වසර පන්සියයකට පෙර අතුරුදන් වූ නෞකාවක්, රන් කාසි ද සමඟින් නිරිතදිග අප්‍රිකාවේ කාන්තාර ප්‍රදේශයකින් සොයා ගැනීමට පුරාවිද්‍යාඥයෝ සමත් වෙති. බොම් ජීසස් (Bom Jesus) (ජේසු දෙවිඳුන්) යනු 1533 මාර්තු 7 වැනි සිකුරාදා පෘතුගාලයේ ලිස්බන් අගනුවර සිට යාත්‍රා කළ පෘතුගීසි යාත්‍රාවකි. නැමීබියාවේ කාන්තාරයක වෙරළාසන්නයේ, 2008 වසරේ සිදු කෙරුණු දියමන්ති කැණීමකදී එහි නටබුන් සොයා ගන්නා තෙක් එම නෞකාවේ ඉරණම කිසිවෙකු දැන නොසිටියහ. දරුණු කුණාටුවකට හසුවී එම නෞකාව ගිලී යන විට එය රන් හා තඹ කැට වැනි නිධන් පටවා ගෙන ඉන්දියාවට යාත්‍රා කරමින් සිටියේය. පිරිසිදු රන් කාසි දෙදහසක් සහ තඹ පවුම් දස දහස් ගණනක් බොම් ජීසස් මත තිබී සොයා ගන්නා ලදි.
නැමීබියාවේ වෙරළට ඔබ්බෙන් ඇති වූ කුණාටුවක් හමුවේ වෙරළට ඉතා සමීපව යාත්‍රා කරමින් තිබිය දී බොම් ජීසස් නෞකාව ගිලී ගිය බවත්, නෞකාවේ බඳ පර්වතයක ගැටීම හේතුවෙන් නැව පෙරළී ගොස් ඇති බවත් පුරාවිද්‍යාඥයෝ අනුමාන කරති. වෙරළ තීරයේ ජලය බැස යන විට, බොම් ජීසස් නෞකාව කාන්තාරයේ යළි මතු විය.
