ශ්‍රී ලංකාවේ 09 වැනි පාර්ලිමේන්තුවට මන්ත්‍රී මණ්ඩලය තෝරා පත් කර ගැනීම සඳහා අගෝස්තු 05 වැනි දින පැවැත්වූ මහ මැතිවරණය වාර්තා තැබුවේ ශ්‍රී ලංකා පොදු ජන පෙරමුණ ලැබූ අති විශිෂ්ට ජයග්‍රහණය නිසා පමණක් නොවේ. මනාප ඡන්ද සටනේදී ලක්ෂයට වැඩියෙන් මනාප ලබා ගනිමින් ලක්ෂපතියන් 50 දෙනකු මෙවර බිහි වීම ද මැතිවරණ ඉතිහාසයේ සුවිශේෂි වාර්තාවකි. මෙහිදි පන්ලක්ෂ විසිහත් දහස් තුන්සිය හැටහතරක් (5,27,364) ලබා මැතිවරණ ඉතිහාසයේ මෙතෙක් වැඩිම මනාප සංඛ්‍යාවක් ලබා ගනිමින් වාර්තාවක් හිමි කරගෙන සිටින්නේ අග්‍රාමාත්‍ය මහින්ද රාජපක්ෂ මහතාය. මීට පෙර මනාප පන්ලක්ෂය ඉක්මවූ අපේක්ෂකයකු ලෙස වාර්තාවක් තබා සිටියේ රනිල් වික්‍රමසිංහ මහතා පමණි. ඒ 2015 පැවති මහ මැතිවරණයෙනි. එහෙත් ඔහු තැබූ වාර්තාව මෙවර කුඩු පට්ටම් වී ගියේ කුරුණෑගල දිස්ත්‍රික්කයෙන් මහින්ද රාජපක්ෂ මහතා මනාප 5,27,364ක් ලබා ගැනීමත් සමඟය. මීට අමතරව මනාප ලක්ෂ 3 ඉක්මවා ලබා ගත් ඡන්ද අපේක්ෂකයෝ සිවුදෙනෙක් සිටිති. කොළඹ දිස්ත්‍රික්කයේ ශ්‍රී ලංකා පොදු ජන පෙරමුණෙන් වැඩිම මනාප ලබා ගත් සරත් වීරසේකර සහ සමගි ජන බලවේගයෙන් තරග කළ සජිත් ප්‍රේමදාස ද ගම්පහ දිස්ත්‍රික්කයේ පොදුජන පෙරමුණෙන් වැඩිම මනාප ලැබූ නාලක ගොඩහේවා සහ ප්‍රසන්න රණතුංග ද තුන් ලක්ෂපතියෝ වෙති. ගාල්ල දිස්ත්‍රික්කයේ රමේෂ් පතිරණ, රත්නපුර දිස්ත්‍රික්කයේ පවිත්‍රා වන්නිආරච්චි සහ කොළඹ දිස්ත්‍රික්කයේ විමල් වීරවංශ දෙලක්ෂය ඉක්මවා මනාප ලැබූ දෙලක්ෂපතියෝ තිදෙනාය.
