ලොව වෙසෙන ජනතාවෙන් බොහෝ පිරිසක් ඉංග්‍රීසි භාෂාව කතා කරන බව අප සිතා සිටිය ද සියයට 80ක් ජනතාව ඉංග්‍රීසි භාෂාව කතා නොකරති. එනිසා ඉංග්‍රීසි මාධ්‍ය ප්‍රමුඛ කොට පවතින බොහොමයක් අන්තර්ජාල පහසුකම් ලබා ගැනීමට ඔවුන් අපොහොසත් වෙති. නොඑසේ නම් ඔවුන්ට අවශ්‍ය බොහෝ දෑ ඒ තුළ තිබුණ ද ඒවා තම භාෂාවෙන් නොමැති නිසා එකී සේවාවන් ලබා ගැනීමට ඔවුන් මැළි වෙති.
මේ ගැටලුවට විසඳුමක් ලබාදීමට ඉකුත් දා ශ්‍රී ලාංකිකයන් දෙදෙනකු සමත් විය. ඒ මිතුරන් දෙදෙනකු වන බුද්ධික කොට්ටහච්චි සහ සසක්ති අබේසිංහ ය. ඔවුන් විසින් කෘතිම බුද්ධි ආශ්‍රයෙන් නිර්මාණය කළ “අලවුඩ්” (Aloud) මෙවලම හඳුන්වාදීම මඟින් යූටියුබ් සමාජ මාධ්‍ය ජාලය තුළ ඉංග්‍රීසි භාෂාව නොමැතිව එහි පරිශීලකයන්ට ඔවුන් කැමැති භාෂාවකින් වීඩියෝ නැරඹීමට හැකියාව ලැබී ඇත. ඒ අනුව මෙමඟින් යූටියුබ් මාධ්‍ය තුළ අන්තර්ගත විශිෂ්ට ගණයේ වැඩසටහන් ඕනම අයකුට සිය භාෂාවෙන් සවන්දීමට අවස්ථාව හිමි වේ. මේ නව සොයා ගැනීමත් සමඟ අධ්‍යාපනික වැඩසටහන්, සෞඛ්‍ය වැඩසටහන්, නව ගෝලීය වයිරස් ප්‍රවණතා ආදිය පිළිබඳ සියලු දෑ දැනගැනීමට යූ ටියුබ් ප්‍රේක්ෂකයන්ට හැකියාව ලැබේ. මෙය යූ ටියුබ්හි පරිශීලකයන් ප්‍රමාණය ඉහළ යාමට ද හේතු වී ඇති බව යූටියුබ් සේවාව ප්‍රකාශ කර තිබේ. මෙවැනි සෑම විශිෂ්ට නිෂ්පාදනයක් පිටුපසම විශිෂ්ට කතාවක් ඇත. 
ගල්කිස්ස ශාන්ත තෝමස් විද්‍යාලයේ ආදි ශිෂ්‍යයකු වූ බුද්ධික කොට්ටහච්චි සහ කොළඹ රාජකීය විද්‍යාලයේ ආදි ශිෂ්‍යයකු වූ සසක්ති අබේසිංහ කුඩා අවදියේ පටන් පාඨශාලාන්තර තරගවලදී ප්‍රතිවාදීන් විය. මේ ප්‍රතිවාදින් දෙදෙනා එක්ව කටයුතු කරන මිතුරන් බවට පත් වන්නේ SEARCC සහ IOI තරග සඳහා ශ්‍රී ලංකාව නියෝජනය කිරීමට එකට පුහුණුව ලබමින් සිටියදීය. ඔවුන් දෙදෙනාම පෙළපොත් ඇල්ගොරිතම ක්‍රියාත්මක කරන්නන් වශයෙන් පුහුණු වීම් ඇරඹුව ද අවසානයේ ඔවුන් දෙදෙනාම වඩා දක්ෂ වූයේ කේත හැකර්වරුන් වීමටය. මෙනිසා වසර ගණනාවක් තිස්සේ යහළුවන් සේ එකට බැඳී වැඩ කිරීමට ඔවුන් ට හැකි විය. දෙදෙනාම වෘත්තිකයන් ලෙස ගූගල් ආයතනයේ කටයුතු කළ නිසා එකිනෙකා නිරන්තරයෙන් හමු වූ අතර එහිදී විවිධ අදහස් බෙදාගත් අතර සහයෝගයෙන් කටයුතු කිරීමට ද පටන් ගත්තේය. බුද්ධික සහ සසක්ති කෘතිම බුද්ධිය ආධාරයෙන් අලවුඩ් (Aloud) නම් මෙවලම ගූගල් (Google)හි අභ්‍යන්තර ඉන්කියුබේටරය වන Area 120 හි කොටසක් ලෙස සංවර්ධනය කරන ලද අතර එය ඔවුන් දෙදෙනා විසින් මෙහෙයවන ලදී.
