2010 සිට 2014 වසර දක්වා යතුරුපැදියෙන් කිලෝමීටර් ලක්ෂ දෙකහමාරකට අධික ප්‍රමාණයක් රටවල් අසූවක් තුළින් ගමන් කළ ආකාරය හා මධ්‍යම ඇමරිකාවේ සිට දකුණු ඇමරිකාව කරා ගමන් කිරීමට මාර්ගයක් නොමැති වීමත්, තෙප්පමක් සාදාගෙන යතුරුපැදිය සමඟ කිලෝ මීටර් අටසීයක් පමණ පැසිෆික් සාගරය හරහා යෙදුණු ත්‍රාසජනක ගමන පිළිබඳව ඩිලන් මෙම වැඩමුළුවේ දී කතාබහ කොට ඇත.
“අප ජීවත්වන්නේ මේ polex ප්‍රොලෙක්ස් වාහන වර්ගයේ රථයේ. මෙම රථය මම ගත්තේ ස්විස් ෆ්රෑන්ක් 13,000කට. පසුව අපි එය ගෙයක් විදිහට නිර්මාණය කළා. අපේ මෙම නිවසේ ඇඳක් තිබෙනවා,දවල්ට පුළුවන් එය තප්පර කිහිපයකින් සෝපාවක් බවට පත් කරන්න, උයන්න පොඩි කුස්සියක් තියෙනවා, මාටිනාට හොඳට උයන්න පුළුවන්, වාහනයෙ ඇල්වතුර, මෙන්ම උණු වතුරත් තිබෙනවා, ලීටර් විස්සක් පමණ වන උණුවතුර බොයිලරයෙ වතුර රත් වන්නේ වාහනය ගමන් කරන විටයි.”
ඩිලන් සහ ඔහුගේ බිරිය වන මාටිනාගේ රෝද උඩ ජීවිතය පිළිබඳ වැඩිදුර තොරතුරු දැනගැනීම සඳහා දින නියම කොට තිබුණේ පසුගිය සදුදා (13) අටටය. හරියටම රාත්‍රී 8.00ට ඔහු වට්ස්ඇප් මඟින් ඇමතූ විට, “සුනේත්‍රා, ඔයාට අපත් සමග කතා කරන්න කොපමණ වේලාවක් අවශ්‍ය දැයි” ඩිලන් අසා සිටියේය. එවිට මා සිතුවේ ඩිලන්ට එතරම් වේලාවක් කතා කිරීම සඳහා නොමැති බැවින් ඔහු එසේ ඇසූවා වන්නට විය හැකි බවයි. අඩුම තරමින් පැයක් වත් අවශ්‍ය බව දන්නා මා ඔහුට කිව්වේ වැඩිම වුණෙ විනාඩි තිහක් යයි කියාය. එහෙනම් කමක් නෑ, එතකොට මාටිනාට පුළුවන් අපේ රෑ කෑම මෙතන හදන්න , යැයි ඩිලන් නැවත කිව්වේ ඔහුගේ රෝද හතරේ ජීවිතයේ තවත් එක්තරා දිනයක නිමාව සටහන් කරමිනි.
ජර්මනියේ දේශනයක් නිමා කොට ඩූසල් ඩොර්ෆ් (Düsseldorf) පළාත හරහා යමින් සිටියදී ඔහු අප සමඟ සිය රෝද උඩ ජීවිතය පිළිබඳ විස්තර කරන්නට විය.
ඩිලන් හා අප අතර සබඳතාව වසර 11ක් තරම් ඈතට දිවයයි. ස්විට්සර්ලන්තයේ ග්ලාරූස් පළාතට පැමිණි මුල් අවදියේ අප හමුවූ ඩිලන් තේ පානය සඳහා සිය නිවසට පැමිණෙන ලෙස ආරාධනා කළේය. එම අවස්ථාවේදී ඔහු ජීවිතය හා ඉදිරි බලාපොරොත්තු පිළිබඳ අප හා යන්තමින් කියා තිබිණි.