ඒ හැර නාමල් රාජපක්ෂ, චානක දිනුෂාන්, මහින්ද අමරවීර, ශෂින්ද්‍ර රාජපක්ෂ, චමින්ද සම්පත්, මොහාන් ජී. ද සිල්වා, නිපුණ රණවක, කරුණා කොඩිතුවක්කු, ඩලස් අලහප්පෙරුම, දිලුම් අමුණුගම, මහින්දානන්ද අලුත්ගමගේ, ලොහාන් රත්වත්තේ, අනුරාධ ජයරත්න, කෙහෙළිය රඹුක්වැල්ල, වසන්ත යාපා බණ්ඩාර, ජීවන් තොණ්ඩමන්, ප්‍රේමලාල් ජයසේකර, ජානක වක්කුඹුර, කනක හේරත්, රංජිත් සියඹලාපිටිය, නිමල් සිරිපාල ද සිල්වා, මෛත්‍රිපාල සිරිසේන, එස්.එම්. චන්ද්‍රසේන, චන්න ජයසුමන, උද්දික ප්‍රේමරත්න, ෂෙහාන් සේමසිංහ, ජොන්ස්ටන් ප්‍රනාන්දු, ගුණපාල රත්නසේකර, දයාසිරි ජයසේකර, අසංක නවරත්න, විදුර වික්‍රමනායක, රෝහිත අබේගුණවර්ධන, සංජීව එදිරිමාන්න, පියල් නිශාන්ත, ජයන්ත සමරවීර, ඉන්දික අනුරුද්ධ, සිසිර ජයකොඩි, නිමල් ලාන්සා, උදය ගම්මන්පිල, විජේදාස රාජපක්ෂ, බන්දුල ගුණවර්ධන සහ සමගි ජන බලවේගයෙන් තරග වැදුණු සරත් ෆොන්සේකා, රංජන් රාමනායක යන අය මනාප ලක්ෂය ඉක්මවා ලැබූ ලක්ෂපතියෝ වෙති. මේ අනුව මෙවර මහ මැතිවරණයෙන් තේරි පත්වූ ලක්ෂපතියන් ගණන 43කි.
මේ සා ලක්ෂ ගණනින් මනාප ලබන ඡන්ද අපේක්ෂකයන් බිහි වූයේ සමානුපාතික නියෝජන ඡන්ද ක්‍රමය මෙරට ආරම්භ වීමත් සමඟිනි. ඊට පෙර මෙරට පැවතුණේ ආසන මට්ටමෙන් මන්ත්‍රීවරුන් තෝරා පත් කර ගන්නා කේවල ඡන්ද ක්‍රමයකි. සමානුපාතික ඡන්ද ක්‍රමයට අනුව මෙරට ප්‍රථම වතාවට මැතිවරණයක් පැවැත්වූයේ 1988 පළාත් සභා මැතිවරණයයි. සමානුපාතික ඡන්ද ක්‍රමය යටතේ මෙරට පැවැත්වූ මහ මැතිවරණය ලෙස ඉතිහාසගත වී තිබෙන්නේ 1989 පෙබරවාරි 15 වැනිදා පැවැති මහ මැතිවරණයයි. 1977 මහ මැතිවරණයේ, මැතිවරණ කොට්ඨාස 168ක් යටතේ පවත්වා මහජන නියෝජිතයන් 168 දෙනකු තෝරා ගත්තද 1978 ව්‍යවස්ථාට අනුව තෝරා ගත යුතු මන්ත්‍රීන් සංඛ්‍යාව 225කි. ඉන් 196 දෙනකු දිස්ත්‍රික් සමානුපාතික නියෝජන ක්‍රමයට තෝරා ගැනෙන අතර ඉතිරි 29 දෙනා පත්වන්නේ ජාතික ලැයිස්තුවෙනි. මන්ත්‍රීන් 196 දෙනා සඳහා එක් එක් දිස්ත්‍රික්කවලින් තෝරා ගත යුතු මන්ත්‍රීන් සංඛ්‍යාව ද 1978 ව්‍යවස්ථාවෙන් තීරණය විය. 1989 පැවති මහ මැතිවරණයෙන් ජය ලැබුවේ එවක පාලන පක්ෂය වූ එක්සත් ජාතික පක්ෂයයි. මනාප ඡන්ද සටනේ එදා ලක්ෂය ඉක්මවූ මන්ත්‍රීන් සිටියේ 4 දෙනකු පමණි. ඉන් දෙදෙනෙක් දෙලක්ෂය ඉක්මවා සිටියහ. ඒ, කොළඹ දිස්ත්‍රික්කයෙන් එක්සත් ජාතික පක්ෂය යටතේ තරග