මේ වසර තුළ නව විදේශ රැකියා 350,000 ක් පමණ විගමනික ශ්‍රමිකයන්ට හිමිවනු ඇතැයි ශ්‍රී ලංකා විදේශ සේවා නියුක්ති කාර්යාංශය පවසයි. කාර්යාංශයේ ලියාපදිංචිව මේ වසරේ පළමු මාස එකහමාර තුළ විදෙස්ගතව ඇති සංඛ්‍යාව 38,000ක් බවද එම කාර්යාංශය පෙන්වා දෙයි.
පසුගිය 2023 වසරේ විදෙස් රැකියා පිණිස මෙරටින් නික්ම ගිය පිරිස 287,000ක් බවත් පෙර 2022 වසරේ එම සංඛ්‍යාව 321,600ක් වූ බවත් එම කාර්යාංශය පවසයි.
මේ වසරේ ඊශ්‍රායලය, කොරියාව, රුමේනියාව ඇතුළු වැඩි වැටුප් උපදවාගත හැකි රටවල් රැසකින් ඇණවුම් ලැබී ඇති බවත් ඊට අමතරව මැද පෙරදිග ඇතුළු රටවල් රැසකින් රැකියා ඇණවුම් ලැබී ඇති බව ද කාර්යාංශය පවසයි.
කෙසේ වුවත් මෙරට පුහුණු ශ්‍රමිකයන්ගේ අඩුවක් දක්නට ඇති බවත් වැඩි වැටුප් සහිත රැකියා සපයා ගැන්මට පුහුණුව ලත් විගමනිකයන් යොමු කිරීමට මේ වන විට ‘ජයගමු ශ්‍රී ලංකා‘ නමින් විදේශ රැකියා, සුභසාධන පහසුකම් ඇතුළු සේවාවන් රැසක් දිවයින පුරා පැවැත්වීමට කම්කරු හා විදේශ රැකියා අමාත්‍යාංශය හා ශ්‍රී ලංකා විදේශ සේවා නියුක්ති කාර්යාංශය එක්ව කටයුතු කර ඇත.
එහි එක් වැඩසටහනක් පෙබරවාරි 17 වැල්ලවාය මහජන ක්‍රීඩාංගණයේදි පැවැත්වීමට කටයුතු යොදා තිබුණු අතර, එය අද (18) ත් පැවැත්වේ. එය කම්කරු හා විදේශ රැකියා අමාත්‍ය මනූෂ නානායක්කාර මහතාගේ හා විදේශ රැකියා රාජ්‍ය අමාත්‍ය ජගත් පුෂ්පකුමාර මහත්වරුන්ගේ ප්‍රධානත්වයෙන් පැවැත්වේ.
තාරක වික්‍රමසේකර