වත්තල ශාන්ත අන්තෝනි විද්‍යාලයේ ඉගෙනුම ලැබූ ඩිලන් සමරවික්‍රම කුඩා කල සිටම වික්‍රම පාන්නට සහ ත්‍රාසජනක අත්දැකීම් වලට මුහුණ දීමට උනන්දුවක් දැක්වූයේය. මාර්ටින් වික්‍රමසිංහයන්ගේ මඩොල්දූව ඔහුගේ මනස තවත් තීවුර කළ පොතක් විය. දෛවයේ සරදමකට මෙන් ඩිලන්ට සිය පියාගේ ජීවිතය අහිමිවීම පිළිබඳ විස්තර කරන්නට වන්නේ ද ත්‍රාසජනක සිදුවීමක් ලෙස ය. ඔහුගේ පියා මිය යන්නේ දුම්රියක් තුළදී සොරුන් දෙදෙනකුගේ පිහි පහරකට ගොදුරු වීමෙනි. එවිට ඩිලන් ගේ වයස අවුරුදු හයක් පමණි. මවත් සහෝදරයන් හතර දෙනාත් සමඟ සිය ළමා කාලය ගතකරන ඩිලන් වැඩිදුර අධ්‍යාපනය සඳහා එංගලන්තයට බලා පිටත්ව යයි.
වසර දෙකකට පසු...
වසර දෙකකට පසුව ඔහු ස්විට්සර්ලන්තයට පැමිණෙයි. කාර්මික විද්‍යාව පිළිබඳ පාඨමාලාවක් හදාරන ඔහු තමන්ටම කියා වාහන අලුත්වැඩියා කරන ස්ථානයක් පවත්වාගෙන යෑමට සමත් වේ. ඔහු 2008 දී අපට හමු වන්නේ ඒ අතරතුරදීය. 2010 වසරේදී ඩිලන් යළිත් අප හමු වූ අතර එහිදී ඔහු සිය නව වික්‍රමාන්විත සැලසුම් පිළිබඳ කතාබහ කළේය. ග්ලාරූස්හි ඔහු සතුව තිබූ සියලු වත්කම් විකුණා දැමූ ඩිලන් යතුරු පැදියකින් ලෝකය පුරා සංචාරය කිරීමට යන බව කීවේය. රටවල් අසූවක් හරහා ගමන් කළ ඔහු, ඔහුගේ ජීවිතය පිළිබඳ පොතක් හා චිත්‍රපටයක් දැනටමත් එළිදක්වා තිබේ. වසර දහයකට පමණ පසුව 2020 ජනවාරි දෙවන සතියේ ඩිලන් හා අපි යළිත් මුණ ගැසුනෙමු. ඒ When the road ends නැමැති ඔහුගේ නවතම වාර්තාමය චිත්‍රපටය ග්ලාරෑස්හි ප්‍රදර්ශනය කිරීමට සැලසුම් කරන අතරතුරදීය. 2010 වසරේදී ඔහු ලෝකය වටා යතුරු පැදියකින් ගමන් කිරීම හා අවසානයේ දී පැසිපික් සාගරයේ අතරමං වීම වටා ගෙතුණු මෙම චිත්‍රපටිය මීට පෙර ඔහු පොතක් ලෙසද පළකොට ඇත. එමඟින් ඩිලන් දිනාගත් ජනතා ප්‍රසාදය සුළුපටු නොවේ. ඔහු පිළිබඳව ස්විට්සර්ලන්තයේ ප්‍රධානතම මාධ්‍ය කිහිපයක්ම තොරතුරු වාර්තා කළේය. ඔහු විවිධ වැඩසටහන් වල ආරාධිතයකු ලෙස ද සහභාගී විය.