අලවුඩ් කෘතිමි බුද්ධි මෙවලමේ කණ්ඩායම් නායකයා සහ ප්‍රධාන මෘදුකාංග ඉංජිනේරුවරයා වන්නේ සසක්තිය. අලවුඩ් සඳහා අදහස පැමිණි ආකාරය පිළිබඳව අදහස් දක්වමින් සසක්ති පවසා සිටියේ “අපි කොරෝනා ලොක්ඩවුන් සමයේ කම්මැළිකමින් ගත කළ කාලය තුළ යූටියුබ් වැඩසටහන් නරඹමින් සිටියා. ඇතැම් වැඩසටහන් වෙනත් භාෂාවලින් තිබුණ නිසා ඒවා නැරඹීම අපහසු වුණා. ලොක්ඩවුන් කාලය නිසා හඬකැවීම් කිරීමට අවශ්‍ය හඬ කවන ශිල්පීන්ට චිත්‍රාගාරයේදී හමුවීමට නොහැකි වූ නිසා අප ඊට විකල්පයක් සෙවිමට උත්සාහ ගත්තා. බුද්ධික නිල වශයෙන් යූටියුබ් ආයතනය තුළ නිෂ්පාදන ප්‍රධානියා ලෙස කටයුතු කරන අතර යූටියුබ් හඬකැවීම් අධීක්ෂණය කරයි. මේ ගැටලුවත් එක්ක බුද්ධික වීඩියෝ සඳහා ශබ්ද විකාශනය කිරීම පිළිබඳ අදහස මතු කළා. ඒ සඳහා වෙහෙස මහන්සි වී වැඩ කිරීමට අප කටයුතු කළා. අදත් මට ඒ ගැන තිබෙන්නේ පුදුමාකාර සතුටක් මොකද මේ ගැටලුව නිසා අපි දෙදෙනා ම තුළ පැවති වටිනාකම් අප හඳුනා ගත්තා.
ශ්‍රී ලංකාවට රූපවාහිනිය හඳුන්වා දුන් සමයේ බුද්ධික කුඩා දරුවකු වූ අතර ඔහු සිංහලෙන් හඬ කැවූ ඉංග්‍රීසි සහ වෙනත් භාෂාවල වැඩසටහන් ඉතා ආශාවෙන් බලන්නට පුරුදුව සිටියේය. ඔහු මෙසේ පවසයි “මම ඒ කාලේ ඉංග්‍රීසි කතා කළේ නැහැ. නමුත් එහි පෙන්වූ බොහෝ වැඩසටහන් විකාශනය වූයේ ඉංග්‍රීසි මාධ්‍යයෙන්. එනිසා රූපවාහිනිය මට මිනිසුන් රිංගා සිටින මැජික් පෙට්ටියකට වඩා වැඩි යමක් ලෙස දැනුණා. නමුත්, ක්‍රමක්‍රමයෙන් ලොව පුරා විකාශනය වූ වැඩසටහන් වැඩි වැඩියෙන් මා කතා කරන භාෂාව වන සිංහල භාෂාවට පරිවර්තනය වුණා. “Towards 2000” සහ “That’s Incredible!” වැනි සංදර්ශන තාක්‍ෂණය පිළිබඳ මගේ උනන්දුව ඇති කළා. මේ උනන්දුව නිසා ආපු ගමන තමයි මේ දක්වා මා රැගෙන ආවේ.
ලිඛිත ආකෘතියේ සිට වීඩියෝ පටයට දැනුම මාරු වීමත් සමඟ එහි වෙනසක් ඇති විය. ජංගම දුරකතන භාවිතය වැඩි වන විට එම දැනුම YouTube වැනි වේදිකා හරහා වැඩි වැඩියෙන් මිනිසුන්ට ප්‍රවේශ විය හැකි වුවත් භාෂාව බාධකයක් ලෙස පැවතිණි. එම පරතරය පියවා ගැනීමට අලවුඩ් කෘතිම බුද්ධි මෙවලම විශාල පිටිවහලක් බවට පත් වෙමින් තිබේ.
අලවුඩ් කෘතිම බුද්ධි මෙවලම පළමුව ගූගල් හි ඒරියා 120 හි කොටසක් ලෙස නිර්මාණය වූ අතර පසුව එය සම්පූර්ණයෙන් ම නව නිෂ්පාදනයක් ලෙස ගොඩනැඟිනි. ඒ පිළිබඳ අදහස් දක්වමින් සසක්ති පවසා සිටියේ “ බොහෝ ආකාරවලින් එය ආරම්භයක් වූ බවයි. ස්වයං පාලනයක්, නිර්මාණාත්මක ගැටලු විසඳීම සඳහා විශාල ඉඩක් සහ අභියෝග රාශියක් අපට ජය ගැනීමට සිදු වූ නමුත් ගූගල් හි සේවයේ නිරතව සිටීමෙන් පුදුමාකාර වරප්‍රසාදයක් අපට ලැබී තිබුණා. ඒ ගූගල් විසින් පිරිනමනු ලබන විශ්මිත දක්ෂතා, තාක්‍ෂණය සහ බෙදා හැරීමේ හැකියාවන් වෙත අපට ප්‍රවේශ වීමට අවස්ථාව උදා වීම නිසයි. එය අධ්‍යයනයේදී විශිෂ්ට අත්දැකීමක් වූ අතර අපට පරිපූර්ණව සිතීමට අවස්ථාව ලබා දුන් දෙයක් වුණා.