වැදුණු ලලිත් ඇතුලත්මුදලි සහ ගම්පහ දිස්ත්‍රික්කයෙන් ශ්‍රී ලංකා නිදහස් පක්ෂය යටතේ තරග කළ සිරිමාවෝ බණ්ඩාරනායක මැතිනියයි. ලලිත් ඇතුලත්මුදලි මහතා ලැබූ මනාප ඡන්ද සංඛ්‍යාව 2,35,447කි. සිරිමාවෝ බණ්ඩාරනායක මහත්මිය ලැබූ මනාප ගණන 2,14,390කි. ඊට අමතරව එක්සත් ජාතික පක්ෂයෙන් ජය ලැබූ ජෝශප් මයිකල් පෙ‍ෙර්රා 1,40,094ක ප්‍රමාණයක් මනාප ලබා ගත්තේය. ශ්‍රී ලංකා නිදහස් පක්ෂයෙන් තරග වැදුණු අනුර බණ්ඩාරනායක 1,07,171ක මනාප ප්‍රමාණයක් ලබා ගත්තේය. 1989 මහ මැතිවරණයේ දෙදෙනකු ලක්ෂපතියන් වී දෙදෙනකු දෙලක්ෂපතියන් වූයේ ලියාපදිංචි ඡන්ද සංඛ්‍යාව වන 9,3,74,164ක් සහ ඡන්ද ප්‍රකාශ කළ ගණන 59,62,031 (63.6%) ක්ව තිබෙන වකවානුවක බව අප අමතක නොකළ යුතුය.
ඉන් අනතුරුව සමානුපාතික ඡන්ද ක්‍රමය යටතේ මහ මැතිවරණයක් පැවැත්වූයේ 1994 දීය. 1994 අගෝස්තු 16 දින පැවැත්වූ මහ මැතිවරණයෙන් විශිෂ්ට ජයග්‍රහණයක් අත්කර ගත්තේ පොදු ජන එක්සත් පෙරමුණයි. 1993 දී බස්නාහිර පළාත් සභා මැතිවරණයෙන් පොදු ජන එක්සත් පෙරමුණෙන් තරග කර ජය ලබා බස්නාහිර මහ ඇමතිනිය ලෙස පත් වී සිටි චන්ද්‍රිකා බණ්ඩාරනායක කුමාරතුංග මහත්මිය 1994 මහ මැතිවරණයේදී හාර ලක්ෂ හැට හතර දහස් පන්සිය අසූ අටක් මනාප ලබා හාරලක්ෂපතිනියක වී රටේ අගමැතිනිය වූවාය. ඈ ලබා ගත් මනාප සංඛ්‍යාව ඓතිහාසික වාර්තාවක් ම විය. මෙම වාර්තාව බිඳ වැටුණේ 2015 දී කොළඹ දිස්ත්‍රික්කයෙන් තරග කළ රනිල් වික්‍රමසිංහ අතිනි. 2015 දී ඔහු මනාප පන්ලක්ෂ පන්සිය හැටහයක් (5,00,566) ලබා චන්ද්‍රිකා බණ්ඩාරනායක කුමාරතුංග මහත්මිය තැබූ මනාප වාර්තාව බිඳ හෙළීය. 1994 මහ මැතිවරණයෙන් එක්සත් ජාතික පක්ෂයෙන් කොළඹ දිස්ත්‍රික්කයට තරග කළ එක්සත් ජාතික පක්ෂ නායක රනිල් වික්‍රමසිංහ 2,91,194ක මනාප සංඛ්‍යාවක් දිනා ගෙන දෙලක්ෂපතියෙක් විය. ඊට අමතරව 1994 මහ මැතිවරණය මනාප ලක්ෂපතියන් 11 දෙනකු බිහි කළේය. ශ්‍රීමනි ඇතුලත්මුදලි, සී.වී. ගුණරත්න, නිමල් සිරිපාල ද සිල්වා, ජෝන් අමරතුංග, ජෙයරාජ් ප්‍රනාන්දු පුල්ලේ, ගාමිණි දිසානායක, දි.මු. ජයරත්න, අමරසිරි දොඩංගොඩ, රිචඩ් පතිරණ, එස්.බී. නාවින්න සහ ගාමිණි ජයවික්‍රම පෙරේරා මෙම ලක්ෂපතියෝ වූහ. මෙම ලක්ෂපතියන් බිහි වූයේ 1994 වර්ෂයේ ලියාපදිංචි ඡන්ද සංඛ්‍යාව වන 1,09,45,065කගෙන් ප්‍රකාශිත ඡන්ද සංඛ්‍යාව වූ 83,44,101 කගේ මනාපවලිනි.
