හුදු ද්‍රව්‍යමය සංවර්ධනයට සහ සමෘද්ධියට ඔබ්බෙන් වූ මානව යථාර්ථයන් සහ අපේක්ෂා පිළිබඳ වඩා උතුම් අවබෝධයක් කරා අප රැගෙන යන නත්තල, පමණ ඉක්මවා වියදම් කිරීමෙන් තොර සරල සැමරුමක් බවට පත්කර ගන්නා ලෙස ශ්‍රී ලංකා රදගුරු සමුළුව සැදැහැවතුන්ගෙන් ඉල්ලා සිටී.
ශ්‍රී ලංකා රදගුරු සමුළුවේ සභාපති අතිඋතුම් හැරල්ඩ් ඇන්තනි රදගුරු හිමිපාණන්ගේ සහ මහ ලේකම් අතිඋතුම් ජේ.ඩී ඇන්තනි රදගුරු හිමිපාණන්ගේ අත්සනින් යුතුව නිකුත් කළ නත්තල් පණිවිඩයේ වැඩිදුරටත් සඳහන් වන්නේ දේව පුත්‍රයාණන් වන ජේසුස් වහන්සේ මිනිස් බව ගැනීම සිහි කෙරෙන නත්තල මිනිසාගේ ගරුත්වය පිළිබඳ ගැඹුරු අවබෝධයක් කරා රැගෙන යන බවයි.
එබැවින් මූලික මිනිස් අයිතිවාසිකම් සහ නිදහසට ගරු කිරීමට අදාළ සත්‍යයන් සමාජය තුළ සහතික කිරීමට දායක වීම සියලු දෙනාගේ වගකීම බව ද ශ්‍රී ලංකා රදගුරු සමුළුව වැඩිදුරටත් සිය නත්තල් පණිවිඩය මඟින් අවධාරණය කර ඇත.
සුරේකා නිල්මිණි ඉලංකෝන්