වෙසක් අසිරිය
වෙසක් පෝය දා සිදුහත් කුමරු ඉපදුණා
වෙස් පෝය දා බෝසත් කුමරු බුදු වුණා
වෙසක් පෝය දා හිමි පිරිනිවන් පත් වුණා
වෙසක් පෝයදා බුදු තෙමඟුලම සිදු වුණා
එල්. සසඳි දමිදුලා පෙරේරා
4 ශ්‍රේණිය ඒ
ප්‍රජාපති බාලිකා විද්‍යාලය
හොරණ
අපට සතුට ගෙනෙන වෙසක්
වෙසක් පොහොය අපි හැමෝටම වැදගත් දවසක්. අපි එදාට මල්, පහන්, සුවඳ දුමින් බුදු රජාණන් වහන්සේ පුදනවා. එදාට අපි සිල් සමාදන් වෙනවා; රෑට තොරණ බලන්න යනවා.
වෙසක් පොහොය වැදගත් වන්නේ සිදුහත් කුමරුගේ ඉපදීම, බුදු වීම, පිරිනිවන් පෑම මුල් කරගෙනයි. බෞද්ධයන් වෙසක් පෝය දවසදී පින්කම් ගොඩක් කරනවා. සිල් ඇත්තන්ට වගේම නැති බැරි අයට දන් දෙනවා; අසරණ අයට උදවු උපකාර කරනවා. ඒ නිසා අපි වෙසක් දවසට හරිම කැමතියි.
ජී.එම්. ඉෂිණි නෙත්සරා ගුණතිලක
3 ශ්‍රේණිය, ශ්‍රී ගෝතමි දහම් පාසල,
කොස්සින්න.
තෙමඟුල සමරමු
වෙසක් පෝය දා
සිදුහත් කුමරු ඉපදුණේ
තුන් ලොවටම සාධු සාධු
සෙතක් සැලසුණේ…
සසර දුකට හේතුව සොයලා
ගිහි ගෙදරින් අබිනික්මන් කරලා
උතුම් වෙසක් පුන් පෝදා
සියලු කෙලෙස් නසා
සම්මා සම්බුදු බව ලැබුවේ…
සතළිස්පස් වසරක් තිස්සේ
තුන් ලොවටම සදහම් දෙසුවේ
සසර දුකින් සත එතෙර කළේ
පිරිනිවනින් සැනසී නිවුණේ
උතුම් වෙසක් පුන් පෝ දිනයේ….
හෙෂාරා ගගනෝදනී බාලසූරිය
8 ශ්‍රේණිය, උසස් බාලිකා විදුහල
මහනුවර
සම්බුදු තෙමඟුල
සිදුහත් කුමරුන්ගේ උපත, බුද්ධත්වය ලැබීම වගේම මහා පරිනිර්වාණය යන සම්බුදු තෙමඟුල සිහි කරමින් වෙසක් උත්සවය සමරනවා. සුදුවතින් සැරසුණු සිල්වතුන්ගෙන් පන්සල පිරී ඉතිරී යනවා. වෙසක් දවසට ලස්සන කූඩු හදලා මුළු ගමම සරසනවා. ගමේ හැමෝම එකතු වෙලා දන්සල් දෙනවා. පවුලේ ඔක්කොම වෙසක් බලන්නත් යනවා.
ලසිරු ෂෙහංස ගුණරත්න
4 ශ්‍රේණිය, ලුම්බිණි ආදර්ශ ප්‍රාථමික විද්‍යාලය, හොරොව්පොතාන.
මමත් සිල් සමාදන් වෙමි
වෙසක් පොහොයට ආගමික වැඩසටහන් රට පුරා පැවැත්වෙනවා. සැදැහැවතුන් සිල් සමාදන් වෙනවා. වෙසක් පොහොයට අපේ ගෙදරත් වෙසක් කුඩු පත්තු කරනවා. අම්මාත් තාත්තාත් එක්ක පන්සල් යන මම ඉන් පසු වෙසක් තොරණ, වෙසක් කූඩු බලන්න යන්නේ ඉතාම ආසාවෙන්.
අපේ පාසලේ වෙසක් උත්සවය වෙනුවෙන් ධර්ම දේශනා, සිල් සමාදම් වීම වගේම වෙසක් කූඩු තරගත් පැවැත්වෙනවා. මමත් මෙවර සිල් සමාදන් වෙමි.
හෙසත් තෙදස්වින්
4 ශ්‍රේණිය ඩී, අශෝක විද්‍යාලය, කොළඹ.
සිද්ධාර්ථ කුමාරෝත්පත්තිය
සිදුහත් කුමරු මෙලොව උපත ලැබුවේ වෙසක් පොහෝ දිනකය. බෝධිසත්ත්වයෝ උපතට පෙර තුසිත දෙව්ලොව සිට පළමු කොට පස්මහ බැලුම් බැලූහ. තුසිත ලොවින් චුත වී ඇසළ පුර පසළොස්වක පොහෝ දින මහාමායා මවුකුස පිළිසිඳ ගත්හ.
මායා දේවිය එදින මෙවන් වූ සිහිනයක් දුටුවාය. චාතුර්මහාරාජිකා දෙවිවරුන් පැමිණ ඇය නහවා, දිව්‍ය වස්ත්‍රයෙන් සරසා, සුවඳ විලවුන් ගල්වා, දිව්‍ය පුෂ්පයෙන් සරසා ඇඳක සතපන ලදි. හොඬින් නෙළුම් මලක් රැගත් ඇත් පැටියෙක් මායා දේවියගේ දකුණු ඇලයෙන් කුසට ඇතුළු විය. ඒ ඇය දුටු පින්බර සිහිනයයි.
උත්පත්තියෙන් පසුව බෝසතාණන් වහන්සේ ඍජුව සිටගෙන, උතුරු දෙසට පියවර හතක් තැබුහ. ඉන් පසු උදාන වාක්‍ය කියමින් මෙසේ සිංහනාද පැවැත්වූහ:
අග්ගෝ හමස්මි ලෝකස්ස
ජෙට්ඨෝ හමස්මි ලෝකස්ස
සෙට්ටෝ හමස්මි ලෝකස්ස
අයන්මති මා ජාති නත්ථිදානි පුනබ්භවෝ
මම ලෙවට අග්‍ර වෙමි
මම ලොවට ජ්‍යෙෂ්ඨ වෙමි
මම ලොවට ශ්‍රේෂ්ඨ වෙමි
මේ මාගේ අවසන් උපතය, නැවත උපතක් නැත.
බෝගමුවේ නන්දසාර හිමි
4 ශ්‍රේණිය, ශ්‍රී සිද්ධාර්ථ මහ පිරිවෙන, දොලුව
