ඔස්ට්‍රේලියානු රජය හා අධ්‍යාපන අමාත්‍යාංශය එක්ව සංවිධානය කරන ලද Zero Chance (ZR Chance) පාසල් චිත්‍ර හා රචනා තරගාවලියේ ජයග්‍රාහකයන් ඇගැයීමේ උත්සවය පසුගියදා ශ්‍රී ලංකා පදනම් ආයතනයේ දී සාර්ථකව පවත්වන ලදී.
ඔස්ට්‍රේලියාවට නීති විරෝධී ලෙස සිදුවන මුහුදු සංක්‍රමණය පිළිබඳව දැනුම්වත් කිරීම සහ නීති විරෝධී ලෙස බෝට්ටු මඟින් ඔස්ට්‍රේලියාවට පැමිණිමට උත්සාහ කිරීමේ නිෂ්ඵලත්වය පැහැදිලි කිරීම මෙම තරගාවලිය සංවිධානය කිරීමේ මූලික අරමුණ විය.
‘’ඔස්ට්‍රේලියාවට බෝට්ටුවෙන් නීති විරෝධීව සංක්‍රමණය වීමට උත්සාහ කිරීම ඉතාමත් අනුවණ ක්‍රියාවකි” යන තේමාව මුල් කරගනිමින් පැවැති මෙම තරගාවලිය සඳහා දිස්ත්‍රික්ක 15ක පාසැල් 41ක් නියෝජනය කරමින් ශිෂ්‍ය ශිෂ්‍යාවන් 1800ක පමණ පිරිසක් සහභාගී විය. අධ්‍යාපන අමාත්‍යාංශය විසින් නම් කරන ලද 14 ෙනෙකුගෙන් සමන්විත දක්ෂ විනිසුරු මණ්ඩලයක් විසින් මෙහි ඇගැයීම් කටයුතු සිදුකරන ලදී.