94 තේරී පත්වූ පාර්ලිමේන්තුව 2000 සැප්තැම්බර් මාසයෙන් අවසාන විය. ඉන් අනතුරුව පාර්ලිමේන්තුව තෝරා පත් කර ගැනීමේ මහ මැතිවරණය 2000 ඔක්තෝබර් 10 වැනි දින පැවැත්විණි. මෙම මැතිවරණයෙන් මනාප සංඛ්‍යාව ලක්ෂ තුනක් ඉක්මවා ලබා ගත්තේ එක්සත් ජාතික පක්ෂයෙන් කොළඹ දිස්ත්‍රික්කයට තරග වැදුණු පක්ෂ නායක රනිල් වික්‍රමසිංහ පමණි. ඔහු ලැබූ මනාප ගණන 3,63,668කි. ඉන්පසුව දෙලක්ෂපතියකු වූයේ එක්සත් ජාතික පක්ෂයෙන් තරග කළ කරූ ජයසූරියයි. ඒ හැර රවී කරුණානායක, ජී.ඇල්. පීරිස්, දිනේෂ් ගුණවර්ධන, ඒ.එච්.එම්. ෆවුසි, සුසිල් ප්‍රේමජයන්ත, ජෙයරාජ් ප්‍රනාන්දුපුල්ලේ, රත්නසිරි වික්‍රමනායක, අනුරුද්ධ රත්වත්ත, කෙහෙළිය රඹුක්වැල්ල, රිචඩ් පතිරණ, වජිර අ‍ෙබ්වර්ධන, ගාමිණි ජයවික්‍රම පෙරේරා, පවිත්‍රාදේවි වන්නිආරච්චි හා ගාමිණි අතුකෝරළ යන 14 දෙනා මනාප ලක්ෂය ඉක්මවා ජන වරමක් හිමි කර ගත් අය වූහ. 2000 වන විට ලියාපදිංචි ඡන්ද සංඛ්‍යාව 1,20,71,062ක් වූ අතර ඡන්දය දුන් සංඛ්‍යාව 91,28,823ක් විය. මේ අනුව මැතිවරණයෙන් මැතිවරණයට ඡන්ද දායකයන්ගේ සංඛ්‍යාව ඉහළ යන විට ලක්ෂය ඉක්මවා මනාප ලබා ගන්නා ඡන්ද අපේක්ෂකයන්ගේ සංඛ්‍යාව ද ඉහළ යන බව දැකිය හැකිය.
2000 මහ මැතිවරණයෙන් පොදු ජන එක්සත් පෙරමුණ ජයග්‍රහණය ලබා රජයක් පිහිටුවනු ලැබූවත් එම බලය රඳවා තබා ගැනීමට හැකි වූයේ වසරක් පමණි. ආණ්ඩු පක්ෂය ඇතුළත හට ගත් ගැටුම් හා මතභේද නිසා ජනාධිපතිනිය චන්ද්‍රිකා බණ්ඩාරනායක කුමාරතුංග ආණ්ඩුව විසුරුවා හැරියාය. 2001 දෙසැම්බර් 05 වැනි දින නැවතත් පාර්ලිමේන්තු මැතිවරණයක් පැවැත්වීමට සිදු වූයේ එබැවිනි. මෙම මැතිවරණයෙන් ජයග්‍රහණය කළේ එක්සත් ජාතික පෙරමුණය. මෙම මැතිවරණයෙන් හාරලක්ෂය ඉක්මවා වැඩිම මනාප සංඛ්‍යාවක් ලබා ගත්තේ එක්සත් ජාතික පෙරමුණෙ පක්ෂ නායක රනිල් වික්‍රමසිංහ විසිනි. ඒ 4,15,686කි. ඉන්පසුව දෙලක්ෂපතියන් වූයේ එම පක්ෂයෙන්ම තරග වැදුණු කරූ ජයසූරීය සහ පොදු ජන එක්සත් පෙරමුණෙන් තරග කළ අනුර බණ්ඩාරනායක යන දෙපළය. ඒ හැර මන්ත්‍රිවරු 18 දෙනෙක් ලක්ෂය ඉක්මවා මනාප ලබා සිටියහ. මිලින්ද මොරගොඩ, රවී කරුණානායක, ඒ.