ලංකාව කුඩා දූපතක් වුවද එය අන්තර්ජාතික වශයෙන් භූමි හා දේශපාලනික වශයෙන් අතිශය වැදගත්, හා තීරණාත්මක මධ්‍යස්ථානයක් බවට ගොඩනැඟෙමින් ඇත. විශේෂයෙන්ම වත්මන් රජය බලයට පත්වීමත් සමඟ මේ තත්ත්වය වඩාත් කැපීපෙනෙන ලෙස වර්ධනය වී ඇති බවක්ද පෙනෙන්න ඇත. ගෝඨාභය රාජපක්ෂ ජනාධිපතිවරයාගේ ආගමනයත් සමග ලොව ප්‍රබල රටවල් රැසක්ම රාජ්‍යතාන්ත්‍රික වශයෙන් මෙරට කෙරෙහි දක්වන උනන්දුවද සුවිශේෂ ලෙස ඉහළ ගොස් ඇත.
මේ බව වටහාගත හැකි හොඳම නිදසුනක් පසුගිය 14 වැනිදා අපට දක්නට ලැබිණි. එනම් ලොව ප්‍රබලතම රටවල් තුනක් වන ඇමෙරිකාව, චීනය හා රුසියාව යන රටවල් තුනේම විශේෂ නියෝජිතයින් තිදෙනෙකු එකම දිනකදී මෙරටට පැමිණ ජනාධිපති ගෝඨාභය රාජපක්ෂ මහතා හමු වී සාකච්ඡා පැවැත්වීමයි .
රාජ්‍ය තාන්ත්‍රික වශයෙන් මෙය මීට පෙර දැකගන්නට නොලැබුණු තරමේ සුවිශේෂ සිදුවීමකි .
එක්සත් ජාතීන්ගේ මානව හිමිකම් කවුන්සිල සැසිවාරයද දොරකඩටම පැමිණ ඇති මොහොතක මෙම සාකච්ඡා පැවැත්වීම එහි වැදගත්කම තවත් වර්ධනය කරන්නක් විය. එම සැසිය ආරම්භ වනුයේ ලබන මාර්තුවේය.
මෙරටට පැමිණි ඇමෙරිකා නියෝජිතවරිය වූ, එරට දකුණු හා මධ්‍යම ආසියා කටයුතු කාර්යාංශයේ ප්‍රධාන නියෝජ්‍ය සහකාර ලේකම් ඇලිස් ජේ. වෙල්ස් මහත්මිය, ජනාධිපති ගෝඨාභය රාජපක්ෂ මහතා සමග පැවැති සාකච්ජාවේදී මානව හිමිකම් සැසිය වෙත විශේෂ අවධානයක් යොමු කළාය. ඇය මෙරටට පැමිණියේ ඇමෙරිකා ජනාධිපති ඩොනල්ඩ් ට්‍රම්ප් විසින් ජනාධිපති ගෝඨාභය රාජපක්ෂ මහතා වෙත යොමු කළ ලිපියක් ද සමඟය. ජනාධිපති රාජපක්ෂ මහතා සමඟ පැවති සාකච්ඡාවේදී ඇය මේ ලිපිය ඉදිරිපත් කළාය.
විශේෂයෙන්ම ජගත් මානව හිමිකම් කවුන්සිලයේ සම්මත වී ඇති ශ්‍රී ලංකාව සම්බන්ධ යෝජනාව පිළිබඳව මෙහිදී ඇමෙරිකාවේ විශේෂ අවධානයක් යොමු වූ බවක් ද පෙනෙන්නට විය. රජය දිගින් දිගටම එම යෝජනාවලියට එරෙහිව අදහස් දක්වා තිබීම ඊට හේතුව විය.
