ආචාර්ය ලෙස්ටර් ජේම්ස් පිරිස් විලි බ්ලේක් හා ටයිටස් තොටවත්ත හා එකතුව තැනූ “රේඛාව” මුලින් ම පෙන් වූ දින රීගල් සිනමාහලේ දී ලැබූ ප්‍රේක්‍ෂක ප්‍රතිචාරය කුමක්දැයි යන්න බොහෝ දෙනෙකු දන්නා දෙයකි.
එනම් චිත්‍රපටය නැරඹීමට වියදම් කළ මුදලින් කපුටන්ට ආප්ප කන්න දුන්නා නම් මීට වඩා හොඳ බවය. එහිදී චිත්‍රපටකරුවන්ට අත්විඳින්නට ලැබුණු තවත් සිදුවිමක් වූයේ එතෙක් රීගල් සිනමා හලේ ඇමෙරිකන් සහ බ්‍රිතාන්‍ය චිත්‍රපට නැරඹීමේ යෙදුණු ඉංග්‍රිසි උගත් සිංහලයාට ද මෙය තේරුම් ගත නොහැකි වූ බවයි. චිත්‍රපටය ප්‍රර්ශනය වෙද්දී ප්‍රේක්‍ෂකයන් අතර හිඳ සිටි ලෙස්ටර්ට පෙනී ගියේ ඔවුන් සිනාසෙන්නේ අදාළ සිදුවීම් වලට නොවන බවය. නමුත් රේඛාව පසුව අන්තර්ජාතික නියෝජනයට පවා සුදුසුකම් ලැබීය. මෙම චිත්‍රපටය අන්තර් ජාතික සම්භාවනාවට පාත්‍ර වූයේ කිසිසේත් සිංහල කතා කළ නොහැකි ප්‍රංශ ජාතික සිනමා නිළියක නිසා ය.
ඇය මාරියා ෂෙල් ය.
ඒ වන විට ශ්‍රි ලංකාවේ සංචාරයක් සඳහා පැමිණ සිටි ඇය නැවතී සිටියේ ගල්කිස්සේ මවුන්ට් ලැවිනියා හෝටලයේ ය. ප්‍රංශ නළුවෙකු, අධ්‍යක්‍ෂවරයෙකු, තිර නාටක රචකයෙකු හා නිෂ්පාදකවරයෙකු ද වූ මැක්සිමිලන් ෂෙල් නැමැත්තා ඇයගේ සොහොයුරෙකු විය. මාරියා ෂෙල් ලංකාවට පැමිණ සිටියේ ගී ද මෝපාසංගේ කතාවක් ඇසුරින් තැනූ “ONE VIV” චිත්‍රපටයේ රඟපෑම් අවසන් කිරීමෙන් අනතුරුවය.
ඒ වන විට ඇය සුප්‍රකට ප්‍රංශ ගත්කරු එමිල් සෝලාගේ නවකතාවක් ඇසුරින් නිපදවූ “GERVAISE” චිත්‍රපටයේ රඟපා වෙනිෂ් ජාත්‍යන්තර චිත්‍රපටයේ සම්මානයකට ද,“THE LAST BRIGE“ චිත්‍රපටයේ රඟපෑම් නිසා ඛාන් ජාත්‍යන්තර චිත්‍රපට උලෙළේ සම්මානයකටද පාත්‍ර වී සිටියා ය.
ලංකාවේ තිරගත වන චිත්‍රපටයක් නැරඹීමට අවශ්‍ය බව මවුන්ට් ලැවිනියාහි නැවතී සිටියදී ඇය තම සංචාරක උපදේශකවරයාට පවසා තිබේ. ඔහු ඒ වන විට “රේඛාව” තිරගත වෙමින් පැවති වැල්ලවත්තේ රොක්සි සිනමාහල වෙත ඇය කැටුව ගියේ ය. එහිදී “රේඛාව” නැරඹීමෙන් බලවත් අමන්දානන්දයට පත් වූ ඇය මෙය අනිවාර්යයෙන් ම පැරිසියේ ඛාන් චිත්‍රපට උෙලළ නියෝජනය කළ යුතු නිර්මාණයක් බව අවධාරණය කළා ය.
1957 දී “ඊවිනිං ඔබ්සවර්” පුවත් පතේ වාර්තාකරුවෙකු සමඟ කළ සාකච්ඡාවකදී ඇය තවදුරටත් කියා සිටියේ තමා ප්‍රංශයට ගොඩබට වහාම “රේඛාව” ඛාන් සිනමා උෙලළට සහභාගි කරගන්නා ලෙස එහි සංවිධායකයන්ට දන්වා සිටින බවය.
මේ අයුරින් මාරියා ෂෙල් නැමැති මෙම අපූර්ව නිළිය හේතු කොට ගෙන, “රේඛාව”ට ඛාන් සිනමා උෙලළ නියෝජනය කිරීමේ අවස්ථාව උදා වුවද ප්‍රංශයේ දී පවා ඇයව මුණගැසීමේ අවස්ථාවක් ලෙස්ටර්ට උදා වී නැත.