එච්.එම්. ෆවුසි, ජයලත් ජයවර්ධන, මහින්ද සමරසිංහ, රාජිත සේනාරත්න, රත්නසිරි වික්‍රමනායක, කෙහෙළිය රඹුක්වැල්ල, අනුරුද්ධ රත්වත්ත, ආරුමුගම් තොණ්ඩමන්, පී. චන්ද්‍රසේකරන්, මුත්තු සිවලිංගම්, වජිර අබේවර්ධන, මංගල සමරවීර, ගාමිණි ජයවික්‍රම පෙරේරා, ජොන්ස්ටන් ප්‍රනාන්දු, ගාමිණි අතුකෝරළ හා සුසන්ත පුංචි නිලමෙ මනාප ලක්ෂපතියෝ 18 දෙනා වූහ.
එහෙත් එක්සත් ජාතික පෙරමුණු ආණ්ඩුවේ ආයු කාලය තිබුණේ අවුරුදු 2යි මාස 4 යි දින 3ක් පමණි.
හිටපු ජනාධිපතිනිය රජය විසුරුවා හැරීම නිසා මහ මැතිවරණයක් නියම වී නැවතත් මනාප පොරය ආරම්භ විය. 2004 අප්‍රේල් 02 වැනි දින පැවැත්වූ මහ මැතිවරණයෙන් එක්සත් ජනතා නිදහස් සන්ධානය ජයග්‍රහණය කළේය. මෙහි එක්සත් ජනතා නිදහස් සන්ධානය සමඟ ජනතා විමුක්ති පෙරමුණ එකතු වීම විශේෂත්වයකි. මෙම මහ මැතිවරණයේදී ද ඉහළම මනාප ලබා ගත්තේ එක්සත් ජාතික පක්ෂයේ නායක රනිල් වික්‍රමසිංහය. ඔහුට හිමි වූ මනාප සංඛ්‍යාව 3,29,524කි. ඉන් අනතුරුව දෙලක්ෂපතියෝ තිදෙනෙක් සිටියහ. විමල් වීරවංශ, විජිත හේරත්, කරූ ජයසූරිය එකී තිදෙනා වෙති. ලක්ෂය ඉක්මවා මනාප ලැබූ අය ලෙස සුනිල් හඳුන්නෙත්ති, ලක්ෂ්මන් නිපුණආරච්චි, සුසිල් ප්‍රේමජයන්ත, අනුර බණ්ඩාරනායක, සිරිපාල අමරසිංහ, අන්ජාන් උම්මා, නන්දන ගුණතිලක, කෙහෙළිය රඹුක්වැල්ල, දිමුතු බණ්ඩාර අබේකෝන්, ජී.එච්. අජිත් කුමාර, චන්ද්‍රසේන වි‍ෙජ්සිංහ, වජිර අ‍ෙබ්වර්ධන, මංගල සමරවීර, ජිනදාස කිතුලේගොඩ, ප්‍රේමසිරි මානගේ, මහින්ද රාජපක්ෂ, සෙල්වරාජා ග‍ෙජ්න්ද්‍රන්, අනුර කුමාර දිසානායක, බිමල් රත්නායක, නාමල් කරුණාරත්න, ගාමිණි ජයවික්‍රම පෙරේරා, ජොන්ස්ටන් ප්‍රනාන්දු, කේ.ඩී. ලාල්කාන්ත, රණවීර පතිරණ, පවිත්‍රා වන්නිආරච්චි, තලතා අතුකෝරළ යන 26 දෙනා හැඳින්විය හැකිය.