එසේම කවුරුත් අපේක්ෂා කළ පරිදිම මෙම සාකච්ජාවේදී මිලේනියම් චැලේන්ජ් කෝපරේෂන් ගිවිසුම සම්බන්ධවද දෙපාර්ශ්වය අතර පුළුල් ලෙස කතාබහ ඇති විය. නව රජය මෙම ගිවිසුමට අත්සන් තැබීමට සූදානම් බවට එජාපය ප්‍රමුඛ විපක්ෂය පසුගිය දිනවල නැඟූ හඬ, නිහඬ කරමින්, එම චෝදනාවන්ට නිසි පිළිතුරක්ද සපයමින්, ගෝඨාභය රාජපක්ෂ මහතා මෙහිදී ඇමෙරිකා නියෝජිතවරියට සුවිශේෂී කරුණු කිහිපයක්ම අවධාරණය කර සිටියේය.
මිලේනියම් චැලේන්ජ් කෝපරේෂන් ගිවිසුම සම්බන්ධ ඉදිරි කටයුතු සිදු කිරීමේදී ජනතා අදහස් සැලකිල්ලට ගත යුතුම බව ජනාධිපති ගෝඨාභය රාජපක්ෂ මහතා මෙහිදී අමෙරිකා නියෝජිතවරිය වෙත දැනුම් දී සිටියේය. එම ප්‍රකාශය හරහා ජනපතිවරයා ඇමෙරිකාවට හඟවා සිටියේ, එනම් නොකියා කියුවේ, මෙරට ජනතාව අකැමැති දෙයක් සිදුකිරීමට තම රජය කිසිසේත්ම සූදානම් නැති බවය. එසේම ජනතාව අකැමැතිනම් මෙම ගිවිසුම අස්සන් තැබීමට රජය කිසිසේත්ම පියවර නොගන්නා බවද ඒ ප්‍රකාශය හරහා මොනවට පැහැදිලිවිය.
අදාළ යෝජනාවලිය මේ වන විට විද්වත් මණ්ඩලයක් විසින් අධ්‍යයනය කරමින් සිටින බවත් ජනාධිපතිවරයා මෙහිදී අවධාරණය කර සිටියේය. එසේම මිලේනියම් චැලේන්ජ් කෝපරේෂන් ගිවිසුම සෙසු රටවල ක්‍රියාත්මක කළ ආකාරය සහ අත්දැකීම් පිළිබඳ විද්වත් මණ්ඩලයේ විශේෂ අවධානයට ලක්ව ඇති බවද ජනාධිපතිවරයා ඇමෙරිකා නියෝජිතවරිය වෙත සඳහන් කළේය.
එම ගිවිසුම සම්බන්ධව මෙන්ම මානව හිමිකම් යෝජනාවලිය සම්බන්ධවද ඇමෙරිකා රජය අපේක්ෂා කරන ආකාරයේ ප්‍රතිචාරයක් ශ්‍රී ලංකා රජය වෙතින් මෙම සාකච්ජාවේදී ජනපතිවරයා වෙතින් නොලැබුණද, තවදුරටත් ශ්‍රී ලංකාව සමඟ සබඳතා ශක්තිමත් කරගැනීමට ඇමෙරිකාවේ ඇති උනන්දුව හා කැමැත්ත මෙහිදී කැපී පෙනුණු කරුණක් විය. ගෝඨාභය රාජපක්ෂ ජනාධිපතිවරයා සමඟ පමණක් නොව විදේශ සබඳතා අමාත්‍ය දිනේෂ් ගුණවර්ධන මහතා සමග පැවති සාකච්ඡාවලදීද ඇමෙරිකානු නියෝජිතවරිය මේ පිළිබඳව කිහිපවරක්ම අවධාරණය කළාය.
ඇමෙරිකාවේ පදයට නැටීම් සිදු නොකළද තවදුරටත් එරට සමග යහපත් රාජ්‍යතාන්ත්‍රික සබඳතාවක් පවත්වාගෙන යාමේ හැකියාවක් ශ්‍රී ලංකාව සතු බව ගෝඨාභය රාජපක්ෂ ජනපතිවරයා මෙම සාකච්ඡා හරහා ඔප්පුකර පෙන්වීය.
