ඇල්පිටිය ප්රාදේශීය සභා මැතිවරණ ප්රතිඵල ජනාධිපතිවරණය ගැන යම් ඉඟියක් ලබා දුන්නා නේද?
ඇල්පිටිය ප්රාදේශීය සභා මැතිවරණය කිසිසේත් ම ජනාධිපතිවරණයට සමාන කරන්න බෑ. ඇල්පිටිය කියන්නෙ සමස්ත ශ්රී ලංකාව නෙමෙයි. ප්රාදේශීය සභා මැතිවරණය කියන්නෙ එකක්. ජනාධිපතිවරණය කියන්නෙ තව එකක්. මහ මැතිවරණය කියන්නෙ තව එකක්. පළාත් සභා මැතිවරණය කියන්නෙ තවත් එකක්. ඒක නිසා ඒ ගැන කතා කිරීම පවා නිශ්ඵලයි. ජනාධිපතිවරණය තුන් කොන් සටනක් බවට පත් වෙලා තියෙන්නෙ. අපේ පැහැදිලි අපේක්ෂාව ජයග්රහණය සනිටුහන් කරන්නයි.
ඔබ පක්ෂයේ විජිත හේරත් මන්ත්රීවරයාත් පැවසුවා මැතිවරණ දෙක සම කළ නොහැකි බවට, නමුත් දිවයින පුරා පැවැති පළාත් පාලන මැතිවරණයෙන් බහුතර ජයක් ලබා ගැනීමට පොදු ජන පෙරමුණට හැකි වුණා. ඇල්පිටිය ප්රතිඵලයත් එහෙමමයි. ජනාධිපතිවරණයේ ප්රතිඵලත් එසේ නොවන බව ඔබ තහවුරු කරන්නේ කෙසේද?
මේ අවස්ථාවේ උතුරේ පළාත් පාලන ආයතනයක ඡන්දයක් තිබ්බොත් සජිත් දිනනවද? ගෝඨාභය දිනනවද? අපිට දිනන්න පුළුවන්ද? ඒ වගේම එක්සත් ජාතික පක්ෂයට වැඩි බලයක් තියෙන ප්රදේශයක මැතිවරණයක් තිබ්බොත්, නැඟෙනහිර පළාත් සභාවක මැතිවරණයක් තිබ්බොත් ඒ වගේම වතුකරයේ මැතිවරණයක් තිබ්බොත් ප්රතිඵලය ගැන අමුතුවෙන් කිව යුතු නැහැ.
ඇල්පිටිය ප්රාදේශීය සභා ඡන්දයේ ප්රතිඵල බැලුවහම අපට පැහැදිලිව පෙනෙන දෙයක් තමයි මහින්ද රාජපක්ෂ මහතා පසුගිය මැතිවරණ වලට වඩා ඇල්පිටිය ඡන්ද අඩුකරගෙන තිබෙන බවක්. නමුත් ඒ ලෙසට ජනාධිපතිවරණය ගැන තීන්දු තීරණ ගන්න බැහැ. ඒ කතාව මහින්ද රාජපක්ෂ මහතාත් කිව්වනෙ. පසුගිය මැතිවරණය හා සංසන්දනය කළොත් ප්රතිශතයෙන් ඉදිරියෙන් ඉන්නෙ අපි. නමුත් ඒක ලොකු කරගෙන ඉස්සරහට යන්න අපි කටයුතු කරන්නෙ නැහැ.
නමුත් ඇල්පිටියේ මන්ත්රීවරු 28 කින් ඔබ පක්ෂයට ලැබී ඇත්තේ මන්ත්රී ධුර 2 යි. එවන් තත්ත්වයකින් ඔබ පක්ෂය කොහොමද ජනාධිපතිවරණ සටනක් ජයග්රහණය කිරීමක් ගැන හිතන්නෙවත්...
මා කලික් කිව්වෙත් එයම තමයි. පසුගිය පළාත් පාලන මැතිවරණයේදී ඇල්පිටිය ප්රාදේශීය සභාවේ ජනතා විමුක්ති පෙරමුණට එක මන්ත්රී ධුරයක්වත් තිබුණෙ නැහැ. මෙවර මන්ත්රි ධුර 2ක් හිමි වුණා. නමුත් අපි ඒක ඉස්මතු කරලා ජනාධිපතිවරණය හා සම කරන්නෙ නැහැ. ඒ වගේම අපි මෙවර ජනාධිපතිවරණයට ඉදිරිපත් වන්නේ ජනතා විමුක්ති පෙරමුණෙන් නෙමෙයි. ජාතික ජන බලවේගයෙන්.
රටේ තිබෙන්නාවූ මේ ආර්ථික හා දේශපාලන ව්යුහය අනුව ජාතික ජන බලවේගයට ඉදිරි ගමනක් තිබේවියැයි ඔබ විශ්වාස කරනවද?
