යුරෝපයෙන් මෙතෙක් හමු වූ විශාලතම මිනීවළ

දකුණු ජර්මනියේ පුරාවිද්‍යාඥයන් විසින් වසංගතයට ගොදුරු වූවන් 1,000කගේ ඇටසැකිලිවලින් සමන්විත වළවල් අටකින් සොයාගෙන ඇති අතර එය යුරෝපයේ මෙතෙක් කැණීම් කරන ලද විශාලතම සමූහ මිනීවළ විය හැකිය.

නියුරම්බර්ග් නගරයේ ඉදිකිරීම් කටයුතුවලට පෙර සිදු කරන ලද කැණීම්වලදී 15 වන සියවසේ අගභාගයේ සිට 17 වන සියවසේ මුල් භාගය දක්වා වූ අවදියකට අයත් වැඩිහිටියන්, ළමුන් සහ ළදරුවන්ට අයත් ඇටසැකිලි සිය ගණනකින් පිරී ඇති වළවල් අටක් අනාවරණය විය. පුරාවිද්‍යාඥයන් විසින් කැණීම් කර අවසන් කරන ලද වළවල් තුනෙන් දෙකක වළං කැබලි සහ රිදී කාසි ද සොයාගෙන ඇත.

මෙම කාසි 1619 වසරට අයත් වන අතර ඒවා 1622 සහ 1634 අතර සිදු වූ වසංගත රෝග පැතිරීම සමඟ සමපාත වන බව රේඩියෝ කාබන් 14 කාල නිර්ණය මඟින් තහවුරු වී තිබේ.