ඉන් අනතුරුව මහ මැතිවරණයක් පැවැත්වූයේ 2010 අප්‍රේල් 08 වැනිදාය. මෙම මැතිවරණය වන විට ලියාපදිංචි ඡන්ද සංඛ්‍යාව 1,40,88,500 ක් වන අතර ඡන්දය ප්‍රකාශ කළ ගණන 86,30,689ක් විය. 2010 මහ මැතිවරණයෙන් ඉහළම මනාප සංඛ්‍යාවක් දිනා ගත්තේ ගම්පහ දිස්ත්‍රික්කයට එක්සත් ජනතා නිදහස් සන්ධානයෙන් තරග කළ බැසිල් රාජපක්ෂය. ඔහුට හිමි වූ මනාප සංඛ්‍යාව හාරලක්ෂ විසිපන්දහස් අටසිය හැටඑකකි (4,25,861). මෙම මැතිවරණයෙන් දෙලක්ෂපතියන් බිහි වූයේ දෙදෙනකු පමණි. ඔවුන් දෙදෙනා වන්නේ එක්සත් ජනතා නිදහස් සන්ධානයෙන් කොළඹ දිස්ත්‍රික්කයට තරග කළ විමල් වීරවංශ සහ එම දිස්ත්‍රික්කයටම එක්සත් ජාතික පක්ෂයෙන් තරග කළ පක්ෂ නායක රනිල් වික්‍රමසිංහ ය. විමල් වීරවංශ මනාප 2,80,672ක් දිනා ගත්තේය. රනිල් වික්‍රමසිංහට හිමි වූයේ 2,32,957කි. ඒ හැර මනාප ලක්ෂය ඉක්මවා ලබා ගත් ලක්ෂපතියෝ 22 දෙනෙක් වූහ. දුමින්ද සිල්වා, පාඨලි චම්පික රණවක, දි‍ෙන්ෂ් ගුණවර්ධන, සුදර්ශනි ප්‍රනාන්දුපුල්ලෙ, මර්වින් සිල්වා, අතුරලියේ රතන හිමි, කුමාර වෙල්ගම, මහින්දානන්ද අලුත්ගමගේ, කෙහෙළිය රඹුක්වැල්ල, එස්.බී. දිසානායක, නිශාන්ත මුතුහෙට්ටිගම, නාමල් රාජපක්ෂ, මහින්ද අමරවීර, ජොන්ස්ටන් ප්‍රනාන්දු, ටී.බී. ඒකනායක, දයාසිරි ජයසේකර, එස්.එම්. චන්ද්‍රසේන, දුමින්ද දිසානායක, නිමල් සිරිපාල ද සිල්වා, ඩබ්ලිව්.ඩී.ජේ. සෙනෙවිරත්න, පවිත්‍රා වන්නිආරච්චි සහ රංජිත් සියඹලාපිටිය මෙම 22 දෙනාය.
