සමාජයේ ඇති මාරාන්තික රෝග අතරින් පිළිකාවට ප්රමුඛස්ථානයක් හිමි වන්නේ අද වන විට පිළිකාව ශීඝ්රයෙන් ව්යාප්ත වී ඇති නිසාය. පිළිකාවට ගොදුරු වීමට ලොකු කුඩා වයස් භේදයක් නැත. ස්ත්රි පුරුෂ භේදයක් නැත. සමාජ තරාතිරමක් අවශ්ය නැත. සිත් පිත් නැති පිළිකාව කොයි මොහොතේ කවුරුන් බිලි ගනීවීදැයි කිසිවකුට කිව නොහැකිය.
පිළිකාවක් ලෙස හැඳින්වෙන්නේ ශරීරයේ සෛල පාලනය කළ නොහැකි ලෙස විභේදනය වීමේ වේගය වැඩි වු අවස්ථාවක් ය. ඕනෑම මිනිස් සිරුරක සෛල බෙදීම සිදු වන අතර ඒ ආකාරයට ම සෛල මිය යෑමද සිදු වේ. එම ක්රියාවලිය සමතුලිත ආකාරයෙන් සිදු වන අතර එය නියාමනය කරනු ලබන්නේ ජානවලිනි. එලෙස පාලනය කළ නොහැකි ලෙස සෛල විභේදන වේගය වැඩි වීමට හේතු වන්නේ අප සිරුරේ සෛලවල පවතින ඇතැම් ජානයන්හි ඇති වන විකෘතිතා වේ. එහෙත් ජානවල විකෘතිතාවක් නිසා සෛල බෙදෙන වේගය වැඩි වී මිය යන සෛල ප්රමාණය අඩු වේ. පිළිකාවක් ලෙස හැඳින්වෙන්නේ එයයි.
ආචාර්ය සමීර ආර්. සමරකෝන් |
පෙණහලු පිළිකා, මුඛ පිළිකා, පියයුරු පිළිකා, ගර්භාශ පිළිකා, පුරඃස්ථි ග්රන්ථි පිළිකා ආදි වශයෙන් පිළිකා වර්ග රැසක් තිබේ. ඒ හැර මොළයේ ද ඇසේ ද පාදවල ද ගුද මාර්ගයේ ද ආහාර මාර්ගයේ අන්ත්රවල ද ඇතුළු සිරුරේ ඕනෑම තැනක පිළිකා ඇති විය හැකිය. පිළිකාවක් යනුවෙන් හැඳින්වෙන එම වේගයෙන් වර්ධනය වන විකෘති සෛල පාලනය කිරීම ඉතා අසීරුය.
පිළිකා සෛල පාලනය කළ හැක්කේ විකෘති සෛල වර්ධනය වන කොටස ශරීරයෙන් ඉවත් කිරීමෙනි. ඒ හැර කීමෝ (රසායනික) ප්රතිකාර සහ විකිරණ ප්රතිකාර ක්රම මඟින් එම සෛල විනාශ කළ හැකිය. එහෙත් එම විකෘති පිළිකා සෛල අතර විනාශ වී නොයන, කෙටි කලක් නිද්රෝපගතව හිඳ යළි හිස ඔසවන දඩබ්බර සෛල සුළු ප්රමාණයක් ද ඇත. එකී සෛල හැඳින්වෙන්නේ “පිළිකා පියවි සෛල” යනුවෙනි.
