නවසීලන්ත නියෝජ්‍ය අග්‍රාමාත්‍ය සහ විදේශ කටයුතු අමාත්‍ය වින්ස්ටන් පීටර්ස් මහතා 2025 මැයි 24 වැනිදා සිට 28 වැනිදා දක්වා ශ්‍රී ලංකාවේ නිල චාරිකාවක නිරත වේ.
ශ්‍රී ලංකා විදේශ අමාත්‍යාංශයට අනුව, මෙම චාරිකාව අතරතුර, නියෝජ්‍ය අග්‍රාමාත්‍ය වින්ස්ටන් පීටර්ස් මහතා ජනාධිපති අනුර කුමාර දිසානායක මහතා සහ අගමැති ආචාර්ය හරිනි අමරසූරිය හමුවනු ඇතැයි අපේක්ෂා කෙරේ.
ඔහු ශ්‍රී ලංකාවේ විදේශ කටයුතු අමාත්‍ය විජිත හේරත් මහතා සමඟ ද්විපාර්ශ්වික සාකච්ඡා පවත්වනු ඇති අතර, එම සාකච්ඡාවේදී වෙළෙඳ හා ආයෝජන, කෘෂිකර්මාන්තය, අධ්‍යාපනය, සම්බන්ධතාවය, සංචාරක සහ ක්‍රීඩා යන ක්ෂේත්‍රවල සහයෝගීතාව වැඩිදියුණු කිරීම කෙරෙහි අවධානය යොමුකෙරේ.
මෙම සංචාරය අතරතුර නියෝජ්‍ය අග්‍රාමාත්‍ය වින්ස්ටන් පීටර්ස් මහතා පෞද්ගලික අංශයේ සහ ජනමාධ්‍ය කටයුතු කිහිපයකට ද සහභාගී වනු ඇත.
ඔහු සමඟ නවසීලන්ත විදේශ කටයුතු සහ වෙළෙඳ අමාත්‍යාංශයේ ජ්‍යෙෂ්ඨ නිලධාරීන් තිදෙනකු ද සංචාරයට සහභාගී වේ.
නවසීලන්ත නියෝජ්‍ය අග්‍රාමාත්‍යවරයා ශ්‍රී ලංකාවට අමතරව ඔහුගේ මෙම චරිකාවේ දී නේපාලය, ඉන්දියාව සහ ඕස්ට්‍රේලියාව යන රටවලට යන බව නවසීලන්ත රජය නිවේදනය කර තිබේ.
