පශ්චිම යාමය
එස් සමරසේකරයන්ගේ පළමු කාව්‍ය සංග්‍රහය ‘පශ්චිම යාමය’ නම් වේ. ඔහු මේ කෘතියේදී රසිකයන් අමුතු මඟක ගෙන යන්නට තැත් කරයි. ඒ ලෝකය ගැන මේ සමාජය ගැන මෙන්ම සමාජයේ වෙසෙන්නන්, ඔවුන්ගේ ක්‍රියාකාරකම් ගැන අමුතුවෙන් හිතන්නට පොලඹවයි. ඔහු කියන්න තැත් කරන්නේ මේ මිනිස් සමාජය පිළිබඳවය. ඔවුන්ගේ වටපිටාව, සමාජය, මිනිසුන්ගේ මානව ගුණ ධර්මයන්ගේ පරිහානිය, ආදරය ප්‍රේමය පිළිබඳවත් කවියාට කතා කරන්නට ඕනෑ කර තිබේ.
‘ඇහැරෙන විටදි නින්දෙන් මම හැමදාම
කැට කැබිලිතිව බිදුණා මං දුටු හීන
සොයුරනි එකට අමුණන්නද මම කෝම
සිහිනයෙ හැටි එයය නින්දෙන් දුටුවාම…’
මෙසේ ලියන්න පටන් ගන්නා කවියා ඈත ගමක දුකින් පෙළෙන මවක ගැන ලියයි. ඒ ඇඟලුම් සේවයේ යෙදෙන සිය වැඩිමල් දියණියට ලිපියක් ලියන ලෙස ඇය කියන්නේ නිවෙසේ සිටින බාල දියණියටයි. ඒ ලියන්නේද සිය පවුල විඳින දුක් ගැහැට ගැනය. සිය සැමියාගේ වකුගඩු රෝගය ගැනද එහි සදහන් වේ. ලියුම ඇරඹෙන්නේ මෙලෙසිනි:
‘සියල් සිරින් සැරදේවා…
යනෙන ගමන් සෙත් දේවා…
ඉහළ දෙණියෙ කුඹුරු යාය
පුරන් වුණා මේ පාරත්
කුලී වැඩක් සොයා ගන්න
විදියක් නැහැ අප්පච්චිට…’
යනුවෙන් ඇරඹෙන ලිපියේ කියන්නේ තම පවුලේ නැතිබැරිකම්, රෝග පීඩා ආදිය ගැනය. ඒ අතර නැඟණිය ප්‍රේමයෙන් වෙළෙන්නීය. මේ සියලු කතා අවසානයේ නගරයේ කම්හලේ සේවය කරන අක්කා අවුරුද්දට ගමට එන්නීය. එය ගෙදර කාටත් ප්‍රීතිය දනවන්නකි.
‘දුක් කඳුළ පරදවා
සතුට ගෙන ඇවිල්ලා
ඉතිං දැන් දුක නොමැත
වසන්තය ඇවිල්ලා…’
එහෙත් ඔවුන්ගේ සතුටට වැඩි ආයුෂ නැත. ඒ, ගල්කොරියේ වැඩ කළ අම්මාගේ අභාවය හේතුවෙනි.
‘ගල් කොරියේ ගල් කඩලා අප රැකගත් අම්මා
වෙල් එළියේ පලා නෙළා සරි කොට දුන් අම්මා
පිල් කෙටියේ වාඩි වෙලා හිස පීරූයෙම්මා
මල් නැළියේ සතපවලා යළි එන්නෑ අම්මා…’
මේ ආදි වශයෙන් කවියා කියන්නනේ පවුලක සිදු වූ ඛේදවාචකයකි. එනමුදු ඒ යටින් දිවෙන වෙනත් කතාවක් ‘පශ්චිම යාමය’ පුරා අප ඇස ගැසේ. මේ ද මේ දකින්නට ඇති සමාජ ක්‍රමයයි; සමාජ ව්‍යසනයයි. මිනිස් වටිනාකම්, ගුණධර්ම ගිලිහුණු මේ සමාජය තුළ ඇති හිස් බව කවියා තමන්ට හැකි උපරිම අයුරින් සමාජයට ඒත්තු ගන්වන්නට සැරසේ.