පැහැදිලිවම තියෙනවා. වර්තමාන ආර්ථික හා දේශපාලන ව්යුහය අනුව තමයි ජාතික ජන බලවේගය නිර්මාණ කර තිබෙන්නේ. රටේ පාලනය ගෙන ගිය ප්රධාන පක්ෂ දෙක විසින් ජනතා අපේක්ෂා ඉටු නොකළ හෙයින් ජනතාවට දැඩි කළකිරීමක් ඇති වෙලා තියෙනවා. එම නිසා තමයි ජාතික ජන බලවේගය වැනි දේශපාලන ව්යුහයන් බිහි වෙලා තියෙන්නෙ. ඒක ලංකාවෙ පමණක් නෙමෙයි ලෝකය පුරා ගත්තත් පේනවා. පාකිස්ථානයේ ඉම්රාන් ඛාන් බලයට පත් වෙන්නේ ඒ අනුවයි. ප්රංශයේ අලුතින් බලය ගත් දේශපාලන කණ්ඩායම් ඒ වගෙයි. පවත්නා ආර්ථික, දේශපාලන මෙන්ම සමාජ රටාව අනුව තමයි ජාතික ජන බලවේගය වැනි දේශපාලනයන් නිර්මාණය වන්නේ. ඒක ප්රබලයි. ඒක නිසා අලුත් වෙනසක් බලාපොරොත්තු වන ජනතාවට නොවැම්බර් 16 වැනිදා ඒ බලාපොරොත්තු දල්වන්න පුළුවන් වෙයි කියලා අපි හිතනවා.
ජනාධිපතිවරණයට මෙවර අපේක්ෂකයන් 35 දෙනෙක් ඉදිරිපත් වීම එය හෑල්ලුවට ලක් කිරීමක්. එසේත් නැත්නම් එම ධුරයේ ගෞරවයට කැළලක් වගේ පෙනෙන්නේ නැද්ද?
මෙතෙක් කල් ජනාධිපති ධුර දැරූ දේශපාලන කණ්ඩායම්හි දේශපාලන ධාරා දුර්වල වන විට විකල්ප කණ්ඩායම්වලට පේනවා එතැන තමන්ට අවස්ථාවක් තිබෙන බවට. ඒ අවස්ථාව ලබා ගන්න තමයි ඒ අපේක්ෂකයන් තරග වදින්නෙ. කොහොම වුණත් ඒ විකල්ප ධාරාවන් අතර අනුර කුමාර දිසානායක මහතා තමයි ප්රධාන විකල්පය වන්නේ. කොහොමත් මීට පෙරත් ජනාධිපතිවරණ සඳහා අපේක්ෂකයන් 10 ක් 12 ක් හිටපු අවස්ථා තිබෙනවා. විකල්ප රැසක් අවශ්ය නැහැ. එක විකල්පයක් තිබීම පමණක් ප්රමාණවත් බවයි අප පවසන්නේ. විකල්ප අපේක්ෂකයා ලෙස අනුර කුමාර මහතා ඉදිරිපත්ව ඇත්තේ රටට ආදරේ ප්රගතිශීලී දේශපාලන පක්ෂ හා සංවිධාන 30ක එකතුවකින්. ජනතාවටත් අප ආරාධනා කරන්නේ ඒ අතරට එක්වන්න කියා.
එක් විකල්පයක් පමණක් ප්රමාණවත් නම් ජනතා විමුක්ති පෙරමුණට ජාතික ජන බලවේගය හරහා ගම් මට්ටමින් ජනතාව දැනුවත් කර විකල්ප බලවේග එක්තැන් කර එක් විකල්පයක් කරා යන්නට නොහැකි වූයේ ඇයි?
අපි සාකච්ඡා කළා. කණ්ඩායම් රැසක් අපත් සමඟ එකතු වුණා. එහෙම එකතු වුණා නිසා තමයි කණ්ඩායම් 30කගෙන් යුක්ත ජාතික ජන බලවේගය අද ගොඩ නඟා ගත්තේ. අනෙක් කණ්ඩායම් ද ඒ සඳහා එකතු කර ගන්න අප උත්සාහ කළා. අපත් සමඟ දැනට සිටින කණ්ඩායම් එකතු නොවුණා නම් අපේක්ෂක ලැයිස්තුව 35 ක් නෙමෙයි 40 ක් 50 ක් වෙන්න තිබුණා. කොහොමත් විකල්ප ධාරාවන් එක්කර ගැනීම අප ජනාධිපතිවරණයෙන් නවතා දැමන්නේ නැහැ. ඊළඟ මහ මැතිවරණයෙදිත් එම කණ්ඩායම් එකතු කරගන්න අප උත්සාහ කරනවා.