කීමෝ ප්රතිකාර හෝ විකිරණ ප්රතිකාර ලබා දී හය මාසයක් වැනි කෙටි කාලයක් ගත වූ පසුව “පිළිකා පියවි සෛල” නැවතත් සිය ව්යාප්තිය ආරම්භ කරයි. පිළිකා පියවි සෛල, ඖෂධ මඟින් පාලනය කර විනාශ කිරීම එතරම් පහසු නැත. යම් හෙයකින් පිළිකා සෛල වර්ධනය වීම මුල් අවස්ථාවේදීම හඳුනාගත් විට පිළිකා සෛල විනාශ කළ හැකි වුවද බොහෝ දෙනෙකුගේ පිළිකාව හඳුනා ගනු ලබන්නේ මුල් අවස්ථාවේදී නොවේ. කොපමණ ප්රතිකාර කළ ද පිළිකා පියවි සෛල කලක් සැඟවී සිට යළි ක්රියාශීලී වන බැවින් වර්ධනය වු පිළිකා මර්දනය කිරීම තරමක් අපහසු වේ.
“අද වන විට පිළිකාව ලෝකයට ම තර්ජනයක් වෙලා. පිළිකාව වැලඳිලා මිය යන රෝගීන් ගණන දවසෙන් දවස ඉහළ යනවා. ඒත් ඇතැම් පිළිකා සම්පුර්ණයෙන්ම මර්දනය කරන්න ලෝකයේ දැනට තිබෙන බෙහෙත් ප්රමාණවත් කාර්යක් ඉටු කරන්නේ නෑ. ලෝකයේ බොහෝ රටවල් පිළිකාව මර්දනය කරන්න, විනාශ කරන්න නව බෙහෙත් සොයාගැනීමේ පර්යේෂණවල නිරත වී සිටිනවා. ඒ නිසා මා ඇතුළු මගේ පර්යේෂණ කණ්ඩායමත් තීරණය කළා ලංකාවෙනුත් පිළිකාව විනාශ කිරීමේ පර්යේෂණ කරන්න. ඒ සඳහා අවශ්ය විද්යාගාර පහසුකම් කොළඹ විශ්වවිද්යාලයේ ජෛව රසායන අණුක ජීවවේද ජෛව තාක්ෂණ ආයතනයේ ස්ථාපනය කළා. පිළිකා නාශක ගුණ සහිත ගස් පොතු, කොළ, ගෙඩි වර්ග ගැන අපේ දේශීය වෙදකමේ සඳහන් වෙනවා. ඒ නිසා අපි හිතුවා අපේ රටට ආවේණික ගස් කොළන්වලින් ප්රතිපිළිකාකාරක ගුණ තහවුරු කරගැනීම වඩාත් සුදුසුයි කියලා. දේශීය දේවල්වලින් ඖෂධයක් සොයා ගත්තොත් එය නිෂ්පාදනය කිරීමට යන වියදමත් අඩු වෙනවා. ඒ වගේම අතුරු ආබාධ අවම කරගන්නත් පුළුවන්.,,
“අපේ රටේ ඖෂධීය ගුණ සහිත අපේ රටට ආවේණික ශාක වර්ග 800 ගණනක් තිබෙනවා. 2003 ඉඳලා ලංකාවෙත් පිළිකා නාශක ගුණ සහිත ඖෂධ ගැන විවිධ මට්ටමේ පර්යේෂණ සිදු කරනවා. මේ සම්බන්ධයෙන් මම පර්යේෂණ කරන්න පටන් ගත්තේ 2014 ඉඳලා.” යනුවෙන් පවසමින් සාකච්ඡාවට ප්රවීෂ්ට වූයේ කොළඹ විශ්වවිද්යාලයේ ජෛව රසායන අනුක ජීවවේද ජෛව තාක්ෂණ ආයතනයේ කථිකාචාර්ය ආචාර්ය සමීර ආර්. සමරකෝන් ය. මේ අනුව ඔහු කටුපිල, කොහොඹ වැනි ශාකවල පොතු සහ පත්ර සිය පර්යේෂණවලට යොදාගත්තේය. එම පරීක්ෂණවලින් ඔහු සාර්ථක ප්රතිඵල අත් කරගත්තේ ඒවායේ ප්රති පිළිකාකාරක ගුණ ඇති බව තහවුරු කරමිනි. දැනට ලෝකයේ පිළිකා සඳහා භාවිතාකරන බොහෝ ඖෂධ නිපදවා ඇත්තේ ශාකවලින් වෙන් කරගත් රසායනික සංයෝග භාවිතයෙනි. ඉන් අනතුරුව ඔහු ගොරකා ගසේ පොතු උපයෝගි කරගනිමින් පිළිකා පියවි සෛල විනාශ කිරිමේ ගුණ ගැන පරීක්ෂණ කිරීමට අත ගැසුවේ 2014 වසරේදීය. 2014 වසරේ ආරම්භ කළ පිළිකා පියවි සෛල මර්දනය කිරීමට සමත් දේශීය ශාක යොදාගැනීමේ පර්යේෂණවලට මූල්ය අනුග්රහය ලබා දුන්නේ ජාතික පර්යේෂණ සභාවයි. අද වන විට ඔහු එයින් ද සාර්ථක ප්රතිඵල ලබාගෙන සිටී.
