නව හැවිරිදි මේ පුංචි පුතා අභ්‍යාවකාශය ගැන ගුවන් යානා, රොකට් ගැන බොහෝ දැන උගත්කම් ඇත්තෙකි. තව තවත් ඒ පිළිබඳ හදාරන්නෙකි. ඔහු දැන් නාසා ආයනයේ ඔස්ට්‍රේලියාව නියෝජනය කරන ළාබාලම තානාපතිවරයායි. ඔහු නමින් මේඝ මහිම විජේවර්ධනයි.
‘මේඝ යැයි නම ඇසුණ විට සිහියට නැඟෙන්නේ එදා එනම් 1972 අවුරුද්දේ සතුට පත්තරයේ පළවූ චිත්‍ර කතාවය. මේඝ චිත්‍ර කතාව සතුට පුවත් පතට අඳින්නේ ප්‍රවීණ චිත්‍ර ශිල්පි අනුර විජේවර්ධන මහතාය. මේඝ ඇඳපු අනුරත් මේ මේඝත් අතර ඇති සම්බන්ධතාව වන්නේ ඔහු අනුරගේ මුනුපුරා වීමය. අනුර විජේවර්ධන තවමත් සිළුමිණ පුවත් පතට ධාරා නමින් චිත්‍රකතාවක් අඳියි. අනුරගේ පුතු වූ චරිත් විජේවර්ධන කලක් ලේක්හවුස් ආයතනයේ තරුණි පුවත්පතේ ප්‍රධාන නිර්මාණ හා පිටු සැලසුම් ශිල්පියා විය. දැන් ඔවුන් පදිංචිව සිටින්නේ ඔස්ට්‍රේලියාවේය.
 |
| නාසා ප්‍රධාන උපදේශක ආචාර්ය රූස්වෙල් ජොන්සන් සමඟ |
මේඝට තවම අවුරුදු නවයයි. උපන්නේ දකුණු ඔස්ට්‍රේලියාවේ ඇඩිලේට් නුවරය. සඳ තරු ග්‍රහලෝකවලට ආදරය කරන පොඩ්ඩන් මේ යුගය අනුව සොයාගැනීම මදක් අසීරුය. ඒ දැනුම් තේරුම් ඇති කාලයේ පටන්ම ජංගම දුරකතනයට රූපවාහිනියට අපේ රටේ දරුවන් යොමු වන බැවිනි. තත්ත්වය එසේ වුවද ඉගෙනුමේ උපන් හපන් දස්කම් ඇති දරුවෝ අපට හමුවෙති. ඒ අතරින් ඉගෙනුමට මෙන්ම නව දැනුම සොයන දැනුම් පිපාසයෙන් පෙළෙන දරුවෝ ද අපට හමු වෙති. පදිංචිය ලංකාවේ නොවුණත් ඔස්ට්‍රේලියාවේ පදිංචි මේඝ සැබැවින්ම අපේ රටට කීර්තියකි.
මේඝ විශේෂිත දරුවෙකි. ඒ බව කියන්නේ අප නොව ඔස්ට්‍රේලියාවේ වෛද්‍යවරුය. එරට වෛද්‍යවරු පවසා ඇත්තේ මේඝගේ මොළය ඔහුගේ වයසට වඩා අවුරුදු පහකින් වැඩුණ අයෙකුගේ මෙන් සැකසී ඇති බවය. ඒ නිසා ඔහුට පාසලේ දී අමතර දැනුමක් ලබා දෙන ලෙස ඔවුන් නිර්දේශ කර ඇත.
“මේඝ ගැන මෙතරම් දිගු විස්තරයක් ලියන්නට අප පෙලඹවුයේ පසුගියදා ඔහුට ලද තවත් ජයග්‍රහණයක් පිළිබඳ දැනගැනීමත් සමඟය. එනම් නාසා ආයතනයේ ඔස්ට්‍රේලියාව නියෝජනය කරන ළාබාලම තානාපතිවරයා ඹේඝය. මේ වන තුරු ඇමරිකාව හෝ කැනඩාව ආදි රටවල්වලින් පමණක් තානාපතිවරුන් තෝරා ගෙන ඇති අතර මේඝට මේ අවස්ථාව උදා වන්නේ ඔහුගේ බුද්ධිය දැනුම නිසාමය.
තවමත් නව හැවිරිදි වියේ පසුවන මේඝ ගැන කියන්නට ඇත්තේ කතා ගොන්නකි. මේ හැම කතාවක්ම ආවාට ගියාට කියන කතන්දර නොවේ. මේඝගේ පියා වන චරිත් තම සුවිශේෂි පුතු ගැන අපට පැහැදිලි කළේ මෙසේය.