නමුත් විකල්ප කණ්ඩායම් රැසක් සිටීමේ අවාසිය එහි බලපෑම ඇති වන්නේ ඔබ අපේක්ෂකයාට නේද?
එහෙම විශාල බලපෑමක් ඇති වන්නේ නැහැ. එහෙම නම් කලින් අපේක්ෂකයන් සිටි අවස්ථාවේත් විශාල බලපෑම් එල්ල වන්න ඕනෑනෙ. නමුත් විකල්ප බල කණ්ඩායම්හි සියලු බලවේග එක්තැන් වීමයි වැදගත් වන්නේ. කොහොමත් මෙවර ජනාධිපතිවරණයෙදී ප්රධාන අපේක්ෂක බලකණු 3 යි තියෙන්නෙ. ඒ සජිත් ප්රේමදාස, ගෝඨාභය රාජපක්ෂ, අනුර කුමාර දිසානායක යන අයයි. ජනතාව මනාප දෙන්නේ ඒ අය දිහා බලලයි. ඉතිරි අයටත් සුළු ප්රමාණයක් ලැබෙයි. නමුත් ඒ සුළු ප්රමාණය වුණත් අපි අවතක්සේරු කරන්නෙ නැහැ. ඒත් යථාර්ථයට අපි මුහුණ දිය යුතු වෙනවා.
ගම් මට්ටමින් ජනතා විමුක්ති පෙරමුණට සහායක් තිබෙනවාද?
ගම් මට්ටමින් ඉතා හොඳ සහායක් ලැබෙනවා. ඉස්සරට වඩා ජනතාව දේශපාලනය ගැන දැඩි කළකිරීමකින් ඉන්නෙ. පවත්නා දේශපාලනය ජනතාවට තිත්ත වෙලා. ජනතාවට අපි සත්යය පහදා දෙමින් ගම් මට්ටමින් ජන හමු පවත්වනවා. ගෙන් ගෙට යනවා. ඒ ගමනේදි අලුත් කණ්ඩායම් අපිත් එක්ක එකතු වෙනවා. එක්සත් ජාතික පක්ෂය හා සිටි ජනතාවත් මහින්ද රාජපක්ෂ මහතා වටා සිටි ජනතාවත් ඒ පක්ෂ කෙරෙහි කළකිරී අප හා එක්වෙනවා. ඉදිරි දින කිහිපය තුළදී මේ තත්ත්වය තවත් වර්ධනය කරන්න අපි බලාපොරොත්තු වනවා.
රටේ ප්රධාන ආගමික නායකයන් විශේෂයෙන් බෞද්ධ භික්ෂූණ් වහන්සේ ප්රධාන පක්ෂ දෙක හා සම්බන්ධ වී ඇති බවක් අපට පෙනෙනවා. නමුත් ආගමික නායකයන් ඔබ පක්ෂයට දිරි දෙන බවක් පෙනෙන්නට නැහැ.
නැහැ එය වැරැදියි. අපේ අපේක්ෂකයාට ආගමික නායකයින් දිරි දෙනවා. මාධ්ය එය නොදකින එකයි වැරැද්ද. පසුගිය දිනක මහනුවරදී ජාතික භික්ෂු පෙරමුණ මහා සඟ සමුළුවක් පවත්වලා අනුර කුමාර දිසානායක මහතාට ආශිර්වාද කළා. ඒ වගේම අනුර කුමාර දිසානායක මහතා ජාතික ජන බලවේගයේ ප්රතිපත්ති මල්වතු අස්ගිරි මහනාහිමිවරුන්ට පිළිගැන්වුවා. උන්වහන්සේලා අපේක්ෂකයාට ආශිර්වාද කළා ඒ ප්රතිපත්ති මාලාව අනුව කටයුතු කිරීම වැදගත් බව පෙන්වා දෙමින්. ඒ වගේම අන්යාගමික නායකයන් පක්ෂයේ ප්රතිපත්ති හා ගමන් මඟට ආශිර්වාද කර තිබෙනවා. සිංහල, දෙමළ, මුස්ලිම් මේ සියලු ආගමික නායකයන් සමඟ යන ගමනකයි අප නිරත වන්නේ.
ජනතා විමුක්ති පෙරමුණට පාර්ලිමේන්තුවේ ආසන 40ක් හිමි වූ අවස්ථාවක් තිබුණා. දැන් එය 6 ට බැහැලා. එය පක්ෂයේ පසුබෑමක් නේද?