“අපේ පරීක්ෂණවලට අවශ්ය පිළිකා සෛල වර්ග 35ක් විතර අපේ විද්යාගාරවල තැන්පත් කර තිබෙනවා. අපි එම සෛල විද්යාගාර තුළ වගා (culture) කරනවා. ඒ හැර පිළිකා රෝහලෙනුත් රෝගීන්ගේ සෛල ලබාගන්නවා. ගොරකා පොතු මූලික කරගත් පර්යේෂණ වලට මම යොදා ගත්තේ පියයුරු පිළිකාවල ට්රිපල් නෙගටිව් කාණ්ඩයේ පිළිකා සෛල. අද කාන්තාවන්ට බහුලව හටගන්නේ පියයුරු පිළිකාව. පියයුරු පිළිකාවේ ට්රිපල් නෙගටිව් කියන පිළිකා වර්ගය භයානකම පිළිකා වර්ගයක් ලෙස සැලකෙන්නේ දැනට පියයුරු පිළිකා සුව කිරීමට භාවිත වන හෝමෝන ප්රතිකාර ක්රම පවා එම පිළිකා වර්ගය සඳහා භාවිත කළ නොහැකි නිසයි. ඒ නිසයි මම ඒ සෛල වර්ගය ගොරකා පොතු සම්බන්ධයෙන් කරන පර්යේෂණයට පාවිච්චි කළේ.” යනුවෙන් ආචාර්ය සමීර ආර්. සමරකෝන් සඳහන් කළේය. ඔහුගේ ප්රධානත්වයෙන් යුතු එම පර්යේෂණ කණ්ඩායමට ආචාර්ය උපාධි අපේක්ෂිකා උමා රාජ්ගෝපාලන්, ජ්යෙෂ්ඨ මහාචාර්ය කමනි තෙන්නකෝන් සහ වෛද්ය කනිෂ්ක ද සිල්වා අයත් වූහ. එම කණ්ඩායම ප්රථමයෙන්ම කළේ පිළිකා සෛල අතරින් පිළිකා පියවි සෛල තෝරාගැනීමයි. ඉන්පසුව ලංකාවට ආවේණික ශාක වර්ග 5ක් තෝරාගෙන ඒවායේ පොතු සහ කොළ කාබනික ද්රාවණ වර්ග 4කට නිස්සාරණය කරගනු ලැබීය. පසුව එම නිස්සාරණවලින් කාබනික ද්රාවණ ඉවත් කර නිස්සරණයන් වියළා ට්රිපල් නෙගටිව් යන පියයුරු පිළිකා සෛලවලින් වෙන් කරගත් පියයුරු පිළිකා පියවි සෛලවලට ඒවා නිරාවරණය කළේය. එහිදී ඔවුන් දුටුවේ ශ්රී ලංකාවේ දැනට වැවෙන ගොරකා වර්ග 2ක පොතු සතුව පියයුරු පිළිකා පියවි සෛල විනාශ කිරීමේ හැකියාව පවතින බවයි.
