අද වන විට පොදු ප්‍රවාහන සේවයේ වැඩිදියුණු තත්ත්වයක් පෙන්නුම් කළත් එය දක්නට ලැබෙන්නේ බස්රථ ගමන් කරන ප්‍රධාන මාර්ගවල මිස අප්‍රධාන මාර්ගවල නම් නොවේ. බස්රථයක් නොමැතිව සැතපුම් 4ක් 5ක් පයින් හෝ ත්‍රීවීලර්වල යන ඇතුළු ගම්මානවල ජීවත්වන ජනතාව බස්රථ ඉල්ලා හඬක් නැඟුවද ඔවුන් වෙනුවෙන් බස්රථ ලබා දෙන්නේ කලාතුරකිනි. එසේ බස්රථයක් යෙදවුවත් යොදවන්නේ ශ්‍රී ලංගම බස් රථයක් මිස පෞද්ගලික බස්රථ නොවේ.
එහෙත් වසර 50 කට ආසන්න කාලයක් පුරා ඇතුළු ගම්වල ධාවනය වූ ශ්‍රී ලංගම බස් රථයක් ධාවනයෙන් ඉවත් කර තිබීම පුදුම සහගතය. එමෙන්ම කනගාටුදායකය.
මෙසේ ධාවනයෙන් ඉවත් කර තිබෙන්නේ ජා - ඇල ඩිපෝවට අයත් මඩම හංදිය - කලඑළිය බස්රථයයි. පාරිස් පෙරේරා මහතා ජා - ඇල පාර්ලිමේන්තු මන්ත්‍රීවරයකුව සිටින කාලයේදී ධාවනයට එක් කළ මෙම බස්රථය කලඑළිය, වෑවල, දෙහියගාත, උදම්විට, කුඩහකපොළ, දඹදුරය වැනි ප්‍රධාන මාර්ගයෙන් ඇතුළතට පිහිටි ගම්වාසින්ට ඉමහත් සේවාවක් සැලසුණු බස්රථයක් විය. ජා - ඇල කපුවත්ත හංදියෙන් හරවා කිලෝ මීටර් 4ක් පමණ අතුළට වන්න පිහිටි කලඑළියේ මුල්ලට ගොස් ආපසු හරවා කපුවත්ත හංදියෙන් ප්‍රධාන මාර්ගයට වැටී ජා - ඇල, තුඩැල්ල හරහා ගොස් දෙහියගාත හන්දියෙන් හරවා උදම්විට, කුඩහකපොල වැනි ගම් හරහා ධාවනය කර ඒකල කාර්මික ජනපදය ඔස්සේ මෙම බස් රථය ඒකල මඩම හංදියට පැමිණියේය.
ප්‍රධාන මාර්ගයට පැමිණෙන පාසල් ළමුන්ට, රැකී රක්ෂා සඳහා යනෙන අයට සහ එදිනෙදා කටයුතු සඳහා නගරයට පැමිණි අයට මෙම බස්රථය ඉතාමත් පහසුවක් විය.
එමෙන්ම කාර්මික ජනපදයේ සේවයට යන අයටද මෙම බස්රථයෙන් සැලසුණේ අපමණ සේවයකි. එහෙත් කපුවත්ත හංදියේ, කලඑළියෙ, දෙහියගාත වැනි ප්‍රදේශවල තිබෙන ත්‍රීරෝද රථ සංගම්වල බලපෑමෙන් පණ ඇද ඇද තිබුණු කලඑළිය - මඩම හන්දිය බස්රථය දැන් වසර 2ක, 3ක පටන් සම්පූර්ණයෙන්ම නැවතී තිබේ.
මෙහි වාසිය භුක්ති විඳින්නේ ත්‍රීරෝද රථ රියදුරන්ය. පාඩුව භුක්ති විඳින්නේ පොදු මගී ප්‍රවාහන සේවය භාවිත කරන ජනතාවය. පුද්ගලික වාහන පරිහරණය කරන අයට බස්රථයක් අහිමි වීම එතරම් දැනෙන දෙයක් නොවේ. එහි පාඩුව දැනෙන්නේ දුප්පත් ජනතාවටය.
ත්‍රීරෝද රථ මාෆියාවට බිය නොවී, වසර 50 ක් පමණ ධාවනයේ යෙදවූ මෙම බස්රථය දුප්පත් ජනතාව වෙනුවෙන් යළි ලබා දෙන මෙන් ප්‍රවාහන ඇමතිතුමාගෙන් ඉල්ලා සිටිමි.
ජි. ජුඩ් ලක්ෂිත කොස්තා
කලඑළිය.