බුද්ධික නිල වශයෙන් යූටියුබ් ආයතනය තුළ නිෂ්පාදන ප්‍රධානියා ලෙස කටයුතු කරන අතර යූ ටියුබ් හඬකැවීම් අධීක්ෂණය කරයි. ඒ පිළිබඳ අදහස් දක්වමින් හෙතෙම පවසා සිටියේ “මගේ අවධානය යොමු වී ඇත්තේ වීඩියෝ සාදන නිර්මාණකරුවන් සහ ඒවා නරඹන්නන් යන දෙඅංශයේම අපගේ පරිශීලකයන්ට හොඳම අත්දැකීම සොයා දීමයි. මෙය සිදු කිරීම සඳහා, මම නිරන්තරයෙන් විවිධ අදහස් සොයමින් සිටිනවා. උදාහරණයක් ලෙස, මම මෑතකදී YouTube වෙත පිවිසෙන සමහර නිර්මාපකයන් සමඟ hackathon එකකට සහභාගී වූ අතර ඔවුන්ගෙන් එක් අයෙක් මගෙන් විමසුවේ පරිවර්තන සමහර විට මඳක් රොබෝ හඬකින් ඇසෙන්නේ ඇයිදැයි කියාය. එබැවින්, එම තීක්ෂණ බුද්ධිය සමඟින්, පරිවර්තනය කරන ලද කතාව වඩාත් ප්‍රකාශිත කිරීමට අපට හැකි ක්‍රම ගවේෂණය කිරීම සඳහා මා ගූගල් පර්යේෂණයේ මගේ නියමු සගයන් කිහිප දෙනෙකු සමඟ මොළය වෙහෙසීමට පටන් ගත්තා. ඒ මෙම හිඩැස් පිළිබඳව නිරන්තරයෙන් විමසිල්ලෙන් සිටීමෙන් සහ ඒවා සඳහා විසඳුම් ලබාදෙමින් අපේ නිෂ්පාදිතය වඩා සාර්ථක කර ගැනීමට හැකිවේ යැයි යන විශ්වාසයෙන්.
ඔහුගේ මූලික අරමුණ වී ඇත්තේ කණ්ඩායමට විශ්මිත දේවල් කිරීමට ශක්තිය ලබා දීමය. උපකල්පනවලට අභියෝග කිරීමට සහ මතුවන බාධා ඉවත් කර ඉදිරියට යාමට කණ්ඩායම දිරිමත් කිරීමය. මෙම උනන්දුව හා දිරිමත් කිරීමත් සමඟ අද ලොවට විශ්මිත නිර්මාණයක් හඳුන්වාදීමට ඔවුන් සමත්ව තිබේ.
අලවුඩ් සඳහා මෙතෙක් ලැබී ඇති පිළිගැනීම පිළිබඳව හා මින් ඉදිරියට කිරීමට බලාපොරොත්තු වන කටයුතු සම්බන්ධයෙන් බුද්ධික පවසන්නේ මෙවන් අදහසකි. “මේ වන විට ලොව පුරා සිටින පරිශීලකයන්ගේ ඉල්ලීම් විශාල ප්‍රමාණයක් සමඟ නිර්මාණකරුවන් සහ නරඹන්නන් යන දෙඅංශයෙන්ම අතිශයින්ම ධනාත්මක ප්‍රතිචාර ලැබී තිබෙනවා. ස්පාඤ්ඤ සහ පෘතුගීසි කතා කරන පරිශීලකයන් සඳහා හඬ කවන ලද අන්තර්ගතයන් ලබාදීමට හැකි වීම සතුටට කරුණක්. මෙනිසා වෙනත් භාෂාවලින් ලබා ගත හැකි දැනුම, අන්තර්ගතය සහ අවස්ථාවන්හි විවිධත්වය අත්හැරීමෙන් තොරව මිනිසුන්ට ඔවුන්ගේ ස්ව භාෂාව සහ සංස්කෘතිය තුළ රැඳෙමින් උකහාගත හැකිව තිබෙනවා. ඉදිරි වසර 5-10 තුළ භාෂා බාධකය අතීතයට අයත් දෙයක් වනු ඇති බවත්, ලෝකය ඊටත් වඩා සමීප කරවන බවත් අපි සැබවින්ම විශ්වාස කරමු, එබැවින් මෙය හැකි ඉක්මනින් තවත් නිර්මාණකරුවන් වෙත රැගෙන යාමට සහ අමතර භාෂාවලට ව්‍යාප්ත කිරීමට කටයුතු කරන බව හෙතෙම පවසයි.
රසික කොටුදුරගේ
