මහනුවර සිට කොළඹ බලා ධාවනය කළ සහ නාවලපිටිය සිට කොළඹ බලා ධාවනය වූ හෝමාගම ඩිපෝවට අයත් බස් රථ දෙකකට අවිස්සාවේල්ලේදී සහ ගොඩගමදී ප්‍රහාර දෙකක් එල්ල කර ඇත.
NB 2514 දරන පෞද්ගලික බස් රථයෙන් අවිස්සාවේල්ලේදී පහර දීමෙන් තුවාල ලත් ලංගම කොන්දොස්තරවරයෙක් අවිස්සාවේල්ල රෝහලට ඇතුළත් කර ඇති අතර එම බස් රියෙන්ම පැමිණ ගොඩගමදී කළ පහරදීමෙන් තුවාල ලැබූ කොන්දොස්තරවරයෙක් හා බස් රියැදුරෙක් හෝමාගම රෝහලේ ප්‍රතිකාර ලබති.
ගොඩගමදී කළ පහර දීම සම්බන්ධයෙන් NB 2514 බස් රථයේ කොන්දොස්තරවරයා ගොඩගම මංසන්ධියේ සේවය කළ වේලා සටහන්කරුත් අත්අඩංගුවට ගෙන මේ වනවිට රක්ෂිත බන්ධනාගාරගත කර ඇත.
පොදු ප්‍රවාහන සේවා සපයන ලංගම සේවයට බාධා කළ මැරයන් අත්අඩංගුවට ගැනීමත් සමඟ අවිස්සාවේල්ල – කොළඹ පෞද්ගලික බස් ධාවනය අඩපණ වී ඇති අතර පොලිස්පතිවරයාගේ විශේෂ නියෝග මත අවිස්සාවේල්ල, කොස්ගම, ශාලාව, ගොඩගම යන හෝමාගම පොදු මගී ප්‍රවාහන සේවාවන්හි ආරක්ෂාව දැඩි කර ඇති අතර පොලිස් විශේෂ ජංගම ආරක්ෂක රථ ද යොදවා ඇතැයි වාර්තා වෙයි.
