වයස අවුරුදු 60 සම්පූර්ණ වීමෙන් පසු විශ්‍රාම ගැන්වීමට රජය තීරණය කර තිබූ රාජ්‍ය සේවයේ නියුතුව සිටින විශේෂඥ වෛද්‍යවරුන්ගේ විශ්‍රාම වයස් සීමාව වයස අවුරුදු 63 දක්වා දීර්ඝ කරන ලෙස අභියාචනාධිකරණය ඉකුත් 15 වැනි සිකුරාදා නියෝග කළේය.
අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න සහ ඒ. මරික්කාර්ගෙන් සමන්විත විනිසුරු මඬුල්ල විසින් එම තීන්දුව ලබා දී තිබුණේ වයස අවුරුදු 60දී විශ්‍රාම ගැන්වීමට රජය ගෙන තිබූ තීන්දුව අභියෝගයට ලක් කරමින් වෛද්‍යවරු පිරිසක් විසින් ගොනුකර තිබූ රිට් පෙත්සම සලකා බැලීමෙනි.
වයස අවුරුදු 60දී විශ්‍රාම යෑමේ තීන්දුව ක්‍රියාත්මක වූයේ නම් 2,500කට අධික රජයේ සේවයේ නියුතු විශේෂඥ වෛද්‍යවරුන් අතුරින් 300කට අධික විශේෂඥ වෛද්‍යවරු සංඛ්‍යාවක් ලබන දෙසැම්බර් 31 වැනිදා වන විට විශ්‍රාම යාමට නියමිතව සිටි බවත් විශ්‍රාම යාමේ වයස් සීමාව වයස අවුරුදු 63 දක්වා දීර්ඝ කිරීම නිසා එම සංඛ්‍යාව 75කට පමණ අඩු වී ඇතැයි සෞඛ්‍ය අමාත්‍යාංශ උසස් නිලධාරියෙක් සිළුමිණට හෙළි කළේය.
අමිල මලවිසූරිය