අපොස උසස් පෙළ විභාගයේ කෘෂි විද්‍යාව ප්‍රශ්න පත්‍රයේ දෙවැනි කොටස විභාගය පැවැත්වීමට පෙර සමාජ මාධ්‍ය ඔස්සේ පිට කිරීමේ සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුවේ විශේෂ විමර්ශන ඒකකය මඟින් ගුරු උපදේශිකාවක් සැකපිට අත්අඩංගුවට ගෙන තිබේ.
මොරටුව කටුබැද්දේ මෝල්පේ ප්‍රදේශයේ පදිංචිකාරියක් වන 57 හැවිරිදි එම ගුරුඋපදේශිකාව අත්අඩංගුවට ගෙන ඇත්තේ පෙරේදා (25) සවස් කාලයේදීය.
ආන්දෝලනයට තුඩු දුන් එම ප්‍රශ්න පත්‍රය පිට කළ කාර්යාල කාර්ය සහායකයා සිටි විභාග මධ්‍යස්ථානයේ ශාලාධිපතිනිය ලෙස කටයුතු කර ඇත්තේ ඇය බව අපරාධ පරීක්ෂණ දෙපාර්තමේන්තුව පවසයි.
ප්‍රශ්න පත්‍රයේ සඳහන් ප්‍රශ්න ඒ ආකාරයෙන්ම විභාගය පැවැත්වීමට නියමිත වේලාවට පෙර සමාජ මාධ්‍ය ඔස්සේ ප්‍රචාරය කිරීමට ඉඩ සැලැස්වීම හේතුවෙන් ඇයව මෙසේ අත්අඩංගුවට ගෙන තිබේ.
මෙම සැකකරිය අම්පාර මහේස්ත්‍රාත් අධිකරණයට ඉදිරිපත් කිරීමෙන් අනතුරුව ලබන 2 දා දක්වා රක්ෂිත බන්ධනාගාර ගත කර තිබේ.
