- පළමු අදියරේදී 15,000කට අවස්ථාව
- ලක්ෂ 10ක් දක්වා ණය ගන්න ඉඩකඩ
- මිලියනයකට වඩා වැඩි ණය විශේෂ අනුමැතීන්ට යටත්ව
මෙරට ජනතාවගේ නිවාස ප්‍රශ්නය විසඳීමේ අරමුණින් සමස්ත දිවයිනම ආවරණය වන පරිදි 12%ක සහන පොලියකට නිවාස ලබා දීමේ ‘සැමට නිවහන‘ වැඩ සටහන මේ වන විටත් ආරම්භ කර ඇති බව ජාතික නිවාස සංවර්ධන අධිකාරියේ සභාපති රජීව් සූරියආරච්චි සිළුමිණට කීය.
2019 වසරෙන් පසු නිවාස ණය පොලී අනුපාත ශීඝ්‍ර ලෙසින් ඉහළ ගිය අතර එම පොලී අනුපාත 20%ක්ද ඉක්මවා ගොස් තිබුණි. සැමට නිවහන වැඩ සටහනට අනුව ආරම්භයේදී 15,000කට නිවාස ණය ලබා දීමට නියමිතය.
‘සැමට නිවහන’ වැඩ සටහන යටතේ ආරම්භක පියවරක් ලෙස එක් මැතිවරණ කොට්ඨාසයක ඉල්ලුම්කරුවන් 100කට නිවාස අලුත්වැඩියාවට හෝ අලුතින් නිවසක් තැනීම වෙනුවෙන් රුපියල් ලක්ෂ 10ක් දක්වා ණය මුදල් ලබාගත හැකි බවද සභාපතිවරයා කීය.
එහෙත් රුපියල් ලක්ෂ10ට වැඩි ණය මුදලක් වුවද විශේෂ අනුමැතීන්ට යටත්ව ලබා ගත හැකි බවද ඔහු පෙන්වා දුන්නේය.
ණය ලබා දීමේ මූලික කටයුතු මේ වන විට අරඹා ඇතැයිද ඉදිරි මාස 2 ඇතුළත නිවාස ණය ප්‍රදානය කිරීමට හැකිවනු ඇතැයිද ඔහු තව දුරටත් පෙන්වා දුන්නේය.
ජාතික නිවාස සංවර්ධන අධිකාරියේ දිස්ත්‍රික් කාර්යාල හරහා නිවාස ණය ඉල්ලුම්කරුවන්ට ලබා දෙන හෙයින් කඩිනමින් ණය පහසුකම් ලබා දීමට හැකියාව ඇති බවද ඔහු පැවසුවේය.
නිවාස සංවර්ධනය වෙනුවෙන් නාගරික සංවර්ධන හා නිවාස අමාත්‍යාංශයට රුපියල් මිලියන 7,650ක් වෙන් කර තිබේ.
තාරක වික්‍රමසේකර