දකුණු ආසියානු කලාපයේ හොඳම සෞඛ්‍ය සේවය පැවැති රට මේ වන විට ඉතා දුර්වලම සෞඛ්‍ය සේවය පවතින රට බවට පත්වී ඇති බව ස.ජ.බ මහලේකම් පාර්ලිමේන්තු මන්ත්‍රී රංජිත් මද්දුමබණ්ඩාර සිළුමිණට කීය.
ඒ සඳහා වගකිව යුත්තේ සෞඛ්‍ය සේවකයන් හෝ වෛද්‍යවරුන් නොවන බවත් ඊට ආණ්ඩුව සම්පූර්ණයෙන්ම වගකිවයුතු බවද ඔහු පෙන්වා දුන්නේය. ‘‘ආණ්ඩුවෙ කියන්නේ දැන් රට ආර්ථික වශයෙන් සමෘද්ධිමත් කියලා. රටක ප්‍රධාන අංශයක් තමයි සෞඛ්‍යය සේවය. ඒත් අද බෙහෙත් ටික නැතිව මිනිස්සු මැරෙනවා. රටක් ආර්ථික වශයෙන් සමෘද්ධිමත් නම් එහෙම වෙන්න විදියක් නැහැ. ඒ නිසා ජනතාවට අවශ්‍ය බෙහෙත් ටික ගෙනත් දෙන්න කියලා අපි ආණ්ඩුවෙන් ඉල්ලනවා. මේ වන විට බෙහෙත් වංචාවක් සම්බන්ධයෙන් ආණ්ඩුවේ ප්‍රබල ඇමතිවරයෙක් රිමාන්ඩ් කරලා තියෙන්නෙ. බොහෝ දිස්ත්‍රික්කවල රෝහල් වසා දමන තත්ත්වයකට පත් වෙලා. මිනිස්සු බෙහෙත් ගන්න සල්ලි නැති නිසා බෙහෙත් බොන්නෙ නැතිව ඉන්නවා. මේ තත්ත්වයට සම්පූර්ණයෙන්ම ආණ්ඩුවයි වගකිවයුතුයි.”
