වසර 2030 වන විට කාබන් මධ්‍යස්ථභාව (Carbon Neutrality) සාක්ෂාත් කර ගැනීම උදෙසා LOLC ෆිනෑන්ස් පීඑල්සී වෙත පරිසර අමාත්‍යාංශය යටතේ ක්‍රියාත්මක වන ශ්‍රී ලංකා දේශගුණික අරමුදල විසින් හරිතාගාර වායු (GHG) ප්‍රමාණකරණය සහ වාර්තාකරණය වෙනුවෙන් ISO 14064:1 හරිතාගාර වායු සත්‍යාපන සහතිකය පිරිනමන ලදී. මෙම සත්‍යාපන සහතිකය, ඉකුත් සැප්තැම්බර් 20 වැනිදා බත්තරමුල්ල සොබාදම් පියසේ පිහිටි පරිසර අමාත්‍යාංශයේ ශ්‍රී ලංකා දේශගුණික අරමුදල් කාර්යාලයේදී LOLC ෆිනෑන්ස් පීඑල්සී වෙත පිළිගැන්විණි.
මෙම ඇගැයීම මගින් සමාගමේ ප්‍රධාන කාර්යාලය සහ ශාඛා 204 ඇතුළත් එහි පුළුල් ජාලය ආවරණය කරයි. LOLC ෆිනෑන්ස් පීඑල්සී හි තිරසරභාව පිළිබඳ කළමණාකාරීනී සිතුමිණි විජේරත්න සිය අදහස් පළ කළේ මෙලෙසිනි. “අපි අපගේ හරිතාගාර වායු විමෝචන මැනීම සහ වාර්තාකරණය සිදු කළ අතර, මෙම පිළිගැනීම මඟින් අපගේ උත්සාහයන්ට වලංගුභාවයක් හිමි වුණා. මේ සෑම පියවරක් සමඟින් මූල්‍ය සේවා ක්ෂේත්‍රයේ ප්‍රමුඛතම කාබන් සවිඥානික සමාගමක් බවට පත්වීමේ පදනම අප සකස් කරමින් සිටිනවා”.
