අන්තවාදී කණ්ඩායම් හා පිරිස් සමඟ ඇති ගිවිසුම් හෙළි කරන ලෙස නව ප්‍රජාතන්ත්‍රවාදී පෙරමුණේ ජනාධිපති අපේක්ෂක සජිත් ප්‍රේමදාස මහතා විපක්ෂ නායක මහින්ද රාජපක්ෂ මහතාට අභියෝග කරමින් ලිපියක් යොමු කර ඇත.
ඒ අනුව පිල්ලයාන්, වර්ධරාජා පෙරුමාල්, කරුණා අම්මාන්, එම්.එල්.ඒ.එම්. හිස්බුල්ලා සමඟ ඇති රහස් ගනුදෙනු හා ගිවිසුම් හෙළි කරන ලෙස ඔහු අභියෝග කර තිබේ. විශේෂයෙන්ම නත්තල් උත්සවයේදී යාඥා කරමින් සිටි පාර්ලිමේන්තු මන්ත්‍රීවරයකු ඝාතනය කළ පිල්ලෙයාන් එයින් නිදහස් කරන බවට පොරොන්දු වීමට හේතුව, වර්ධරාජා පෙරුමාල් සමඟ ඇති රහස් ගනුදෙනුව මෙන්ම කරුණා අම්මාන් සමඟ ඇති රහස් ගනුදෙනුව හෙළි කරන ලෙස සජිත් ප්‍රේමදාස මහතා විසින් මහින්ද රාජපක්ෂ මහතාට දන්වා ඇත.
එසේම එම්.එල්.ඒ.එම්. හිස්බුල්ලා පාස්කු ඉරිදා ප්‍රහාරයට සම්බන්ධිත ත්‍රස්තවාදියෙකු බව පැවසුවත් තම සහෝදරයාට දෙවන ඡන්දය ප්‍රකාශ කරන ලෙස ඔහුගේ ආධාරකරුවන්ගෙන් ඉල්ලා සිටීම වෙනුවට ඔහුට ලබා දුන් රහසිගත පොරොන්දුව කුමක්ද? යන්නද ඔහු විමසා සිටී.
ශ්‍රී ලංකාවේ එක්සේසත්කම, භෞමික අඛණ්ඩතාව සහ ස්වෛරීභාවයට ලොකුම තර්ජනය එල්ල වන්නේ අන්තවාදීන්ගේ කල්ලිවලින් බවත් ඔවුන්ගේ බලය තහවුරු කර ගැනීම සඳහා ඔවුන් අපේ ජනතාව බිය ගැන්වීමට හා බෙදීම ඇතුළුව ඕනෑම දෙයක් කිරීමට ඔවුන් සූදානමින් සිටින බවත් මහින්ද රාජපක්ෂ මහතා මෙහෙයවන දේශපාලන සන්ධානය මෙරට තුළ මෙතෙක් දැක ඇති සෑම අන්තවාදී වර්ගයකින්ම පිරී තිබෙන බවද සජිත් ප්‍රේමදාස මහතා පෙන්වා දී තිබේ.
ගෝඨාභය රාජපක්ෂ මහතාට විවාදයකට මුහුණ දීමට හෝ කිසියම් වැදගත් ප්‍රශ්නයකට පිළිතුරු දීමට ධෛර්යය නොමැති බැවින්, ඉහත සඳහන් ප්‍රශ්නවලට ඔහු නොදෙන පිළිතුරු, හිටපු ජනාධිපති වරයා මෙන්ම ඔහුගේ මැතිවරණ ව්‍යාපාරයේ මුලින්ම සිටින විපක්ෂ නායක වරයා විසින් ලබා දිය යුතු බවට සජිත් ප්‍රේමදාස මහතා පවසයි. සජිත් ප්‍රේමදාස මහතා විසින් යොමු කරන ලද ලිපියේ මෙසේද දැක්වේ.
