වීදි කුමරිය
නන් විසිතුරු වළලු මාල
වීදි දිගේ ඇවිදින විට
කර මත්තේ රැඳි දියණිය
ඉල්ලන සේ නෙත් නළවන
පෙර සසරේ දියණිය අප
අපමණ පව් කරලා ඇත
ඒ පව්මල විඳගන්නට
නුඹත් කුසේ ඉපදී ඇත
මා ගැන නම් දුකක් නැතිය
දුක නම් නුඹ ගැන දෝණිය
එනමුත් මා ඇඟ රුහිරය
නුඹ වෙනුවෙන් කැප කර ඇත
නුඹ නිහඬයි මා හඬවයි
කළ පාපය වන්නට ඇත
කොපමණ කරදර ආවත්
දාල යන්න නැත දුව සිත
හේ.ක. චන්ද්‍රසිරි
දූ පුතුනි
රට දැය සමය රැක් ගන්නට දිරි ගන්න
වීර දූ පුතුන් වන ඔබ සිහිවෙන්න
දරුවන් ඔබේ යහ මඟටම ගෙන යන්න
ගුරු උපහාරයෙන් සැමටම පිං අත් වෙන්න
බැනර් ගසා සරසා වළ වටේටම
අප මිය ගිය විටදී කරනා ඇගයීම
අබ ඇටයක් තරම්වත් නෑ වටිනාකම
දිව ඔසුවක්ය ඔබ කළ ගුරු ඇගයීම
ඩබ්ලිව්. ආරියවතී මොටාආරච්චි
ඉතින් මම මක් කරන්නද…
මාස දහයකට පෙරාතුව
අල්මාරියේ ඉන්දවා තිබ්බ
අලුත් කපුකි කොට්ට දෙක
නුඹේ හිසටම හදාපු…
නේන බව දත් නිසාම
අතට අරගෙන බැලීමි
රතුපාට සුදු ඩොට් රෙද්ද මත
පුංචි කාවුන් මැවූ රටා…
තරහක් දැනුණෙ නැතිවාට
කඳුළක් වැටුණා නොදැනීම
නුඹෙ ප්‍රේමය කාවො කාලා
ඉතින් මම මක් කරන්නද…
පවිත්‍රා සෙව්වන්දි උඩුවරආරච්චි
සුලෝහිත සෙව්වන්දිය!
අහා! මා පෙම්බරිය
ජූනියේ පිපි සුරන් සෙව්වන්දියක් සේය
අහා! මා පෙම්බරිය
සුමධුරව වැයෙන ඉමිහිරිම තනුවක් සේය
මගේ අතිසොඳුරු අකලංක යුවතියේ
පෙම් බඳිමි ම හදවත ගැඹුරින්ම
සයුරු රළ පෙළ සිඳී යන තෙක්ම
දයාබරියේ, පෙම් කරමි මම ඔබට
සයුරු රළ පෙළ නැඟී, දිය සිඳෙන තුරාවට
හිරු රැසින් කඳු ශිඛර උණුව යන තුරාවට
නොවෙනස්ව එක සිතින් පෙම් කරමි මම ඔබට
සෑම දිනම නොවෙනස්ව දයාවිය
සුබ පතමි, මගෙ එකම ප්‍රියාවිය
සුබ පතමි, එකම එක මොහොතකට
දස දහස් ගණන් සැතපුම් ගෙවා
යළිත් මම එන්නෙමි ඔබ වෙතට
රොබට් බර්න්ස් (Robert Burns) ‘A Red Red Rose’ නම් පද්‍යයේ පරිවර්තනයකි.
මල්කාන්ති ගුණතුංග
රැයේ අසිරිය
ඉමක් නොපෙනෙන විසල් අහස සේ
ඇදෙන සුසිනිඳු සුදු වලා
නේක පැහැයෙන් දිලෙන තරු කැට
මවයි විසිතුරු රූ රටා
පුර පෝදා රෑට අහසේ
රන් තැටිය සේ පායලා
ගලා යන සඳ එළිය සීතල
වැව් දියට බැස පීනලා
මවයි අසිරිය සොඳුරු ගම්දොර
සිසිල අතුරා සිත් පුරා
ගෙමිදුලේ පිපි සේපාලිකා
සුවඳ මිහි කත සරසලා
සුසුදු ඇට්ටේරියා පලසින්
පුදාලා දෙවි දේවතා
පිරිමදී හද විඩාවෙන් බර
යසෝ තැවුල් නිමවා දමා
අශානී රාජකරුණා
පිවිතුරු ආදරය
මහද විල්තෙරේ
සුපිපි රතු නෙලුම
සැලෙන දිලෙන
මද මාරුතෙ
උදාගිරි අදුර
දුරු කරලා
වෑහෙන සුගන්ධය
නික්මෙන අරලියා මලකින්…
උමතුවී බඹර සිත්
රඟයි විල්තෙරේ
ඉව අල්ලමින්
තුඩින් තුඩ
හද කකියවන
බඹර නාදෙ
ඔවුනොවුන් සිප වැලද
යෙදෙන සිත
සතුටිනි…
රමණයේ අභිමන්
ගොහොර මඩකදීවුව
මතුවිය හැකිය පිටතට
භාවනාවක් වූ
පිවිතුරු ආදරය
පිටුපා බොළද
හැඟුම් දෙස
තවත් ටික දුරකට
විඳින්න ජීවිතය…
රත්නපාල ගමගේ
ශ්‍රී ලංකා හයිකු කවි
ශ්‍රී ලංකා හයිකු ජයග්‍රාහකයෝ
ප්‍රථම ස්ථානය
පඹයාගේ සෙවණැල්ලේ
ගිමන් නිවන
වී වීකුරුල්ලෝ
කුමාරි හඳපාන්ගොඩ
බිඳුණු තෙල් බෝතලය
බස්තමෙන්
තල්ලු කරන අම්මා
රංජනී නවරත්න
අවුරුදු දා … රෑ
නිලාකූරු දල්වන තැන
ඇස් නොපෙනෙන
මල්ලිත්
සුසීමා අලහකෝන්
ශ්‍රී ලංකා හයිකු කවි සංගමය විසින් පසුගිය 31 වැනිදා නිකුත් කරන ලද දීපව්‍යාප්ත හයිකු කවි
තරගයේ ජයග්‍රාහකයෝ
දෙවැනි ස්ථානය
මිතුරාගේ මළගමට
හැරමිටියෙන්
ගාටන සීයා
සරත් සැඳැව
මනෝරි උත්පලා ගමගේ
රළ සමඟ
ඉහළ පහළ යන
කකුළුවෝ
රසිකා හේවාවිතාරණ
කටු අත්තක එල්ලෙන
සමනල
පියාපත්
නදීෂා සඳමාලි පතිරාජ
තෙවැනි ස්ථානය
වවුලෝ ඇයි එල්ලිලාම
හිටගනිං දැංවත්
එක තැනක කකුල් දෙකෙන්
(සෙන්රියු)
සුගත් උයනගේ
මියගිය සිත්තරාගේ
සායම් වියැළුණු
පින්සල් තුඩ
දමයන්ති අඹේපිටිය
ආගන්තුකයා
සමරු ඵලක පිරික්සමින්
සොහොන් බිම
ඇතුගල්පුර චන්ද්‍රිකා
පා පොඩි
ඈත එන
බෝට්ටුව දැක
නටමින්
අසංක ඉරාජ් ලක්නාථ
