මෙවර ස්වාධීන අපේක්ෂකයකු ලෙස ජනාධිපතිවරණයට ඉදිරිපත් වන ඒ. එල්. එම්. ඒ. හිස්බුල්ලා මහතා ලබාගන්නා ඡන්ද ප්‍රමාණය ජනාධිපතිවරණයේ ප්‍රධාන අපේක්ෂකයන් දෙපළගේ ජයග්‍රහණයට තීරණාත්මක ලෙස බලපාන බව කාත්තන්කුඩි නගරාධිපති ෂාහුල් හමීඩ් මොහොමඩ් අස්ෆර් මහතා පවසයි. ජනපති අපේක්ෂක හිස්බුල්ලා මහතාගේ ප්‍රධාන අනුගාමිකයෙකු වන අස්ෆර් මහතා එසේ පැවැසූයේ සිළුමිණ සමඟ කළ විශේෂ සාකච්ඡාවකදී ය.
●හිටපු ආණ්ඩුකාර හිස්බුල්ලා මහතා මෙවර ජනාධිපතිවරණයට ඉදිරිපත් වීමේ මූලික අරමුණ කුමක් ද?
හිස්බුල්ලා මහතාගේ මූලිකම අරමුණ ඊළඟ ජනාධිපති වීම නම් නොවෙයි. ජනතා විමුක්ති පෙරමුණත් මෙදා සැරේ වෙනම ඡන්දය ඉල්ලනවනේ. ඒක නිසා අපේ අදහස තමයි ප්‍රධාන අපේක්ෂකයන් දෙදෙනාටම සියයට පනහ බැඟින් ගන්න බැහැ කියලා. අන්න ඒ අවස්ථාවේදි අපේ අපේක්ෂකයා ගන්නා ඡන්ද ප්‍රමාණය තීරණාත්මක වෙනවා. එම තීරණාත්මක අවස්ථාවේදී අපි, අපේ බලය පෙන්වනවා.
●කොහොමද ඔබලාගේ බලය පෙන්වන්නෙ...?
අපි, අපේ ජනතාවට කියන්නෙ පළමු මනාපය හිස්බුල්ලා මහතාට ලබා දී දෙවැනි මනාපය කිසිදු ලෙසකින් නොදි ඉන්න එපා කියලයි. අනිවාර්යයෙන්ම තමන් කැමැති කාට හෝ දෙන්න කියලයි අපි කියන්නේ. ඒ බව හිස්බුල්ලා මහතාත් පුන පුනා රැස්වීම්වලදී පැවැසූවා. 
●එහෙත් සමාජ මාධ්‍යයන්හි 'කැම්පේන්' කරන ඔබලාගේ අනුගාමිකයන් දිගින් දිගටම සඳහන් කර තිබුණේ, පොහොට්ටුවේ අපේක්ෂකයාට දෙවැනි මනාපය ලබා දෙන්න කියලයි. ඔබ ඒ ගැන කුමක්ද පවසන්නෙ..?.
නෑ... නෑ... අපි කිසිම කෙනෙක් කිසිම වෙලාවක එහෙම කියන්නෙ නෑ. ගිය සතියේ එක්තරා පුවත්පතක එහෙම සඳහන් වෙලා තිබුණා. අපි ඒ පුවත්පත කළ සඳහනට එරෙහිව මැතිවරණ කොමිසමටත් පැමිණිලි කළා. ඊට අමතරව අධිකරණයටත් ගියා. මම නැවතත් කියනවා, අපේ කිසිම කෙනෙක් එහෙම කීවේ නෑ. කවදාවත් කියන්නෙත් නෑ.
●එහෙනම් ඔබලා දෙවැනි මනාපය ගැන කී ඇත්ත කුමක් ද?
ඒක තමයි, අංක 1 හිස්බුල්ලා මහත්තයා. අංක 2 සජිත් හෝ ගෝඨාභයට. මේ දෙදෙනාගෙන් කැමැති අය කැමැති ආකාරයෙන් ඡන්දය දෙන්න කියපු කතාව.
● ප්‍රධාන අපේක්ෂකයන් දෙදෙනා වන ගෝඨාභය මහතා සමඟ ඔබ කණ්ඩායමට තිබෙන රහස් ගනුදෙනුවක් ගැන බොහෝ සේ සමාජ මාධ්‍යයන්හි කතාබහක් ඇතිවුණා. ඒක ඇත්ත ද?
නෑ. අපට එහෙම කිසිම සම්බන්ධයක් හෝ ගිවිසුමක් නෑ. ඒ සියල්ල අපට එල්ල වන මඩ ප්‍රහාර. එහෙමනම් අපි කෙළින්ම කියනවානේ දෙවැනි මනාපය ගෝඨාභයට ලබා දෙන්න කියලා.
●ඔබ කෙසේ පැවැසුවත් හිස්බුල්ලා මහතා ජනාධිපතිවරණයට ඉදිරිපත් වීමේදී යම්කිසි ආකාරයකින් සැඟවුණු බලවේගයක් සිටින බවට මත පළ වෙනවා...
එහෙම කිසිම දෙයක් නැහැ. අපේ එකම අරමුණ දෙවැනි මනාපය හරහා පත්වන ඕනෑම ජනාධිපතිවරයකුට අපේ සහයෝගය ලබාදීමයි.
●ඔබලාගේ ගණනයන් අනුව හිස්බුල්ලා මහතා ලබාගන්න ඡන්ද ප්‍රමාණය ගැනත් හිතලා තියෙනවා ද?
