බදුල්ල – මහියංගණ ප්‍රධාන මාර්ගයේ දුන්හිඳ අඹගහඔය 5 කණුව ප්‍රදේශයේදී පසුගිය සිකුරාදා සිදු වූ බස් අනතුරින් සිසුවියන් දෙදෙනකු මියගිය අතර 39 දෙනෙකු තුවාල ලැබූහ. එයින් 6 දෙනකුගේ තත්ත්වය බරපතළ බවද ඔවුන් දැඩි සත්කාර ඒකකයේ ප්‍රතිකාර ලබන බවද සිකුරාදා සවස් වන විට වාර්තා වී තිබුණි.
තුවාල ලැබූවන් බදුල්ල ශික්ෂණ රෝහලට ඇතුළත් කරන ලද අතර මෙම අනතුරට පත්ව ඇත්තේ කොතලාවල ආරක්ෂක විශ්වවිද්‍යාලයේ අවසන් වසරේ සිසුන් පිරිසකි.
මෙම අනතුරින් මිය ගොස් ඇත්තේ, නිවිතිගල තොලඹුගමුව පහළකන්ද පදිංචි එම්. ජී. අයි. උපයංගනී සහ කුරුණෑගල උණකොලගෙදර කරඩිවත්ත පදිංචි එම්. එම්. පි. ටී. හෙට්ටිමුල්ල නමැති කොතලාවල ආරක්ෂක විශ්වවිද්‍යාලයේ දක්ෂිණ මණ්ඩපයේ සිසුවියන් දෙදෙනෙකි. තුවාලකරුවන් බදුල්ල ශික්ෂණ රෝහලේ දැඩි සත්කාර ඒකකයේ, වාට්ටු අංක 9, 10, 15 වාට්ටුවල ප්‍රතිකාර ලබමින් පසුවෙති.
අනතුරට හේතුව මෙතෙක් අනාවරණය වී නොමැති නමුත් බසයේ තිරිංග ක්‍රියා විරහිත වීම හේතුවෙන් පල්ලම් සහිත මාර්ගයේ වේගයෙන් පැමිණි බස් රථය කණ්ඩියේ ගැටෙන්නට ඇති බවට සැක පළ කරන බව පොලිසිය සදහන් කරයි.
