අයිස්ලන්තයේ විදාරණය වූ ගිනි කන්දේ සුන්දරත්වය සහ විනාශකාරී ස්වභාවය යන දෙකම පෙන්වන විස්මිත ඩ්‍රෝන දර්ශන දිනපතාම පාහේ මාධ්‍යයට ලැබෙමින් පවතී. සෑම තත්පරයකම ලාවා ඝන මීටර් 100 ත් 200 ත් අතර ප්‍රමාණයක් විහිදු වන රේක්යානස් අර්ධද්වීපයේ සැතපුම් දෙකක් දිගැති අගලක් විවෘත ව පවතී.
ගිනි කන්ද පුපුරා ගිය ස්ථානයට ආසන්න නගරයක පදිංචිකරුවන්ට තම නිවෙසේ නත්තල් කාලය ගත කිරීමේ බලාපොරොත්තු සුන් වී ඇත. මේ අතර, සඳුදා රාත්‍රියේ පැවති මනස්කාන්ත දර්ශනවලින් පසු රේකාවික් අගනුවර වායු දූෂණය වීමේ අවදානමක් උද්ගතව පවතී.
විශේෂඥයන් පවසන්නේ ලාවා ගලායාම සති අන්තයේ හෝ ලබන සතියේ නතර විය හැකි අතර විදාරණය සති කිහිපයක් හෝ මාස ගණනක් මන්ඳගාමී වේගයකින් සිදු විය හැකි බවයි.
අයිස්ලන්තයේ රේක්යානස් අර්ධද්වීපයේ ප්‍රබල භූකම්පන ගණනාවකින් පසු මධ්‍යම රාත්‍රියේ අසල පිහිටි ධීවර නගරයක් වන ග්‍රින්ඩාවික් වෙතින් පුද්ගලයන් 4,000ක් ඉවත් කර ගැනීමෙන් සති පහක් ගතවී ඇත.