ජාත්‍යන්තර මාධ්‍ය ඔහුගේ මෙම වික්‍රමාන්විත හා ත්‍රාසජනක ගමන පිළිබඳ වාර්තා කළේය. ග්ලාරූස් වෙත පැමිණි ඔහු හා ඔහුගේ බිරිඳ වන මාටිනා අප නිවසට පැමිණීමට ද අමතක කළේ නැත. සති කීපයක් ශ්‍රී ලංකාවේ ගත කොට පැමිණි ඩිලන් හා මාටිනා සිය ගමන පිළිබඳ සතුටින් කතා කරන්නට වූහ. එමෙන්ම තම අත්දැකීම් ඇසුරෙන් ශ්‍රී ලාංකිකයින්ට කිසියම් සේවාවක් කිරීමට ප්‍රබල උවමනාව ද ඔහු සමඟ කල කතාබහේ දී වඩාත් ඉස්මතු වී පෙනිණි. ශ්‍රී ලංකාවේ ජීවත් වෙන තරුණ තරුණියන්ගේ ධනාත්මක චින්තනය ඉහළ දැමීමේ ඇති වැදගත්කම පිළිබඳව අප සාකච්ඡා කළෙමු. එම කාර්ය ඩිලාන් දැනටමත් ආරම්භ කොට ඇති අතර දිවිමග ජය බිමට දිවිය පොදක් ලෙසින් වැඩමුළු කිහිපයක් පැවැත්වීමට ඔහු සමත්වී තිබේ..
2010 සිට 2014 වසර දක්වා යතුරු පැදියෙන් කිලෝමීටර් ලක්ෂ දෙකහමාරකට අධික ප්‍රමාණයක් රටවල් අසූවක් හරහා ගමන් කළ ආකාරය හා මධ්‍යම ඇමරිකාවේ සිට දකුණු ඇමරිකාව කරා ගමන් කිරීමට මාර්ගයක් නොමැති වීමත්, තෙප්පමක් සාදාගෙන යතුරු පැදිය සමඟ කිලෝ මීටර් අටසීයක් පමණ පැසිෆික් සාගරය හරහා යෙදුනු ත්‍රාසජනක ගමන පිළිබඳව ඔහු මෙම වැඩමුළුවේ දී කතාබහ කොට ඇත.
විස්මයජනක අත්දැකීම්...
අප හමුවී යළි ග්ලාරූස්වලින් පිට වූ ඩිලන්ට විස්මයජනක අත්දැකීමකට මුහුණපාන්නට සිදුවිය. ඔහු පසුගිය ජනවාරි එකොළොස් වැනිදා සිංහල භාෂාවෙන් ෆේස්බුක් පිටුවක් නිර්මාණය කළ අතර ඊට පැය කිහිපයක් ඇතුළත දී like ලයික් 15000ට අධික සංඛ්‍යාවක් හිමි විය. තමා like ලයික් පසුපස දුවන්නෙකු නොවූවත් ලාංකික ජනතාවගෙන් ලැබුණු මෙම ප්‍රතිචාරයෙන් තමා විශ්මයට පත්වූ බව ඩිලන් කීවේය.
‘රෝද උඩ ජීවිතය’ ලෙස ඔහු සිය ෆේස්බුක් පිටුව නම් කොට තිබිණි. වසර 4ක කාලයක සිට ස්විට්සර්ලන්තයේ සිය නිවෙස අතහැර වාහනයක ගෙවන ජීවිතය පිළිබඳ දැනුවත් කිරීම මෙම ෆේස්බුක් පිටුවේ අරමුණ විය.
“2016 ඉඳන් අපි වෑන් රථයක් හරහා යුරෝපය වටා සංචාරය කරන්න පටන් ගත්තා, අප ජීවත්වන්නේ මේ polex ප්‍රොලෙක්ස් වාහන වර්ගයේ රථයේ. මෙම රථය මම ගත්තේ ස්විස් ෆ්රෑන්ක් 13,000කට. පසුව අපි එය ගෙයක් විදිහට නිර්මාණය කළා. අපේ මෙම නිවසේ ඇඳක් තිබෙනවා,දවල්ට පුළුවන් එය තප්පර කිහිපයකින් සෝපාවක් බවට පත් කරන්න, උයන්න පොඩි කුස්සියක් තියෙනවා, මාටිනාට හොඳට උයන්න පුළුවන්, වාහනයෙ ඇල්වතුර, මෙන්ම උණු වතුරත් තිබෙනවා, ලීටර් විස්සක් පමණ වන උණුවතුර බොයිලරයෙ වතුර රත් වන්නේ වාහනය ගමන් කරන විටයි. ඒ වතුර තමයි අපි නාන්න, කෑම පිසීමට වෙනත් අත්‍යවශ්‍ය කටයුතු සඳහා යොදා ගන්නේ...”