“පුතා පුංචි කාලේ ඉඳලාම කතා කළේ සිංහල. ඒ අපි ගෙදරදි සිංහල කතා කළ නිසා. අදත් පුතා චතුරව සිංහල කතා කරනවා. අපි එයාට පොඩි කාලේ ඉඳලාම පොත් කියවන්න ගෙනැල්ලා දුන්නා. මේ රටේ දී දරුවෙකු ලැබුණාම රෝහලෙන් දෙනවා දරුවාට පරිහරණය කරන්නට පොත්. ඒ කළු සුදු රූප සහිත ඒවා. පුතා පොත්වලට හරි ඉක්මනට හුරු වුණා. ඒ නිසා අපිට එයාට මාස හයේදී අකුරු කියවන්නට සිද්ධ වුණා.
අවුරුදු දෙක වන විට පුතා පොඩි පොඩි දේවල් කියවන්න පටන් ගත්තා. සාමාන්‍යයෙන් අවුරුදු තුන වෙනකොට පුතාට පොත් කියවන්න පුළුවන්. එයා කියවන්න පුරුදු වුනේ සත්‍ය තොරතුරු තියෙන පොත්. ඒ කියන්නේ එයා ප්‍රබන්ධ කතා කියවන්න කැමති වුණේ නැහැ. මට මතකයි අපි පුතා පුංචි කාලේ එයාට බයිබලයේ එන දෙවියන් වහන්සේ ලෝකය මවලා දුන්න හැටි කියනවා. පුතා ඒ කතාවලට ගොඩක් කැමති වුණා. අවුරුදු තුන පහුවෙන කොට එයාට භෞතික විද්‍යාවේ පොඩි පොඩි සිද්ධාන්ත අවබෝධ කරගත්තා. 
මමයි බිරිඳ චමින්දියි විද්‍යාව ගැන දන්නේ නැහැ. චමින්දිගේ තාත්තා ගාල්ල රිච්මන්ඩ් විද්‍යාලයේ ඉංග්‍රිසී භාෂාවෙන් විද්‍ය විෂයන් ඉගෙන ගෙන තියෙන්නේ. පුතා ස්කයිප් ඔස්සේ සීයා සමඟ කතා කරලා දැනුම ලබාගන්නවා. පුතා හැම වෙලේම දැනුම සෙව්වා. ඔහු උදේ පාන්දර අවදි වෙලා පොත් කියවනවා. මම දැකලා තියෙන දෙයක් තමයි එයා වෙනසක් දකින්න ඕන වුණාම චිත්‍ර අඳිනවා.”
දැනුම පිපාසයෙන් පෙළෙන මේඝ පුතු මවුපියන් විසින් ඇඩිලේඩ් හි වෙස්මිනිස්ටර් පාසලට ඇතුළත් කරන ලදි. එම පාසලේදි මේඝගේ සුවිශේෂි බව තේරුම් ගත් විදුහල් බලධාරීහු ඔහු වෙනුවෙන් වෙනම අධ්‍යාපන රටාවක් ලබාදීමට කටයුතු කළහ. මේඝගේ ආසාව ඇත්තේ අභ්‍යවකාශය ගැනය. ගුවන් යානා ගැනය. මේ පිළිබඳ සොයන්නට කියවන්නට උනන්දු වූ පුංචි පුතු Future Problem-solving club ඇතුළත් කරන්නට මවුපියෝ උනන්දු වූහ.
වයස අවුරුදු හතරේදී ඔහු දකුණු ඔස්ට්‍රේලියා විශ්වවිද්‍යාලයේ අභ්‍යවකාශ විද්‍යාව පිළිබද පාඨමාලාවක් හදාරයි. ඔහුගේ ආශාව එතැනින් නිමා වන්නේ නැත. ඔහු තව තවත් අභ්‍යවකාශය ගැන උනන්දු වන්නේය. අවසානයේ චරිත්ට හා චමින්දිට සිදු වන්නේ සිය පුතු රැගෙන ඇඩිලේඩ් විශ්වවිද්‍යාලයේ භෞතික විද්‍යා මහාචාර්යවරුන් පවත්වන දේශන සඳහා යෑමටය.
“ අපට හිතා ගන්න බැහැ පුතා මේවා ගැන ඇයි මෙතරම් උනන්දු කියලා. ඒ විශ්වවිද්‍යාලයේ දේශන සඳහා මහාචාර්යවරුන් තමයි සහභාගි වෙන්නේ. අවුරුදු හයේදි පුතා ඒ කියන්නේ 2017 වසරේ Future Problem-solving club එකේ ලියාපදිංචි වෙනවා. මේ සංගමයේ සාමාජිකත්වය අරන් තියෙන්නේ ඉංජිනේරුවරුන්, විශ්වවිද්‍යාල සිසුන් මට්ටමේ අය. පුතා එහිදි වායුගෝලය පිළිබඳ පැවැති පරීක්ෂණ දෙකක් ජය ගන්නවා. එහිදි පුතා ළාබාලම කණ්ඩායමේ නායකයා වෙනවා. Airbus සමාගම හා ප්‍රංස රජය ඒකාබද්ධව කරන Acting Space ව්‍යාපෘතියේදී චන්ද්‍රිකා තාක්ෂණය භාවිත කර මුහුද මැදදී නෞකා අතුරුදන් වන ක්‍රියාවලිය වළක්වන ක්‍රම සොයා බැලූ පරීක්ෂණය ද පුතා ජය ගන්නවා. ඒ ගිය අවුරුද්දේ. 
