ලාදුරු රෝගීන්ට ප්‍රතිකාර කිරීම සඳහා විශේෂ වැඩපිළිවෙළක් මේ වසරේ සිට ක්‍රියාත්මක කරන බව ජාතික ලාදුරු රෝග මර්දන ව්‍යාපාරයේ අධ්‍යක්ෂ වෛද්‍ය ප්‍රසාද් රණවීර සිළුමිණට පැවසීය. ඒ යටතේ ප්‍රතිකාර මඟින් ඊට අදාළ විෂබීජ ව්‍යාප්තිය වළක්වාලීමට විශේෂිත වැඩපිළිවෙළක් මේ වන විටත් ක්‍රියාත්මක බව ඔහු පෙන්වා දුන්නේය.
පසුගිය වසරේ ලාදුරු රෝගීන් 1550ක් වාර්තා වී ඇති අතර ඉන් 173ක්ම අවුරුදු 14ට අඩු දරුවන් බව පැවසූ අධ්‍යක්ෂවරයා 50%ක් පමණ පිරිසක් හමුව ඇත්තේ කොළඹ, ගම්පහ සහ මඩකලපුව දිස්ත්‍රික්කවලින් බවද පැවසුවේය. කොළඹ දිස්ත්‍රික්කයෙන් 315 දෙනකු වාර්තා වී ඇති අතර ගම්පහින් 168ක්ද මඩකලපුවන් 151 සහ කළුතර දිස්ත්‍රික්කයෙන් 120ක් ලාදුරු වාර්තා වී තිබේ.
ලෝකයේ ළමා ලාදුරු ප්‍රතිශතය 4% – 6% වන අතර එය ශ්‍රී ලංකාවේ 10% – 11% ක් වන බව ද අධ්‍යක්ෂවරයා පැවසුවේය.
නාමලී ගමගේ