳී ඇති සැල්විනියා ඇතුළු ජලජ ශාඛ මුළුමණින්ම ඉවත් කිරීමට පියවර ගෙන තිබේ.
ප්‍රදේශයේ ගොවි ජනතාව මෙන්ම විවිධ සංවිධාන ද විවිධ අවස්ථාවලදී අදාළ බලධාරීන්ගෙන් මෙම වැව ප්‍රතිසංස්කරණය කර දෙන මෙන් ඉල්ලා සිටිය ද ඔවුන්ගේ අවධානය මෙතෙක් ඒ සඳහා යොමු නොවූ බැවින් වැව සුද්ධ පවිත්‍ර කිරීමට පියවර ගත් බව එම තරුණ පිරිස පැවසූහ. මීට වසර ගණනාවකට පෙර වයඹ පළාත් සභාවේ කෘෂිකර්ම අමාත්‍යාංශය මෙම වැවේ සැල්විනියා ජපන් ජබර ඇතුළු ජලජ ශාක ඉවත් කිරීමට මුදලක් වෙන් කර එම කටයුතු ආරම්භ කළත් පසුව එම කටයුතු නතර වූ බවත් එයින් ඇතැමුන් ඔවුන්ගේ සාක්කු පුරවා ගත් බවත් ගම්වාසීහු පැවසූහ. එවැනි තත්ත්වයක් තුළ තරුණ පිරිස ඉටු කළ මෙම ප්‍රජා සත්කාරය ගම්වාසීන්ට මහමෙරක් තරම් අගනේ ය.
වැව පවිත්‍ර කිරීමේ කටයුත්තට පුරෝගාමී නායකත්වය දුන් මාදම්පේ තිනිපිටිගම පදිංචි ඩබ්ලිව්.එම්.ධනුෂ්ක සිල්වා තරුණයා ඒ ගැන මෙසේ පැවසුවේය.
“මාදම්පේ මහ වෙල් යායේ කුඹුරුවලින් සමහරුන්ට අක්කර පහ, දහය අයිතියි. ඒවා දෙකන්නය වගා කර ගන්න බැරිව පුරන් වුණේ අවශ්‍ය ජලය නොමැතිකමින්. ඊට හේතු වුණේ එම යායට ජලය ලබා ගන්නා තිනිපිටි වැව විවිධ ජලජ ශාකවලින් වැසී තිබීමෙන් වැව ගොඩවී තිබීම නිසයි. අපි වැව සුද්ධ පවිත්‍ර කිරීමට පියවර ගත් අවස්ථාවේදී සමහරු අපව අකර්මන්‍ය කිරීමට විවිධ කතා පැවසුවා. නමුත් අපි පසුබට වුණේ නැහැ. බුද්ධිමත් අය අප අගය කරමින් අපට මුදලින් ආධාර කළා. දිරිමත් කළා. එයින් ලැබුණු ශක්තිය සහ ධෛර්යය නිසා තමයි අපි මෙම කාර්යය සිදු කළේ. ගමේ ගොවි සංවිධානය අපට ලොකු ශක්තියක්. ඔවුන්ගේ සහයෝගය සහ අධීක්ෂණය මතයි අපි වැවේ ජලජ ශාඛ ඉවත් කිරීමේ කටයුතු කරගෙන යන්නේ. පුත්තලම කෘෂිකර්ම නිලධාරීන්ද අපට ලොකු ශක්තියක් වුණා. ඔවුන්වත් අප අගය කළ යුතුයි. අපේ අරමුණ වැවෙන් ඉවත් කරන ජලජ ශාක පොල් වතුවලට පෝර වශයෙන් යෙදීමට විකිණීමයි. එයින් ලැබෙන මුදල්වලින් තිනිපිටි වැවේ අමතර ජල රැඳවුම් වැවත් සුද්ධ පවිත්‍ර කරන්න බලපොරොත්තු වෙනවා. තරුණ තරුණියන් නිකම්ම කාලය ගතකරනවාට වඩා මෙවැනි දේක යෙදීමෙන් රටට සේවයක් සැලසෙනවා. දේශපාලඥයන් ගමට හැමදේම කරලා දෙයි කියලා බලාපොරොත්තු වීම තරුණකමට ගැළපෙන්නෙ නැහැ.“
ඔහුගේ වදන් තුළ තරුණ පරපුරට ආදර්ශයක් ගැබ් වී ඇත. තිනිපිටිගම තරුණයන්ගේ ඒ උද්යෝගය සහ කැපවීම ගම්වැසියන්ද ප්‍රබෝධයට පත් කර තිබේ. තිනිපිටිගම තරුණයන් රටට ම ආදර්ශයක් බව ඔවුන්ගේ අදහසයි. පුත්තලම දිස්ත්‍රික් වාරි මාර්ග ඉංජිනේරු ඩී.සී.හෙට්ටිආරච්චි ඒ ගැන මෙසේ කීවේය.