කවියා මේ පවතින සමාජ ක්‍රමය, මිනිසුන්ගේ සිතුම් පැතුම් ගැන මෙන්ම සමාජ ක්‍රියාකාරිත්වයන් ගැනද සියුම්ව ප්‍රශ්න කරයි. පවත්නා ලෝකය යහපත් කරගැනීමට ඔහු වෙහෙසවන හැඩත් මේ කෘතිය පුරා දකින්නට ඇත. කෙසේ වෙතත් ඔහුගේ කවිබස තව තවත් සුමට වන්නේ නම් ඔහුගේ නිර්මාණ තවත් හැඩ වනු ඇත.
– ඉසවි
අතර මඟක දී
කර්තෘ – ඩබ්ලිව්. ඩී. මැටිල්ඩා අධිකාරම්
කර්තෘ ප්‍රකාශනයකි.
පාසල් වියේ සිටම ලේඛන කලාවට ඇල්ම දැක්වූ කතුවරියගේ මුල්ම කෙටිකතාව ‘මළ බෙර හඬ’ මුලින්ම පළ වන්නේ ඥානාර්ථ ප්‍රදීපය සඟරාවේය. එතැන් පටන් කෙටිකතා, කවි රචනා ආදිය විටින් විට එහි පළ වන්නට විය. සමාජයේ විවිධ පැතිකඩයන් ඉස්මතු වන අයුරින් කතා ලියන්නට පෙලඹුණ ඇයගේ මුල්ම කෙටිකතා සංග්‍රහය වන ‘අතරමඟකදී’ පසුගියදා නිකුත් විය. මැටිල්ඩා විසින් ලියන ලද කෙටිකතා 25ක් මේ කෘතියට ඇතුළත්ය.
ජීවිතය කවියක්
කර්තෘ: ඩී.ඒ.ටී.බී. දේවසිංහ
කර්තෘ ප්‍රකාශනයකි.
විශ්‍රාමික විදුහල්පතිවරයකු වන ඩී.ඒ.ටී.බී. දේවසිංහ විසින් රචනා කරන ලද ‘ජීවිතය කවියක්’ නවකතාව ගැමි සමාජය පසුබිම් කරගනිමින් දුක දිනා ජය ගත්තකුගේ කතාවක් ලෙස දැක්විය හැකිය. ජීවිතයේ විවිධ දුෂ්කරතාවන්ට මුහුණ දෙමින්, කටුක දිවියක් ගත කරමින්, සමාජයේ විවිධ මට්ටම් ගැන කතා කරමින් උත්තම පුරුෂ දෘෂ්ටිකෝණයකින් ලියවුණු කෘතියක් ලෙස ‘ජීවිත කවියක්’ කෘතිය හඳුන්වා දිය හැකිය.
දකින්න වෙනස්ව ජීවිතය
පරිවර්තනය: නිරංජන් චාමින්ද කරුණාතිලක
ඇම්.ඩී. ගුණසේන ප්‍රකාශනයකි.
ලොව ප්‍රකට විශේෂඥයකු මෙන්ම ග්‍රන්ථ කතුවරයකුද වන ජේම්ස් ක්ලියර් විසින් ලියන ලද Atomic Habits කෘතිය සිංහල භාෂාවට පරිවර්තනය කරනු ලබන්නේ නිරංජන් චාමින්ද කරුණාතිලක විසිනි. ‘Atomic Habits’ ලොව පුරා මිලියන ගණනකගේ ජීවිත සාර්ථක කරගැනීමට ඉවහල් වූ කෘතියකි.
