ඉතා ඉහළ අගයක පැවැති උද්ධමනය තනි ඉලක්කමකට ගෙන ඒම, විදේශීය නිල සංචිතය ඩොලර් බිලියන 3 ඉක්මවීම, බදු ආදායම අහිමි වීම වැළැක්වීමට අල්ලස් දුෂණ පනත ගෙන ඒම වැනි ආර්ථික ප්‍රතිසංස්කරණ තුළින් ශ්‍රී ලංකාව සාධනීය ලෙස ජයගනිමින් සිටින බව නිරීක්ෂණය වන්නේ යැයි ජාත්‍යන්තර මූල්‍ය අරමුදලේ (IMF) ශ්‍රී ලංකාවේ ජ්‍යෙෂ්ඨ දූත මණ්ඩල ප්‍රධානී පීටර් බ්‍රෘවර් (Peter Breuer) පැවසීය.
ඒ අනුව ශ්‍රී ලංකාවේ ආර්ථිකය යථා තත්ත්වයට පත්කිරීමේ අභියෝගය ජය ගනු ඇති බවද ඔහු විශ්වාසය පළ කළේය.
බදු පරිපාලනය ශක්තිමත් කිරීම, බදු නිදහස් කිරීම් ඉවත් කිරීම ඇතුළු ප්‍රතිසංස්කරණ වඩාත් තිරසර කිරීමට ශ්‍රී ලංකාව දරන ප්‍රයත්නයන්ට සහාය වීම සඳහා ණයහිමියන් අතර විශ්වාසය තවදුරටත් ගොඩනැංවීම සඳහා තිරසර බදු ප්‍රතිපත්ති ක්‍රියාමාර්ග අවශ්‍ය වන බවත් බැංකු පනතට කඩිනමින් සංශෝධන ගෙනඑමින් බැංකු පද්ධතිය ශක්තිමත් කළ යුතු බවත් හෙතෙම සඳහන් කළේය. එහිදී මූල්‍ය කළමනාකරණය සහ යහපාලනයක් සහිතව ඉදිරියට යෑමේ සහ ඩිජිටල්කරණය තුළින් මූල්‍ය විනිවිද භාවය පවත්වාගෙන යෑම අත්‍යවශ්‍ය බවද ඔහු වැඩිදුරටත් පැවසීය.
ශ්‍රී ලංකාවේ ජ්‍යෙෂ්ඨ දූත මණ්ඩල ප්‍රධානී පීටර් බ්‍රෘවර් (Peter Breuer) ඒ බව පැවසුවේ ශ්‍රී ලංකාව තුළ සිදු කරන ලද ආර්ථික ප්‍රතිසංස්කරණවල ප්‍රගතිය අධ්‍යයනය කිරීමේ නිරීක්ෂණ චාරිකාව අවසන් කරමින් ඉකුත් 19 වැනි සිකුරාදා කොළඹ මහබැංකු මූලස්ථානයේ පැවති විශේෂ මාධ්‍ය හමුවේදී අදහස් දක්වමිනි.
IMF වැඩසටහනේ දෙවැනි සමාලෝචනයට පෙර ණය ප්‍රතිව්‍යුහගත කිරීම සම්බන්ධයෙන් ශ්‍රී ලංකාව එකඟතාවන්ට එළැඹෙනු ඇතැයි විශ්වාස කරන බව පැවසූ පීටර් බ්‍රෘවර්, ණය ප්‍රතිව්‍යුහගතකරණ ක්‍රියාවලිය සාර්ථක කර ගැනීමට නිල ණය හිමියන් සමඟ ඇතිකරගත් ප්‍රතිපත්තිමය එකඟතාව වැදගත් සංධිස්ථානයක් බව ද පැවසීය. ඒ අනුව නිල ණය හිමියන් සමඟ අවසන් ගිවිසුම් කඩිනමින් අවසන් කිරීම සහ බාහිර පෞද්ගලික ණය හිමියන් සමඟ විසඳා ගැනීම ඉතා වැදගත් බව ද හෙතෙම අවධාරණය කළේය.
ප්‍රගතිශීලී දේපළ බද්දක් හඳුන්වා දීම පිළිබඳ ප්‍රසාදය පළ කළ ජ්‍යෙෂ්ඨ IMF දූත මණ්ඩල ප්‍රධානියා පැවසුවේ එය මූල්‍ය අංශයේ ස්ථායීතාව ආරක්ෂා කිරීමට සහ ආර්ථික වර්ධනයට සහාය දැක්වීමේ හැකියාව ශක්තිමත් කිරීමට ඉවහල් වන බවයි.
ජාත්‍යන්තර මූල්‍ය අරමුදලේ වැඩසටහනේ සමාලෝචන මාස 6කට වරක් සිදුවන අතර පළමු සමාලෝචනය ඉකුත් දෙසැම්බර් මස අවසන් වූ බවත් දෙවැනි සමාලෝචනය සිදු කරන දින වකවානු සම්බන්ධයෙන් මෙතෙක් තීරණයක් ගෙන නොමැති බවත් ජාත්‍යන්තර මූල්‍ය අරමුදලේ ශ්‍රී ලංකා දූත මණ්ඩල ප්‍රධානී පීටර් බ්‍රෘවර් පැවසීය. ඒ අනුව ශ්‍රී ලංකාවේ ආර්ථික ප්‍රතිසංස්කරණ ක්‍රියාවලියට ඉදිරි මාස කිහිපය වැදගත් වනු ඇති බව ද හෙතෙම පැවසීය.
2023 වසරේ තුන්වැනි කාර්තුවේදී සියයට 1.6 ක ධනාත්මක වර්ධනයක් වාර්තා කර ඇති අතර අත්‍යවශ්‍ය ද්‍රව්‍ය හිඟය අඩු වී උද්ධමනය පාලනය වී ඇති බවත් ජනතාවගේ ජීවන තත්ත්වය තවදුරටත් වැඩිදියුණු කිරීමේ අභියෝගය රජය හමුවේ පවතින බවත් එම අභියෝග ජයගැනීම සඳහා ශ්‍රී ලංකාවට අඛණ්ඩව සහාය දෙන බව ද ජ්‍යෙෂ්ඨ IMF දූත මණ්ඩල ප්‍රධානියා වැඩිදුරටත් පැවසීය. IMF හි ශ්‍රී ලංකාවේ නේවාසික නියෝජිත සර්වත් ජහාන් ද මෙම මාධ්‍ය හමුවට සහභාගි වූවාය.
සුරේකා නිල්මිණි ඉලංකෝන්