2010 පත්වූ පාර්ලිමේන්තුවේ වසර 5ක කාලය ඉක්ම වූ පසු නැවතත් පාර්ලිමේන්තු මහ මැතිවරණයක් පැවැත්වීමට අවශ්‍ය විය. ඒ අනුව 2015 අගෝස්තු 17 වැනි දින මහ මැතිවරණයක් පැවැත්වීමට සියලු කටයුතු පිළියෙල කෙරිණි. මෙම මැතිවරණයෙන් වැඩිම මනාප සංඛ්‍යාවක් හිමි කර ගත්තේ කොළඹ දිස්ත්‍රික්කය සඳහා එක්සත් ජාතික පෙරමුණෙන් තරග කළ, පක්ෂ නායක රනිල් වික්‍රමසිංහ ය. ඔහු මනාප 5,00,566ක් ලබා ගනිමින් 1994 චන්ද්‍රිකා බණ්ඩාරනායක කුමාරතුංග තබා තිබූ වාර්තාව බිඳ හෙළුවේය. ඉන් අනතුරුව වැඩිම මනාප සංඛ්‍යාවක් ලබා ගත්තේ කුරුණෑගල දිස්ත්‍රික්කයෙන් එක්සත් ජනතා නිදහස් සන්ධානයට තරග කළ මහින්ද රාජපක්ෂ මහතාය. ඔහු ලැබූ මනාප සංඛ්‍යාව හාරලක්ෂ විසිතුන්දහස් පන්සිය විසි නවයකි. (4,23,529). එවර මනාප ලක්ෂ තුන ඉක්මවා ලබාගත් දෙදෙනෙක් වූහ. කොළඹ දිස්ත්‍රික්කයෙන් එක්සත් ජනතා නිදහස් සන්ධානයට තරග වැදුණු විමල් වීරවංශ (මනාප 3,13,801) සහ එම පක්ෂයෙන්ම ගම්පහ දිස්ත්‍රික්කයට තරග වැදුණු ප්‍රසන්න රණතුංග (මනාප 3,84,448) එම දෙදෙනාය. මනාප ලක්ෂ 2 ඉක්මවා ලබා ගත් සිව්දෙනෙකි. රන්ජන් රාමනායක, කුමාර වෙල්ගම, අකිල විරාජ් කාරියවසම් සහ හරීන් ප්‍රනාන්දු එම දෙලක්ෂපතියෝ සිවුදෙනා වෙති.
2015 මහ මැතිවරණයෙන් මනාප ලක්ෂය ඉක්මවා දිනා ගත් ලක්ෂපතියෝ 40 කි. සුජීව සේනසිංහ, හර්ෂ ද සිල්වා, රවී කරුණානායක, පාඨලි චම්පික රණවක, උදය ගම්මන්පිල, සුසිල් ප්‍රේමජයන්ත, දිනේෂ් ගුණවර්ධන, අර්ජුන රණතුංග, රුවන් වි‍ෙජ්වර්ධන, හර්ෂණ රාජකරුණා, අජිත් මාන්නප්පෙරුම, ප්‍රසන්න රණවීර, රෝහිත අබේගුණවර්ධන, ජයන්ත සමරවීර, රාජිත සේනාරත්න, අජිත් පෙරේරා, පාලිත තෙවරප්පෙරුම, ලක්ෂ්මන් කිරිඇල්ල, මයන්ත දිසානායක, ඒ.එච්.ඒ. හලීම්, රාවුෆ් හකීම්, ලොහාන් රත්වත්ත, මහින්දානන්ද අලුත්ගමගේ, දිලුම් අමුණුගම, පී. දිගම්බරම්, චන්දිම වීරක්කොඩි, රමේෂ් පතිරණ, ගයන්ත කරුණාතිලක, වජිර අබේවර්ධන, ඩලස් අලහප්පෙරුම, නාමල් රාජපක්ෂ, සජිත් ප්‍රේමදාස, දයාසිරි ජයසේකර, ජේ.සී. අලවතුවල, එස්.එම්. චන්ද්‍රසේන, පී. හැරිසන්, නිමල් සිරිපාල ද සිල්වා, ප්‍රේමලාල් ජයසේකර, තලතා අතුකෝරළ සහ කබීර් හෂීම් මෙම ලක්ෂපතියෝ 40 දෙනා වෙති.
2020 මහ මැතිවරණය වන විට ලක්ෂ ගණනින් මනාප ලබා ගත් සමහරුන්ගේ මනාප අඩු වී පහතට වැටී තිබේ. තවත් මන්ත්‍රීවරු දේශපාලනයෙන් ඉවත් වී සිටිති. පෙර පැවැත්වූ මැතිවරණවල මනාප අඩු වූ මන්ත්‍රීවරු මෙවර වැඩි මනාප ලබා පෙරමුණ ගෙන සිටිති. ඒ අතරවාරයේදී සරත් වීරසේකර, නාලක ගොඩහේවා වැනි අලුත් අය මනාප ලක්ෂ ගණනින් දිනා සිටිති. සමානුපාතික නියෝජන ක්‍රමය පවතින තාක් කල් මනාප සටන මේ ආකාරයටම දැක ගත හැකි වන්නේය.
