පසුගිය ජනවාරි මාසයේ සිට ඔක්තෝබර් 31 වැනිදා දක්වා පාරිභෝගික අධිකාරිය විසින් රට පුරා සිදු කරන ලද වැටලීම් 20,365 කින්, රුපියල් කෝටි විසිදෙකක් (22,32,61,949) දඩ මුදල් ලෙස අයකරගෙන තිබේ.
මෙයට අමතරව ඉහත කී වැටලීම් 20,365 අතරින් නඩු පැවරීම් 19,019ක් සිදු කර ඇති අතර, 2023 නොවැම්බර් මස 03 වැනිදා සිට 16 වැනිදා දක්වා ක්‍රියාත්මක වූ සීනි සම්බන්ධ ගැසට් පත්‍රිකාව මඟින් සීනි සම්බන්ධ වැටලීම් 384ක් සිදු කර තිබේ. එසේම ජනවාරි මස 20 වැනි දා සිට ජූලි මාසය දක්වා ක්‍රියාත්මක වූ බිත්තර පාලන මිල සම්බන්ධ ගැසට් පත්‍රිකාවට අදාළව ද වැටලීම් 1,569ක් සිදු කර ඇති අතර, එම ගැසට් පත්‍රිකාව ජූලි මාසයේ සිට නතර වී තිබේ. ඒ අනුව, ශ්‍රී ලංකාවේ දැනට ආහාර සඳහා පාලන මිලක් ක්‍රියාත්මක වන්නේ, හාල් සහ සීනි වෙනුවෙන් පමණකි. මෙම වැටලීම්වලින් ලබන දඩ ආදායමෙන් තුනෙන් එකක් පාරිභෝගික අධිකාරී අරමුදලට ද තුනෙන් දෙකක් පළාත් සභාවට ද බැර වේ.
ඉනෝකා පෙරේරා