‘සරල ජීවිතය’ නමින් කෘතියක්...
සිය රෝද හතරේ ජීවිතය පිළිබඳ මාටිනා දැනටමත් සරල ජීවිතය නමින් කෘතියක් ජර්මානු භාෂාවෙන් පළ කොට තිබේ.
ඩිලන්ගේ අමුතුම වික්‍රමාන්විත ජීවිතය පිළිබඳ සිංහල භාෂාවෙන් ෆේස්බුක් පිටුවක් මඟින් තොරතුරු පළ කරන ලෙස බොහෝ පිරිස් ඉල්ලා තිබේ. ඔහු රෝද උඩ ජීවිතය නමින් නව ෆේස්බුක් පිටුවක් නිර්මාණය කළේ ඒ අනුවය..
ඩිලන්ගේ හා මාටිනාගේ මෙම ජීවිතය යුරෝපීයන්ට එතරම් විශාල විමතියක් ගෙන නොදුන්නොත් ශ්‍රී ලාංකිකයින්ට එය අමුතුම අත්දැකීමක් වනවා පමණක් නොව ප්‍රශ්න රාශියක් මතු කරන එකක් වී තිබේ. ඒ අතුරින් ප්‍රධාන වන්නේ මෙලෙස ජීවත් වෙමින් මුදල් උපයා ගන්නේ කෙසේද යන්නයි... මෙම ප්‍රශ්නයට ඩිලාන්ට ඇත්තේ සරල පිළිතුරකි.
“ඔබ ජීවත් වෙන විදිහටම තමයි අපි ජීවත් වෙන්නේ, ඔයගොල්ලොන්ට නිවහනක ජීවත් වෙනවා, අපි වෑන් රථයක ජීවත් වෙනවා, මමත් මාට්නාත් පොත් වලින් මුදල් උපයනවා, දේශනවලින් හා චිත්‍රපට ප්‍රදර්ශන වලින් මුදල් උපයනවා, ඒ විතරක් නෙමෙයි අපි ඒ උපයන මුදල් වලට ස්විට්සර්ලන්ත රජයට ආදායම් බදුත් ගෙවනවා, ස්විට්සර්ලන්තයේ ජීවත්වෙන අනෙක් අය වගේම අපි මාසිකව වෛද්‍ය රක්ෂණ මුදල් ගෙවනවා, අපිට ඒ සඳහා පාවිච්චි කරන්නේ මාටිනාගෙ අම්මගේ නිවසේ ලිපිනයයි. අපේ උවමනා සරලයි. ඒක විශාල වෙනසක්,
ඒ අතරතුර මා හට තවත් ප්‍රශ්නයක් පැන නැගිණි.වසර 4ක කාලයක සිට කිලෝමීටර් ලක්ෂ 2 කට ආසන්න සංඛ්‍යාවක් මෙම රථය ඩිලාන් තනිවම පැදවූවාද යන්නයි. “සියයට අනූවක් විතර පදින්නේ මම, මට වෙනත් වැඩ වැඩක් තිබුණොත් විතරක් නායිකා වාහනය පදවන්නේ. ඒ වෙලාවට මම කරන්නේ, ඊමේල් බලනවා, ෆේස්බුක් බලනවා, ලිපියක් ලියනවා වගේ දේවල්......“
ඩිලන්ගේ හා මාටිනාගේ මේ සරල ජීවිතය සඳහා වූ මාර්ගයේ අහම්බෙන් පහළ වූවක් නොවේ. ස්ව්ට්සර්ලන්තය වැනි රටක යහමින් මුදල් උපයාගෙන සුඛෝපභෝගී ජීවිතයක් ගත කිරීමට අවස්ථාව තිබුණත්, සරල ජීවිතේට ඔවුන් හුරු වී ඇත්තේ බෞද්ධ දර්ශනයේ අත්හැරීමේ ප්‍රධාන මූලධර්මයට අනුකූලවය. අත්හැරීම රැස්කිරීමට වඩා ශ්‍රේෂ්ඨ බව මෙම දෙපළ ලෝකය හමුවේ තවදුරටත් තහවුරු කරමින් සිටිති.
සේයාරූ - ශෂි සුබ්‍රමනියම්
