බස්නාහිර පළාතේ පාසල්වල පවතින ගුරු පුරප්පාඩු සඳහා ශ්‍රී ලංකා ගුරු සේවයේ 3 වන පන්තියේ 1 ශ්‍රේණියට උපාධිධාරීන් ගුරුවරුන් ලෙස බඳවා ගැනීමේ (කලා) තරග විභාගය (2014) 2014.12.27 දින පැවැත්විණි. ඉහත තරග විභාගයෙන් ලකුණු 118ක් ලැබූ මම, 2016.10.24 දින බත්තරමුල්ල, මහවීදියේ පිහිටි බස්නාහිර පළාත් රාජ්‍ය සේවා කොමිෂන් සභාවේ පැවති සම්මුඛ පරීක්ෂණයට සහභාගි වුණෙමි.
ඉන්පසු මේ පිළිබඳව මා වෙත කිසිදු දැනුම් දීමක් සිදු නොවුණි. පසුකාලීනව ලකුණු 118ට අඩුවෙන් ලකුණු ලබා ගත්තවුන්ට පවා ගුරු පත්වීම් ලැබුණු බව දැන ගත හැකි විය.
ඒ අනුව 2016 අංක 12 දරන තොරතුරු දැනගැනීමේ අයිතිවාසිකම පිළිබඳ පනත යටතේ මෙම ගුරු පත්වීම් ලබා දීම පිළිබඳව බත්තරමුල්ල, රන්මඟපායේ පිහිටි බස්නාහිර පළාත් අධ්‍යාපන අමාත්‍යාංශයේ තොරතුරු නිලධාරී වෙතින් කරුණු විමසීමි. ඒ අනුව මා විසින් ඉල්ලන ලද තොරතුරු බස්නාහිර පළාතේ අධ්‍යාපන අමාත්‍යාංශයේ නොමැති බැවින්, අදාළ තොරතුරු බස්නාහිර පළාත් රාජ්‍ය සේවා කොමිෂන් සභාවට යොමු කර ලබා ගන්නා ලෙස දන්වන ලදී.
ඒ අනුව බස්නාහිර පළාත් රාජ්‍ය සේවා කොමිෂන් සභාවේ තොරතුරු නිලධාරී වෙත 2018.07.05 දින ලිපියක් යොමු කරමින් කරුණු 08ක් යටතේ, තොරතුරු ඉල්ලා සිටියෙමි.
මාගේ විමසීමට අනුව බස්නාහිර පළාත් රාජ්‍ය සේවා කොමිෂන් සභාවේ තොරතුරු නිලධාරී විසින් තොරතුරු ඉල්ලීම ලැබුණු බව දැන්වීම, තොරතුරු ඉල්ලීම භාරගත් බව දැන්වීම සහ තොරතුරු ලබාදීමේ කාලය දීර්ඝ කිරීම යන ශීර්ෂ යටතේ මා වෙත පිළිතුරු ලිපි එවා තිබුණි.
නමුත් බස්නාහිර පළාත් රාජ්‍ය සේවා කොමිෂන් සභාවේ තොරතුරු නිලධාරී විසින් දන්වනු ලැබූ අමතර දින 21 ද පසු වී මාස තුනකට අධික කාලයක් ගත වුවත්, අදාළ තොරතුරු නොලද්දෙමි. එනිසා, යළිත් ඒ පිළිබඳව සිහි කැඳවීමේ ලිපියක් 2018.12.31 දින යොමු කළෙමි. එම ලිපිය ද යොමු කර මාස 06කට අධික කාලයක් ගතව ඇති නමුත් කිසිදු පිළිතුරක් මා වෙත නොලැබිණි. එනිසා මේ පිළිබඳව තොරතුරු දැනගැනීමේ කොමිෂන් සභාවේ අවධානය යොමු කරවීමට ද ක්‍රියා කර ඇත.
2015 දී බලයට පත් යහපාලන ආණ්ඩුව, 2016 අංක 12 දරන තොරතුරු දැනගැනීමේ අයිතිවාසිකම පිළිබඳ පනත සම්මත කොට තහවුරු කළේ ජනතාවගේ තොරතුරු දැනගැනිමේ අයිතිවාසිකමයි. එකී අයිතිවාසිකම තඹ දොයිතුවකටවත් මායිම් නොකර, ජනතා සේවය මඟහරිමින් ජනතාවගේ බදු මුදලින් පඩිකන මෙවැනි අකාර්යක්ෂම රාජ්‍ය නිලධාරීන් සමස්ත රාජ්‍ය සේවයටම අපකීර්තියක් එක් කරනවා නොවේද?
ආර්.ඒ. නයනානන්ද