 |
| මව සහ පියා සමඟ |
ඔවුන්ගේ ඊළඟ ව්‍යාපෘතිය වන තව වසර 200කින් පමණ පෘථිවිය හා ගැටෙන බෙනූ ග්‍රාහකය වැළැක්වීමේ මෙහෙයුමට NASA Space App Challenge සමඟ සම්බන්ධ වීමට පුතාට අවස්ථාව ලැබෙනවා. ඒ සියලු කටයුතු කරගෙන යන අතර තමයි පුතාට නාසා ආයතනයේ OSIRIS-Rex මෙහෙයුමේ තානාපතිවරයකු ලෙස අයැදුම් කරන්නට අවස්ථාව අවස්ථාව උදා වෙන්නේ.
ඒ තානාපතිකම ලැබෙන්නේ ආරක්ෂක, සමාජ සම්බන්ධතා. සෞඛ්‍යමය තත්ත්වය පිළිබඳ දිගු කාලින අධ්‍යයනයක් කළාට පස්සේ. නාසා ආයතන මඟින් පවත්වපු පරීක්ෂණයකින් ඉහළින් සමත් වීමෙන් පසුව පුතාට මේ තානාපතිකම ලැබෙනවා. ඒ අනුව, එම මෙහෙයුමේ තොරතුරු ඔස්ට්‍රේලියා ජනතාවට ලබාදීම, සමාජයෙන් මතු වන ප්‍රශ්නවලට පිළිතුර දීම ඇතුළු කාර්යයන් පැවරෙන්නේ මේඝ පුතාට.
පුතා ගැන මටත් චාමින්දිටත් හරිම පුදුමයි. පුතා මේ මොන දේ කළත් එයා ලංකාවට ආදරෙයි. එයා කියන්නේ ශ්‍රි ලාංකික වීම එයාට ආඩම්බරයක් කියලා. එයාට මේ දේවල් හැරුණ විට ගීත ගයන්න සංගීත භාණ්ඩ වාදනය කරන්න චෙස් ක්‍රීඩා කරන්න පිහිනන්න හොඳට පුළුවන්. පුතා පාසල් ක්‍රිකට් කණ්ඩායමේ නායකයා. ඒ වගේ ම ඔහු පිට පිටම මීටර් 400 දිවීමේ තරගයෙන් ප්‍රථමයා වී තිබෙනවා.” 
බාල වියේ සිටම විද්‍යාවට ආශක්ත හතර ශ්‍රේණියේ ඉගෙනුම ලබන මේ පුංචි පැංචාට ජීවිතයේ ඇත්තේ අරමුණු දෙකකි. ඔහුගේ පළමු වැනි අරමුණ වන්නේ වයස අවුරුදු පහළොව වන විට ගුවන් නියමු බලපත්‍රය ලබාගෙන සිවිල් ගුවන් නියමුවෙකු වීම හා අවුරුදු විස්ස වන විට වාණිජමය ගුවන් නියමු බලපත්‍රය ලබාගැනීමය. මේඝගේ දෙවන අරමුණ වන්නේ විශ්වවිද්‍යාල අධ්‍යාපනය ලබා අවසානයේ ඔස්ට්‍රේලියානු අභ්‍යාවකාශ මධ්‍යස්ථානයේ හා නාසා ආයතනයේ රොකට් විද්‍යාඥයෙකු වීමය. මේඝ කාලයෙන් උපරිම ප්‍රයෝජන ගන්නා දරුවෙකි. ඔහු අලුයම අවදි වී පොත පත කියවයි. ඒ අතර පාසලේ අධ්‍යයන කටයුතු ද ක්‍රීඩා ක්‍රියාකාරකම්වලද නියැළෙයි.
“ පුතා ගැන අපිට හරි ආඩම්බරයි. අපේ පුතා වැඩිහිටියන්ට වගේම පරිසරයටත් හරි ආදරෙයි. පුතාට පුංචි කාලේ ඉඳලාම උපන්දින තෑගිවලට ලංකාවෙන් එව්වේ පොත් පත්. දවසක අපේ පුතා අපේ රටට කීර්තියක් ගෙන එන බව මට විශ්වාසයි.
මේඝ පුතුගේ පියා චරිත් පවසන්නේ බලාපොරොත්තු සහගතය. අපේ රටට උරුම පුංචි මේඝට දිගු ගමනක් යන්නට අපි ද සුබ පතමු.