”තිනිපිටි වැව ආශ්‍රිත ගොවි සංවිධානය කාලයක සිට මෙම වැවේ ඇති ජලජ ශාක ඉවත් කරන මෙන් ඉල්ලීම් ගණනාවක් ම ඉදිරිපත් කළා. නමුත් අපට තිබූ ප්‍රශ්ණය ඒ ඉල්ලීම ඉටු කිරීමට අවශ්‍ය මුදල් සොයා ගැනීමේ දුෂ්කරතාවයි. ඒ නිසා එම ඉල්ලීම් යටපත් වුණා. මුදල් ප්‍රශ්ණය නිසා අපි අසීරුතාවකට මුහුණ දුන්නා. මේ කාලයේ වැඩි දෙනෙකු වැව් පවිත්‍ර කරනවා කියලා කරන්නේ වැව් හාරලා වැලි කැණිම් කරණ එකයි. එවැනි තත්ත්වයක් තුළ තමයි තිනිපිටිගම පදිංචි ධනුෂ්ක සිල්වා කියන තරුණයා අපෙන් අවසර ඉල්ලුවේ මෙම වැවේ ජලජ ශාඛ ඉවත් කිරීමට. ඔහු කියා සිටියේ ගමෙන් මුදල් එකතු කරලා වැව පවිත්‍ර කරන බවයි. එම ඉල්ලීම සාධාරණ බව වැටහීම නිසා අප ඊට අවසර දුන්නා. හැබැයි වැවේ කැණිම් කරන්න අප තහනම් කළා. මේ බව මාදම්පේ පොලිසියටද දැනුම් දීලා අතින් ජලජ ශාක ඉවත් කරන්න ඉඩ දුන්නා. පසුව අතින් මෙම කාර්ය කරන්න බැරි නිසා යන්ත්‍රයක් දාලා එම කාර්යය සිදු කරන්න අවසර දුන්නා. අපි මෙම තරුණ පිරිසගේ ධෛර්යය ගැන ආඩම්බර විය යුතුයි.මේ වන විට ඔවුන් ගමේ ජනතාවගේ ආධාර එකතු කරලා ජලජ ශාක ඉවත් කරනවා. අපේ නිලධාරින් විටින් විට ගොස් පරික්ෂා කර බලනවා. එම කාර්යය අපි කවුරුත් අගය කරන ආකාරයට සිදු වෙමින් තිබෙනවා. මේ තරුණයන්ගේ උත්සාහය මුළු රටේම වත්මන් තරුණ පිරිසට ආදර්ශවත් එකක් වනවාට සැක නැහැ“
සෑම දෙයක්ම රජයෙන් කෙරෙන තෙක් බලා සිටින ජනතාවක් වාසය කරන රටක තිනිපිටිගම තරුණ කැල මෙම වැව පවිත්‍ර කිරීමේ වැඩසටහන තුළින් මහඟු ආදර්ශයක් ලබා දී ඇත. ඔවුන්ගේ මෙම ප්‍රයත්නය රටේ සියලු තරුණයන්ට ආදර්ශයක් වනු දැකීම අපගේ ද පැතුමයි.