එමෙන්ම පසුගිය රජය සමයේ යම්තාක් දුරකට දුරස්ව තිබු චීන - ශ්‍රී ලංකා සබඳතා වත්මන් රජය යටතේ නැවත වරක් ශක්තිමත් වූ බවක් චීන විදේශ අමාත්‍ය චැංග් යී හා ජනපති ගෝඨාභය රාජපක්ෂ මහතා අතර පැවති සාකච්ඡාවන් මඟින් මොනවට පැහැදිලි විය .
එසේම මානව හිමිකම් මුල් කරගනිමින් විවිධ ජාත්‍යන්තර බලවේග වෙතින් මෙරටට එල්ලවිය හැකි බලපෑම්වලදී ශ්‍රී ලංකාව වෙනුවෙන් පෙනී සිටීමට චීනය සූදානම් බවද මෙහිදී පැහැදිලි විය. එළඹෙන මානව හිමිකම් සැසිවාරය ඇතුළු තීරණාත්මක අවස්ථාවලදී එය මෙරටට සුවිශාල ශක්තියක් වනු ඇති බව නොඅනුමානය.
චීනය ශ්‍රී ලංකාවේ නිරන්තර විශ්වාසදායක මිතුරා වන බවත්, ශ්‍රී ලංකාවේ අභ්‍යන්තර කටයුතුවලට මැදිහත් වීමට බාහිර බලවේගයන්ට ඉඩ නොතබන බවත් මෙහිදී චීන විදේශ අමාත්‍යවරයා ගෝඨාභය රාජපක්ෂ ජනපතිවරයා ඉදිරියේ අවධාරණය කර සිටියේය .
ශ්‍රී ලංකාවේ උපාය මාර්ගික හවුල්කරු ලෙස චීනය අඛණ්ඩව ශ්‍රී ලංකාවේ අභිලාශයන් වෙනුවෙන් පෙනි සිටින බවද චීන විදෙස් අමාත්‍යවරයා මෙහිදී සඳහන් කළේය .
ශ්‍රී ලංකාවේ ස්වෛරී භාවය, භෞමික අඛණ්ඩතාව සහ ස්වාධීනත්වය වෙනුවෙන් චීනය නිරන්තරව පෙනී සිටින බවද චීන විදෙස් අමාත්‍යවරයා මෙහිදී ප්‍රකාශ කර සිටියේ දෙරට අතර කලකට ඉහතදී ගොඩනැගී තිබු සමීප බව නැවත වරක් ගොඩනැංවෙන බවට වන සුභවාදී අපේක්ෂාව අප තුළ දල්වමිනි.
චීන රජය පමණක් නොව රුසියානු රජයද මෙරට නව රජය සමඟ සබඳතා වර්ධනය කරගැනීමේ විශේෂ වුවමනාවකින් සිටින බව, රුසියානු විදේශ අමාත්‍ය සර්ගේ ලැවරොෆ් මහතාගේ ලංකා සංචාරය හරහා පැහැදිලිවූ වැදගත්ම කරුණ විය.
විශේෂයෙන්ම ශ්‍රී ලංකාව සමග ආර්ථික හා ආරක්ෂක සබඳතා ශක්තිමත් කරලීම පිළිබඳව රුසියා රජයේ වැඩි අවධානයක් යොමුව ඇති බව, රුසියානු විදේශ අමාත්‍යවරයා මෙරට ජනපති සමග පවතී සාකච්ජාවේදී අනාවරණය විය.
චීනය පමණක් නොව රුසියාවද, බාහිර විදෙස් බලවේගයන්ගෙන් ශ්‍රී ලංකාව ආරක්ෂා කරලීමට ඉදිරිපත් වී සිටීමද සුවිශේෂී කරුණක් විය. කලකට ඉහතදී, එනම් 2015 වසරට කලින් නම්, මානව හිමිකම් මුල්කරගනිමින් ශ්‍රී ලංකාව වෙත අන්තර්ජාතික බලපෑම් එල්ල වූ සෑම අවස්ථාවකදීම මෙන් චීනය හා රුසියාව ශ්‍රී ලංකාවේ සහායට ඉදිරිපත් විය. විශේෂයෙන්ම ජගත් සංවිධානය තුළදී මෙම සහාය පුළුල් ලෙසම අප වෙත ලැබිණි. නමුත් පසුගිය රජය සමයේ, මෙරටට එරෙහි මානව හිමිකම් යෝජනාවන් සඳහා අනුග්‍රහය දැක්වීමට ශ්‍රී ලංකා රජයම ඉදිරිපත්වීම නිසා මෙම සහාය හා ඉදිරිපත්වීම අවම විය.