අපි කොහොමහරි බලන්නෙ දෙවියන්ගේ පිහිටෙන් ලක්ෂ පහකට වැඩිය ගන්නයි. එහෙම වුණොත් ඒක අපි ලබන ලොකු ජයග්‍රහණයක්.
●හිස්බුල්ලා මහත්තයා ලක්ෂ පහකට වැඩි ඡන්ද ප්‍රමාණයක් ගත්තොත් එහි වාසිය වක්‍රාකාරයෙන් හෝ අත්වන්නෙ කාට කියාද හිතන්නෙ?
අපි දන්නෙ නෑ ඒ වාසිය කාට යයිද කියා. නමුත් අපි දෙවැනි මනාපය කැමැති කෙනෙකුට දෙන්න කියලයි තියෙන්නෙ. හැබැයි එතැනදි කිසිම කෙනෙකුට සියයට පනහ ගන්න බැරි නිසා අපේ මනාපය ගැන හිතන්න වෙනවා. අපේ ජනතාව දෙවැනි මනාපය වැඩිපුර භාවිත කර තිබෙන්නෙ කාට ද? ඔහුට අපේ සහයෝගය දෙනවා. එහිදී අපිට සජිත් හෝ ගෝඨාභය කියා වෙනසක් නැහැ. අපි මේ දෙන්නටම අපේ යෝජනා පසුගිය දිනවල ලබා දුන්නා. දෙන්නම බාරගත්තා. ඒ දෙපිරිසටම අපි කීවා, ගිවිසුමක් අත්සන් කරන්න ඕනෙ කියා. නමුත් දෙපිරිසම කීවා ගිවිසුම් අත්සන් කරන්න කල් අවශ්‍ය වෙනවා. ඒකට දැන් වෙලාව මදියි කියා. අන්න ඒ නිසා අපේ ජනතාවට අපි කිව යුතුයි නේ කාට හෝ දෙවැනි මනාපය දෙන්න කියා. එතැනදි අපි මේ හේතුව නිසා අපේ ජනතාවට කීවා කැමැති අයෙක් කැමැති කෙනෙකුට දෙන්න කියා. හැබැයි අපේ යෝජනාවලින් අපි රට බෙදන්න ඉල්ලුවේ නෑ. අපි දෙගොල්ලන්ටම දුන් යෝජනාවලින් ඉල්ලුවේ බෞද්ධාගම වැනි අනෙකුත් ආගම්වලට දී තිබෙන අයිතින් අපිටත් දෙන්න කියායි. මොකද අපිත් ලංකාවේ ඉපදුණු අය වශයෙන් ඕනෑම ආගමකට තියෙන අයිතිය තිබිය යුතුයි.
●හිස්බුල්ලා මහතාට පසුගිය කාලයේ දැඩි සේ පහර දුන් රතන හාමුදුරුවන් වැනි පිරිස් මෙන්ම පසුගිය ජනාධිපතිවරණයට ආසන්න සමයේදීත් අලුත්ගම, දර්ගා නගරය වැනි පෙදෙස්වල ජාතිවාදය අවුස්සමින් මුස්ලිම් ජනතාවට දැඩි පීඩනයක් ලබාදුන් කණ්ඩායම මෙවරත් මැතිවරණයේදී එක් කඳවුරකට පැමිණ තිබෙන බවක් පෙනෙනවා. ඔබලා වෙනම අපේක්ෂකයෙක් ලෙස ජනාධිපතිවරණයට ඉදිරිපත් වීමෙන් එම කඳවුරට වාසියක් අත්වන්නෙ නැද්ද?
මම නම් එහෙම දෙයක් ගැන හිතන්නෙ නෑ. නමුත් දෙපැත්තේම ජාතිවාදය වපුරපු අය සිටිනවා. ඒක නිසා මේ දෙගොල්ලන්ම මේ අවස්ථාවේ අපිට එක සමානයි.
●කාත්තන්කුඩියේ පසුගිය කාලයේ බොහෝ සේ කතාබහට ලක්වූ ප්‍රදේශයක්. ජාතිවාදයට, අන්තවාදයට බොහෝ සමීප පිරිසක් සිටින බවට ප්‍රචලිතයි. මෙවර ජනාධිපතිවරණයේදී මෙරට ජන ඝනත්වය වැඩිම කාතන්කුඩියේ ඡන්දදායකයාගේ හැසිරීම කෙබඳු වේද?
කාතන්කුඩිය කියන්නෙ පාස්කු ප්‍රහාරයේ සම්බන්ධ නව දෙනාගෙන් තුන්දෙනෙක්ගේ ගම් ප්‍රදේශ. ඒ එක්කෙනෙක් දෙන්නෙක් නිසා කාතන්කුඩියේ සමස්ත ජනතාව ත්‍රස්තවාදීන්, ජාතිවාදීන්, අන්තවාදීන් ලෙස සැලැකීම වැරැදියි. මං මේ මොහොතේ කියනවා, අපේ ජනතාව කිසිදු විටෙක ජාතිවාදීන්, අන්තවාදීන් ලෙස සලකන්න එපා කියා. මෙවර මැතිවරණයේදී කාතන්කුඩියේ ඡන්ද තිස් අටදහසක් පමණ තියෙනවා. ඉන් සියයට හැත්තෑපහක්ම ලැබෙන්නෙ හිස්බුල්ලා හිටපු ආණ්ඩුකාරතුමාට. ඒක තමයි සත්‍යය. ඉතිරි ප්‍රමාණය හැමෝටම බෙදිලා යයි කියා හිතනවා.
