මෙරට සියලු පළාත් සඳහා සුඛිත පුරවර වැඩසටහන යටතේ 2016-19 වසරවලදි අලුත් සුඛිත පුරවර ව්‍යාපෘති 263ක් රුපියල් දසලක්ෂ 25250ක වියදමින් ක්‍රියාවට නංවා ඇතැයි නාගරික සංවර්ධන අධිකාරියේ අධ්‍යක්ෂ ජනරාල් සුමේධ රත්නායක මහතා පවසයි.
මේ සියලු නාගරික සංවර්ධන ප්‍රදේශවල බස්නැවතුම්පළ, නාගරික වෙළෙඳපොළ, ඇවිදින මං තීරු, නාගරික උද්‍යාන ආදිය ඇතුළත්ව සියලු නාගරික යටිතල පහසුකම් ඉදිකිරීම තිබෙන යටිතල පහසුකම් වැඩිදියුණු කිරීම මේ සුඛිත පුරවර වැඩසටහන යටතේ සිදුකරනු ලැබේ. බස්නාහිර හා මහනගර සංවර්ධන ඇමැති පාඨලි චම්පික රණවක හා අමාත්‍යාංශ ලේකම් ඉංජිනේරු නිහාල් රූපසිංහ යන මහත්වරුන්ගේ උපදෙස් මත මෙම වැඩසටහන ක්‍රියාත්මක වේ. මේ යටතේ දැනටමත් නව ව්‍යාපෘති 132ක් රුපියල් මිලියන 10830 වියදමින් අවසන් කර ඇති බවත්, තවත් ව්‍යාපෘති 131ක් රුපියල් මිලියන 14450 වියදමින් ක්‍රියාත්මක කරන බවත් සුමේධ රත්නායක මහතා පවසයි. දැනට බස්නාහිර පළාතේ සුඛිත පුරවර ව්‍යාපෘති 70ක්ද දකුණු පළාතේ ව්‍යාපෘති 12ක්ද මධ්‍යම පළාතේ නව ව්‍යාපෘති 14ක්ද උතුරුමැද ව්‍යාපෘති 11ක්ද අවසන් කර ඇත. ඒ සමඟම බස්නාහිර පළාතේ සුඛිත පුරවර ව්‍යාපෘති 49ක්ද දකුණු පළාතේ ව්‍යාපෘති 9ක්ද මධ්‍යම පළාතේ ව්‍යාපෘති 30ක්ද ඌව පළාතේ නව ව්‍යාපෘති 11ක්ද ක්‍රියාවට නංවමින් තිබේ.