දැන් යළිත් එම දෙරටම, මිත්‍රත්වයේ හා සහෝදරත්වයේ දෑත් දිගු කරමින් පෙර දුන් එම සහාය යළි මෙරට වෙත ලබාදීමට ඉදිරිපත්ව සිටීම නව රජයේ ජයග්‍රහණයක් බව කිව යුතුමය.
ශ්‍රී ලංකාවට බලපෑම් කිරීමට පිටස්තර බලවේගයකට ඉඩ නොදෙන බවට චීන විදෙස් ඇමැති මෙන්ම, රුසියා විදෙස් අමාත්‍ය සර්ජි ලැවරොෆ් මහතාද ඍජුවම ප්‍රකාශ කර සිටියේය.
ජනපති ගෝඨාභය රාජපක්ෂ මහතා සමග පැවැති සාකච්ඡාවේදී ලවරෝෆ් මහතා වැඩිදුරටත් ප්‍රකාශ කර සිටියේ ශ්‍රී ලංකාවට ඉදිරියටත් ආයුධ සහ යුද්ධෝපකරණ ලබාදීමට රුසියාව කටයුතු කරන බවකි.
එසේම ශ්‍රී ලංකා හමුදාවේ සතුරන් සමග යුද වැදීමට අවශ්‍ය සහය, යුද ශක්තිය වර්ධනය කර ගැනීමට අවශ්‍ය සහයත් රුසියාව ලබාදෙන බව මෙහිදී රුසියා විදේශ අමාත්‍යවරයා අවධාරණය කළේය.
පාස්කු ප්‍රහාරයට සම්බන්ධ පුද්ගලයින් අත්අඩංගුවට ගැනීමට රුසියාව පූර්ණ සහාය ලබාදෙන බවත් එවන් ත්‍රස්තවාදී ප්‍රහාර වැළැක්වීමට ගත හැකි පියවරයන් පිළිබඳවද රුසියාව අවධානයකින් පසුවන බවත් ලැවරෝෆ් මහතා මෙහදී දැනුම් දී සිටියේය.
මෙරට සමඟ ඇති ආර්ථික සබඳතා තවදුරටත් ශක්තිමත් කරගැනීමටද රුසියාවේ ඇති කැමැත්ත මෙහිදී වඩාත් අනාවරණය විය. විශේෂයෙන්ම ලැවරෝෆ් මහතා මෙහිදී ප්‍රකාශ කලේ දෙරට අතර සංචාරක ක්ෂේත්‍රයේ සබඳතා තවදුරටත් වර්ධනය කරගත යුතු බවකි.
ඇමෙරිකාව රුසියාව චීනය පමණක් නොව මේ දිනවල ජපානය, ඉන්දියාව වැනි රටවල්ද මෙරට වෙත විශේෂ අවධානයක් යොමුකරමින් සිටින බව දක්නට ඇත. එම රටවල නියෝජිතයින් මෙරට සිදු කරන නිරන්තර සංචාර හරහා මෙය වඩාත් පෙන්නුම් කෙරේ.
ලොව ධනවත් හා බලවත් රාජ්‍යවල අවධානය හා උනන්දුව මෙලෙස මෙරට වෙත මෙන්ම නව රජය වෙතද යොමු වෙමින් තිබීම සුබ පෙරනිමිත්තකි. විටෙක එකිනෙකට පරස්පරවද යන මෙම රාජ්‍ය සමඟ පවතින සබඳතා නිවැරදිව කළමනාකරණය කරගනිමින් ඉදිරියට යෑමට නව රජයට හැකිවුවහොත්, සුබ පෙරනිමිත්ත ජයග්‍රාහී අවසානයක් කරා යොමු කරගැනීමට අවස්ථාව උදාවනු ඇත.
