888
අලුත් අවුරුදු සමයේ ශ්‍රී ලංකා ගමනාගමන මණ්ඩලය රුපියල් මිලියන 1500ක පමණ ආදායමක් උපයා තිබේ. අප්‍රේල් මස 05 වනදා සිට 16 දක්වා මේ ආදායම උපයා ඇති බව කී එහි සභාපති ලලිත් ද අල්විස් සතියක කාලයක් තුළ ලංගම අධිවේගී මාර්ග ආදායම ලෙස රුපියල් මිලියන 130ක් ඉපැයූ බවද කීවේය.
මගී ගමනාගමනය අඩාළ නොවන ලෙස අලුත් අවුරුදු සමයේ අවශ්‍ය තරම් බස් රථ ධාවනයට යොදවන ලෙස ප්‍රවාහන මහාමාර්ග හා ජනමාධ්‍ය ඇමැති ආචාර්ය බන්දුල ගුණවර්ධන උපදෙස් දුන් බව කී ඒ මහතා දිවයින පුරා සාමාන්‍ය අයුරින් ධාවනය වන බස් රථ ඇණියට අමතරව තවත් අමතර බස් රථ 700ක් යෙදවූ බව ද කීය. වැඩිම බස් රථ ප්‍රමාණයක් ධාවනයට එක් කරනු ලැබුයේ පසුගිය 12 වනදා යැයි කී ඒ මහතා එදින බස් රථ 1200ක් දිවයින පුරා ධාවනයට එක් කළ බවත් කියා සිටියේය.
සුභාෂිණී සේනානායක