40 දෙනෙක් හිටියේ අප සන්ධානයකින් තරග කළ අවස්ථාවේ. දැන් 6 දෙනකු පාර්ලිමේන්තුවේ ඉන්නේ ජනතා විමුක්ති පෙරමුණේ මන්ත්රීවරුන් ලෙසයි. ඒ අයුරින් බලන කළ මෙවර ජාතික ජන බලවේගය යන සන්ධානයක්, කණ්ඩායමක් නිසා අපට වැඩි බලයක් හිමි වේවි. අනෙක් පැත්තෙන් 5/6 ක බලයක් තිබුණ එක්සත් ජාතික පක්ෂය බිම් මට්ටමට ඇද වැටුණා. ඒ වගේම සුපිරි බලයක් තියාගෙන හිටපු මහින්ද රාජපක්ෂ මහතා පසුගිය ජනාධිපතිවරණයෙදි නැත්තටම නැතිවුණා. දේශපාලන පක්ෂවල ඉහළ නැඟීම් පහළ යෑම් තියෙනවා. ඒක ලංකාවේ පමණක් නෙමේ. ලෝකෙ අනිත් රටවලටත් එහෙමයි.
ඔබ පක්ෂය මෙවර එක් එක් වර්ගීකරණය යටතේ ප්රතිපත්ති මාලාවක් හඳුන්වා දී තිබෙනවා. ඒ ගැන පැහැදිලි කළොත්. ඒවා ක්රියාත්මක කළ හැකි ප්රතිපත්තිද?
අපි ප්රධාන විෂය ධාරා කිහිපයක ප්රතිපත්ති එක් රැස් කර තිබෙන්නේ. ජාතික අධ්යාපන ප්රතිපත්තියත්, සෞඛ්ය ප්රතිපත්තියත් මේ වන විට එළි දක්වා තියෙන්නෙ. එමෙන්ම පරිසර ප්රතිපත්තියත්, ප්රවාහන ප්රතිපත්තියත් ඉදිරි දිනවල එළි දක්වනවා. සමස්ත ප්රතිපත්ති අපි 26 වැනිදා කොළඹදී එළිදක්වනවා. රටකට ජාතික ප්රතිපත්තියක් අවශ්යයි. එවැන්නක් නැතිව රටක් සංවර්ධනය කරන්න බැහැ.
විශේෂයෙන්ම අධ්යාපනය ප්රතිපත්තිය ගැන ඔබ පක්ෂයේ බොහෝ දෙනෙක් කතා කළා, එහි විශේෂතා ගැන පැහැදිලි කළොත්...
අද අපේ රටේ අධ්යාපන නෙමෙයි කිසිම විෂයයක ප්රතිපත්තියක් නැහැනෙ, සෞඛ්ය ප්රතිපත්තියක් ිතයෙනවද? ප්රවාහන ප්රතිපත්තියක් තියෙනවද? රටක අධ්යාපනය, සෞඛ්ය, ප්රවාහනය කියන්නේ වෙළෙඳ භාණ්ඩ නෙමෙයි, ඒවා රජය මඟින් සලසා දිය යුතු සේවාවන්, නමුත් අද අධ්යාපනයේ සිට සියල්ල මුදල් භාණ්ඩ වෙලා, කිදහස් අධ්යාපනය කිව්වත් ඒක වදන දෙකක් විතරයි, අධ්යාපනය අද ඇති හැකි අයට පමණක් සීමා වෙලා තියෙන්නෙ. දක්ෂයාට තැනක් නැහැ. එම නිසා දරුවන්ගේ ආකල්ලයේ සිට වෙනසක් ඇති කරන අධ්යාපනය ප්රතිපත්තියක් අප හඳුන්වා දී තිබෙන්නේ. ඒ ප්රතිපත්තිය හරහා රැකියාවක් දක්වා යාමට අධ්යාපනය සකස් කර තිබෙනවා.
අධ්යාපනය හුදෙක් විෂයන්ට පමණක් සීමා කර නැහැ. මේ සියලු කටයුතු අප සිදු කර ඇත්තේ ඒ විෂයයන් සම්බන්ධව විද්වතුන්ගේ අදහස් ඇසුරින්, එම නිසා කිසිදු ගැටලුවක් ඇති වන්නේ නැහැ. අද රටේ ප්රතිපත්ති තීරණය කරන්නේ විද්වතුන් හෝ ඒ සම්බන්ධ දැනුම ඇත්තන් නෙමෙයි. එම නිසයි මෙ සියලු ගැටලු නිර්මාණය වී තිබෙන්නේ. අපේ ප්රතිපත්ති ක්රියාවට නංවන්නේ ඒ සම්බන්ධ දැනුමක් ඇති විද්වත් අදහස් හමුවේ නිසා ඒ ප්රතිපත්ති ජාතික ප්රතිපත්ති ලෙසින්ම ක්රියාවට නංවන්න පුළුවන් වේවි. අධ්යාපනය පමණක් නෙමයි අනෙක් සියලු අංශත් එසේමයි.