නුවරඑළිය දෙස්-විදෙස් සංචාරක ආකර්ෂණයට නතු වූ සංචාරක පුරවරයකි. මුහුදු මට්ටමේ සිට අඩි 6,182ක උසින් නුවරඑළියේ පිහිටි ශාන්තිපුර ගම්මානය මෙරට පිහිටි උසම ගම්මානයද වෙයි. ගම්මාන කිහිපයකින් මෙන්ම කුඩා නගරයකින් හෙබි ශාන්තිපුර ගම්මානයට නුවරඑළියට පිවිසෙන සංචාරකයන් යන්නේ උසම ස්ථානයේ සිට අවට සිරි නරඹන්න මෙන්ම උසම ස්ථානයේ පිහිටි ශාන්තිපුර පන්සලද වන්දනාමාන කරන්නය.
පසුගියදා ශාන්තිපුරට පමණක් නොව, නුවරඑළියටද නව අරුණැල්ලක් උදා වූයේ ශාන්තිපුර ඊගල්ස් නැරඹුම් ස්ථානය (Eagle’s View Point) විවෘත කිරීමත් සමඟිනි. ගුවන් හමුදාවේ ශ්රම දායකත්වයෙන් හා ඉංජිනේරු සහයෙන් ඉදි වූ මේ සුන්දර නැරඹුම් ස්ථානය ඉතා කෙටි කලකින් නිම කිරීමට ඔවුන්ට හැකියාව ලැබිණි. මේ සඳහා මූල්ය දායකත්වය දැක්වූයේ සංචාරක සංවර්ධන අධිකාරියයි.
“ගුවන් හමුදාවේ කාර්යභාරයක් ලෙසයි මේ නැරඹුම් මැදිරිය සකස් වුණේ. මේ ව්යාපෘතිය හැදීමේ කටයුතු ආරම්භ කළේ 2024 සැප්තැම්බර 10 වැනිදා. දිවා රාත්රී වෙහෙස නොබලා අපට වැඩ කරන්න සිදු වුණා. ඒ, මාස තුනක් ඇතුළත මෙය නිම කිරීමේ අවශ්යතාව තිබුණ නිසා. මේ සඳහා රුපියල් මිලියන 47ක මුදලක් වැය වුණා. සංචාරක ප්රවර්ධන මණ්ඩලය මෙහි මූල්යමය දායකත්වය සැලසුවා. මෙය යුනික් බිල්ඩින් එකක්. වෙනත් තැන්වල දැක නැති ආකාරයේ ගොඩනැඟිල්ලක් හදන්න අපට වුවමනා වුණා. පොළොව මට්ටමේදී පළමු නැරඹුම් මැදිරිය වින්දනය කරන්න පුළුවන්. මුල් නැරඹුම් කුටියේ ගමේ ජනතාවගේ අලෙවි ප්රවර්ධන කුටි ඇතුළත් වෙනවා. අනෙක් තට්ටුව භාවිත කරන්නේ අපේ දේශීය තේ ප්රවර්ධනය සඳහා. එතැනින් උඩ රූෆ්-ටොප් එක.” ඒ ශ්රම දායකත්වය සැපයූ ගුවන් හමුදාවේ අදහසයි.
මෙය විවෘත වූයේ විදේශ කටයුතු, විදේශ රැකියා සහ සංචාරක ඇමැති විජිත හේරත් හා හිටපු ගුවන් හමුදාපති එයාර් මාර්ෂල් උදේනි රාජපක්ෂගේ සහභාගිත්වයෙන්.
“නුවරඑළිය සංචාරක කර්මාන්තයට අලුත් පියවරක්. අපේ සංචාරක ක්ෂේත්රය දිනෙන් දින ඉදිරියට යන බව මෙයින් පෙන්නුම් කරනවා. ශ්රී ලංකා ගුවන් හමුදාවත් සංචාරක අමාත්යාංශයත් ඒකාබද්ධව මේ මනරම් ස්ථානය සකස් කළා. දෙස් විදෙස් සංචාරකයන්ට මුළු නුවරඑළිය නගරයම අලංකාරවත්ව දැක බලාගත හැකියි.” ඒ ඇමැති විජිත හේරත්ය.
මේ ශාන්තිපුර ඊගල්ස් නැරඹුම් ස්ථානයේ සිට නුවරඑළිය නගරය, ග්රෙගරි වැව, කිකිළියාමාන කඳු පන්තිය, පිදුරුතලාගල, හක්ගල උද්යානය, ශ්රී පාදය, සප්ත කන්යා කඳුවැටිය මෙන්ම ඌව පළාතේ සොබා දහමේ සුන්දරත්වය අපූර්ව ආකාරයෙන් එක තැනක සිට වින්දනය කළ හැකි වෙයි. මින් පෙර නුවරඑළියට පිවිසෙන සංචාරකයකුට එකම ස්ථානයක සිට මේ අත්දැකීම් වින්දනය කරන්නට හැකියාව ලැබුණේ නැත. දැන් ඒ සඳහා සංචාරකයන්ට අවස්ථාව උදා වී ඇත්තේය. ඒ, මෙය මුහුදු මට්ටමේ සිට අඩි 6,182ක උසසින් පිහිටි ශ්රී ලංකාවේ උසම ගම්මානය වන ශාන්තිපුර ඉදි කර තිබීම හේතුවෙනි.
සංචාරකයන්ට ඊගල්ස් වීව් පොයින්ට් වෙබ් අඩවිය හරහා මාර්ගගත ක්රමයට ටිකට් වෙන් කරවාගත හැකි බව අදාළ බලධාරීහු පවසති. දේශීය සංචාරකයකුට පළමුවැනි තට්ටුව දක්වා යෑමට රුපියල් 100ක් වැනි සුළු මුදලක්ද ඉහළ මාලය වන රූෆ්-ටොප් දක්වා යෑමට රුපියල් 500ක්ද අය කෙරෙයි.
සුභාෂිණි ජයරත්න