නිරිතදිග මෝසම සක්‍රිය වීම හේතුවෙන් දිවයිනේ නිරිතදිග කොටසේ මේ දිනවල පවතින වැසි තත්ත්වය තවදුරටත් පැවතිය හැකි බව කාලගුණ විද්‍යා දෙපාර්තමේන්තුවේ අධ්‍යක්ෂ ජනරාල් අතුල කරුණානායක සිළුමිණට පැවසීය.
ඒ අනුව බස්නාහිර, සබරගමුව, දකුණු සහ වයඹ පළාත්වලත් මහනුවර සහ නුවරඑළිය දිස්ත්‍රික්කවලත් විටින් විට
වැසි හෝ ගිගුරුම් සහිත වැසි ඇතිවිය හැකි අතර, බස්නාහිර, සබරගමුව සහ දකුණු පළාත්වල ඇතැම් ස්ථාන වලට මි.මී. 100ට වැඩි තද වැසි ඇතිවිය හැකි බව හෙළි කළ හෙතෙම ඉදිරියේදී අන්තර්මෝසම සක්‍රිය වන බැවින් ඉදිරි දින කිහිපයේදී අපරභාගයේ හෝ සන්ධ්‍යා කාලයේදී වැසි ඇතිවීමේ වැඩි නැඹුරුවක් තිබුණත් උදෑසන කාලයේදී ද වැසි ස්වල්පයක් අපේක්ෂා කළ හැකි බව සඳහන් කළේය.
ඉකුත් සති කිහිපය තුළ දිවයිනේ නිරිත දිග ප්‍රදේශවල අඛණ්ඩව වර්ෂාව පැවති හෙයින් පස බුරුල් වීම හේතුවෙන් කඳු, ගස් සහ පස් කඩාවැටීම්වලින් සිදුවන අනතුරුවලින් ආරක්ෂා වන වන ලෙස ද කාලගුණ විද්‍යා දෙපාර්තමේන්තුවේ අධ්‍යක්ෂ ජනරාල් අතුල කරුණානායක වැඩිදුරටත් සිළුමිණට කියා සිටියේය.
සුරේකා නිල්මිණි