ගලගොඩඅත්තේ ඥාණසාර භික්ෂුව අධිකරණයට අපහාස කිරීමේ චෝදනාවට වරදකරු වීමත් සමග සංඝ සමාජය පළමුව තැති ගත්තේය. දෙවැනිව සංඝ සමාජය හැසිරෙන්න පටන්ගත්තේ දණ්ඩෙන් පහර කෑ සර්පයකු මෙනි. පසුගියදා ජනාධිපතිවරයාට ලිපියක් යවමින් සියම් මහා නිකායේ කෝට්ටේ කල්‍යාණි සාමග්‍රී ධර්ම මහා සංඝ සභාව පවසන්නේ ඥාණසාර භික්ෂුව අධිකරණයේදී අපහාසාත්මක ලෙස හැසිරී ඇත්තේ පෞද්ගලික අරමුණක් මුදුන් පත් කරගැනීමට නොවන බවයි. රට වෙළාගෙන තිබූ කුරිරු යුද්ධයෙන් රට බේරාගත් හමුදා සාමාජිකයන් වෙනුවෙන් එම භික්ෂුව තුළ ඇති වූ අසීමිත අනුකම්පාව නිසා එසේ හැසිරී ඇති බව එම සංඝ සභාවේ මතයයි. 
කෝට්ටේ කල්‍යාණී සාමග්‍රී ධර්ම මහා සංඝ සභාව පවසන කාරණය සත්‍යයකි. ඥාණසාර භික්ෂුව අධිකරණයට අපහාස කරමින්, සාධාරණය ඉල්ලා ගිය කාන්තාවකට තර්ජනය කිරීම පෞද්ගලික අවශ්‍යතාවක් නොව, දේශපාලන අවශ්‍යතාවක් මත සිදු කළ අපරාධයකි. ඥාණසාර භික්ෂුවට ඔහුගේ හැසිරීම තුළ කිසිවිට පෞද්ගලික අවශ්‍යතා තිබූ බවක් දක්නට නොමැත. ඔහු හැමවිටම හැසුරුණේ කාගේ හෝ දේශපාලන අවශ්‍යතාවකටය. එනිසා ඔහු මුලදී සමාජයේ ගෞරවයටද ලක් විය. පසුව ඔහුට සිර දඬුවම් විඳින්නට තරම්, කළ අපරාධ හේතුවීම උත්ප්‍රාසජනකය.
වාර්තා වන පරිදි රහමෙර පානය කර වාහනයක් පදවා වරදකරුවකු වීම ගලගොඩඅත්තේ ඥාණසාරහිමිගේ පළමු නීතිය කඩ කිරීමයි. අනතුරුව ඔහු දක්ෂිණ අධිවේගී මාර්ගයෙන් පැමිණ කොට්ටාව පිටවීම් දොරටුවේ දී පොලිස් නිලධාරීන්ට තිරශ්චීන ලෙස තර්ජනය කරමින් බැන වදින අවස්ථාවක් අන්තර්ජාලයේ පළ විය. ප්‍රවෘත්ති සාකච්ඡාවකට කඩාවැදී ප්‍රතිවාදීන්ට මැර තර්ජන එල්ල කිරීම ඔහුගේ තවත් හැසිරීමකි. බරපතළම කරුණ වූයේ අලුත්ගම හා බේරුවල ප්‍රදේශ කේන්ද්‍ර කරගනිමින් පැතිර ගිය වාර්ගික අරගලවලට ඔහුගේ හැසිරීම වගකිව යුතු වීමයි. එසේම මේ වසරේ මුලදී තෙල්දෙණිය ප්‍රදේශයේ පැතිර ගිය වාර්ගික කෝලාහල පිටුපසද ඔහු සිටි බවට චෝදනා එල්ල විය.
රට බේරාගත් හමුදා නිලධාරීන් සම්බන්ධයෙන් ඇති කරගත් හැඟීමකින් පවා රටේ නීතිය කඩ කරන්නට කිසිවකුට නොහැකිය. සියල්ලටමත් වඩා බෞද්ධ භික්ෂුවකට විනය නීති කඩ කරමින් මැරයකු ලෙස හැසිරෙන්න කොහෙත්ම නොහැකිය. පෞද්ගලික නොවන අවශ්‍යතාවක් මත ඥාණසාරහිමියෝ හැසිරී ඇතැයි කීමෙන් හෝ ඔහු කළ අපරාධමය වරද නිවරද නොවේ. ඒ අර්ථයෙන් ඥාණසාර භික්ෂුවගේ ගෞරවනීය නොවන හැසිරීම සාධාරණීකරණය කිරීම සඳහා සංඝ සභාව යොදාගන්නේ අතාර්කික උපක්‍රමයකි.
ඥාණසාර භික්ෂුව කල්පනා කළේ සිවුරට මුවා වී තමන්ගේ සියලු දේශපාලන අරමුණු ඉටු කරගන්නටය. එහෙත් කොට්ටෝරුවා අවසානයේ කෙසෙල් ගහට ඇන හොට පටලවාගත්තේය. කෝට්ටේ කල්‍යාණී සාමග්‍රී ධර්ම මහා සංඝ සභාව දැන් උත්සාහ ගන්නේ හොට පටලවාගත්තකු බේරාගැනීමටය. එහෙත් ඥාණසාර භික්ෂුව අපරාධමය වරද කළ කිසිම අවස්ථාවක ඔහුව වරදින් මුදාගැනීමට සංඝ සභාව කිසි විට මැදිහත් නොවීය. සන්ධ්‍යා එක්නැලිගොඩ පවසන පරිදි ඈට ඥාණසාර භික්ෂුව විසින් අධිකරණයේදී අපහාස කළ විට කෝට්ටේ කල්‍යාණි සාමග්‍රී ධර්ම මහා සංඝ සභාවේ මහා නායක ආචාර්ය ඉත්තෑපානේ ධම්මාලංකාර හිමි හමු වන්නට ඈ ගොස් ඇත. එසේ හමු වී අදාළ ප්‍රශ්නය පවසා ඊට මැදිහත් වන ලෙස පවසා ඇතත් උන් වහන්සේ මුනිවත රැක තිබේ.
ඇතැම් භික්ෂූන් කල්පනා කරන්නේ තමන් සිවුරක් ඇඳි පළියට ඕනෑම වරදක් කිරීමට තමන්ට බලපත්‍රයක් ලැබී ඇති බවයි. තම නිකායවල භික්ෂූන් පක්ෂ දේශපාලන අවශ්‍යතා ඉටු කරමින් වරදෙහි යෙදෙන විට නිහඬව සිටින නිකාය කාරක සංඝ සභා ඒ වරද අධිකරණය ඉදිරියේ විභාගයකට ලක් කර දඬුවම් නියම වූ පසු බෞද්ධ භික්ෂු සිවුර සංකේතාත්මකව උත්කර්ෂයට නැංවීම අර්ථ ගැන්විය යුත්තේ කෙසේද?
- අබරන්
