පාස්කු බෝම්බ ප්‍රහාරය නිසා සංචාරක කර්මාන්තය බිඳ වැටුණි. මේ නිසා මෙරට රැඳී සිටි, මෙරටට පැමිණීමට නියමිතව සිටි බොහෝ සංචාරකයන් සිය සංචාරයන් අවලංගු කළ අතර එහි පහර වැදුණේ මේ තාක් මෙරට සංචාරක කර්මාන්තය දියුණු වීමට හේතුවූ, සංචාරකයන් ආකර්ෂණය වීමට පෙලඹවූ සංචාරක ආයතන, සංචාරක මාර්ගෝපදේශකයන්, හෝටල් ආයතන, ඍජු හා වක්‍ර සංචාරක රැකියා කරන්නන්ය.
බොහෝ හෝටල්වල, සංචාරක නියෝජිත ආයතනවල සේවය කරන්නන්ට ඉවත් වීමට සිදුවූ අතර තම වැටුප ද අහිමි විය. රටේ අනන්‍යතාව සංචාරකයන් වෙත ගෙන ගිය සංචාරක මාර්ගෝපදේශකයන්ට තම කුසගිනි නිවා ගැනීමට පවා මුදල් නැතිවිය. එසේම ඍජු හා වක්‍ර ලෙස සංචාරක කර්මාන්තයට සම්බන්ධ රැකියා කරන කුඩා වෙළෙඳාම් සිදුකරන, ආහාර සැපයුම්කරන්නන්, හස්ත කර්මාන්ත සිදු කරන්නන් ආදී බොහෝ පිරිසකට තම කුසගිනි නිවා ගැනීමට එදා වේල පවා සොයා ගැනීමට අපහසු විය. ඇතැම් පුද්ගලයන් තම ණය තුරුස් ගෙවා ගැනීමට පවා නොහැකි අසරණ වී ඇත. ඔවුන් තවමත් වැටුණු වළෙන් ගොඩ ඒමට නොහැකිව අසරණ වී ඇත.
එමනිසා ඔවුන්ගේ හෙට දවස වෙනුවෙන් යම් සහනදායි වැඩපිළිවෙළක් ප්‍රාදේශීය, ග්‍රාමීය, නාගරික වශයෙන් දියත් කර මෙරට සංචාරක කර්මාන්තය යළි නඟා සිටුවීමට බලධාරින් විසින් කටයුතු කරන්නේ නම් යහපත්ය.
දර්ශිකා තරංගනි