ඉන් පසුව ලංකාවේ පමණක් දැනට වැවෙන ලංකාවට අාවේණික ගොරකා වර්ගයක් වන එළගොරකා පොත්ත (Garcinia Zelanica) යොදාගෙන එහි ඇති පිළිකා පියවි සෛල විනාශ කිරීමට සමත් රසායනික සංයෝග වර්ග 4ක් ලොව පළමු වතාවට ඔවුහු සොයාගන්නට සමත් වූහ. ගොරකා පොත්තේ රසායනික සංයෝග එක් එක් වර්ගය සෛලවලට යොදා සෛල මරා දමනවාට වඩා රසායනික සංයෝග 4ම එකතු කර දැමූ විට ඉහළ ක්රියාකාරිත්වයෙන් යුතු සාර්ථක ප්රතිඵල ළඟා කරගත හැකි බව ප්රත්යක්ෂ කර ගැනිණි. ඒ අනුව පියවි සෛල විනාශ කර දැමීමේ ඖෂධීය වට්ටෝරුව (Formula) සකස් කෙරිණි.
පියයුරු පිළිකා සෛල මරා දැමීමට එළගොරක පොත්ත සමත් බව වන සොයාගැනීම Tropical Journal of Pharmaceutical Research යන විද්යා ජර්නලයේ පළ විය. ලෝකයේ ප්රථම වතාවට එළගොරකා පොත්තට පිළිකා පියවි සෛල විනාශ කළ හැකි ප්රති පිළිකාකාරක ගුණ ඇති බව තහවුරු කළේ ආචාර්ය සමීර ආර්. සමරකෝන් ප්රමුඛ පර්යේෂණ කණ්ඩායමය. එය ශ්රී ලාංකිකයන්ට ආඩම්බර විය හැකි කරුණක් වන්නේ ඔහු ශ්රී ලංකා මාතාවගේ පුත් රුවනක් වන නිසාය. එමෙන්ම එම පණිවිඩය ලෝකයේ සිටින පිළිකා රෝගීන්ට මරණ බිය දුරු කර සැහැල්ලුවෙන් අනාගතය දෙස බැලිය හැකි සුබදායි පුවතක් වනු ඇත.
“අපි මේ වට්ටෝරුව සොයා ගත්තාට මෙය රෝගීන්ට කෙළින්ම ලබාගත හැකි ඖෂධ්යක් හැටියට නිෂ්පාදනය වෙන්න තව කාලයක් ගත වේවි. ඉස්සෙල්ලාම මීයන්ට දීලා විෂ රහිත ද විෂ සහිත ද කියලා පරීක්ෂණ කරන්න තියෙනවා. ඒම පර්යේෂණ සාර්ථක වුණොත් ඊළගට රෝගීන්ට දීලා පරීක්ෂණ කරන්න තිබෙනවා. ඊට පස්සෙ තමයි ඖෂධ නිෂ්පාදන සමාගමක් මෙය නිෂ්පාදනය කරනවද නැද්ද කියල තීරණය කරන්නේ. ඒකට තව කාලයක් ගත වේවි. මොකද ලංකාවේ දැනට බටහිර ක්රමය යොදාගෙන රෝගීන්ට සායනිකව භාවිත කළ හැකි නව බෙහෙත් නිපදවීමේ ක්රමවේදයක් නෑ.
අනාගතයේදී රට ගැන හිතන සහ රටේ වටිනා දේවල් ලෝක වෙළෙඳපොළට ගෙන යා හැකියි යන විශ්වාසය තබන නායකයන් බිහි වී රට තුළ නව බෙහෙත් නිෂ්පාදන සහ එම පර්යේෂණ සඳහා දැවැන්ත ආයෝජනයක් කළ හොත් අනිවාර්යයෙන්ම අපේ රටිනුත් නව ඖෂධ ගණනාවක් නිපදවේවි.” යනුවෙන් ආචාර්ය සමීර ආර්. සමරකෝන් මහතා පැවසීය.